Germ Hofma

Germ Hofma (1951)

Germ Hofma (1948)

Gerben „Germ“ Hofma (* 19. April 1925 in Sittard; † 14. Oktober 2018) weer en nedderlannsch Footballspeler, de för de VV Heerenveen aktiv weer. He weer Störmer un hett twee Lännerspelen för de nedderlannsch Footbalnatschonalmanschap maakt.

Karriere

Hofma, woll in de Provinz Limborg boren, aber Söhn vun freesch Öllern, speel all mit 15 in de eerst Mannschap vun DIO Oosterwolde. Vun dor keem he 1945 nah Heerenveen. As Linksbuten speel he in’n Angreep vun de spoodriek Heerenveener Mannschap um Abe Lenstra, de bit 1951 de Nordsektschoon vun de Eerste klasse beherrschen un negen Mal in’n Reeg Noordmeester wurrr. He weer een vun de Speler, de in en legendären Match an‘n 7. Mai 1950 gegen Ajax Amsterdam ut en 1:5-Rückstand en half Stünn vör Speelenn’n noch en 6:5-Sieg maaken dee. Nah dit Speel wurr de flink Flögelstörmer as tweet Heerenveen-Speler nah Lenstra in den Kader vun de Nederlands elftal beropen.

Sien eersten Insatz in’n Angreep neben Lenstra, Kees Rijvers un den jungen Ajax-Speler Rinus Michels harr he in en inoffiziell Lännerspeel an‘n 17. Mai 1950 vörr 60.000 Tokiekers in Amsterdam gegen en B-Utwahl vun den engelschen Verband, dat Oranje dör Doren vun Lenstra, André Roosenburg un Rijvers 3:0 wunn. Ansluutend gung he mit de Mannschap up en Früendschapsspeelreis nah Skandinavien. Bi de twee 1:4-Nedderlagen, an‘n 8. Juni 1950 in Stockholm gegen Sweden un dree Daag later in Helsinki gegen Finnland hemm Hofma, Michels un Cor Huijbregts hör eerst beid offiziellen Spele in Oranje maakt. Wiels dormah Michels noch wiedere dreemal un Huijbregts noch eenmal beropen wurrn, kemm Hofma dör en Kneebesehren to kien wiedere Lännerspelen. He speel aber noch bit 1955 in de Mannschap vun Heerenveen. Nah twee Johren Paus geev he 1957 noch eenmal en Comeback as Halfprofi bi sien olden Klub. Aber mit de jüngeren Speler kunn he nich mehr mithollen un hett en lütt Sett later sien Loopbahn afslooten. För de VV Heerenveen hett he in elf Speeljohren 110 Doren schaaten.

Weblinks

• Körtporträt bi Friese voetballers