Internatschonale Organisatschoon för Normen

Vun Wikipedia
(wiederwiest vun ISO)

In de Internatschonale Organisatschoon för Normen (engl.: International Organization for Standardization, kort: ISO) hefft sik internatschonale Organisatschonen för Normen tohopenslaten un bringt internatschonale Normen rut för allens, bloß nich för Elektrik un Elektronik. Dor is de IEC för tostännig, mol afsehn vun de Telekommunikatschoon, wat Saak vun de ITU is. Tohopen sünd düsse dree Organisatschonen de WSC (World Standards Cooperation).

Historie[ännern | Bornkood ännern]

Vun'n 14. to'n 26. Oktober 1946 weer in London en internatschonalet Drepen vun Organisatschonen för Normen ut verscheden Länner. Afordenten ut 25 Länner weern dor mit bi. Dor is afmaakt wurrn, dat en nee internatschonale Organisatschoon grünnt weern scholl. Düsse nee Organisatschoon scholl an de Steed vun de ISA treden, de 1926 grünnt wurrn weer un siet 1942 nich mehr arbeiden dö. Un ok de Arbeit vun den Utschuss för Normenkoordinatschoon vun de Vereenten Natschonen scholl se övernehmen. De nee Organisatschoon scholl in Genf sitten. Dor hett se ok an'n 23. Februar 1947 as ISO de Arbeit upnahmen.

Hüdigendags[ännern | Bornkood ännern]

Midderwielen maakt mehr as 150 Länner bi de ISO mit. Jedet Land stüürt dor een Liddmaat hen un dat steiht denn ok bloß för düt ene Land. Dat Düütsche Instituut för Normen (DIN) is vun 1951 af an Liddmaat bi de ISO för de Bundsrepublik Düütschland. Offizielle Spraken bi de ISO sünd Engelsch un Franzöösch. In düsse Spraken weert de ISO-Normen rutgeven. De natschonalen Organisatschonen mütt dor denn för sorgen, dat dat allens översett warrt.

Bloß vunwegen de Arbeit vun de ISO gifft dat Standards för Saken, de een in ganz verscheden Länner allerwegens övereen bruken kann. Dat gifft Standards in de Feller vun de Technik (as MP3 oder Telefonkarten), vun de Klassifikatschoon (dor mank Lännerkoods as .de, .nl, .jp un Spraakkoods as nds un en) un wie een wat maken schall (as Management vun de Qualität na ISO 9000).

Literatur[ännern | Bornkood ännern]

  • Jack Latimer: Friendship Among Equals. 1997 (Torüchkieken up 50 Johre ISO; PDF-Uttöög ut verscheden Afsnitten:

engelsch, franzöösch)

Weblinks[ännern | Bornkood ännern]