Hector Silva (Politiker)

Vun Wikipedia

Hector David Silva (* 22. November 1933 in’n Distrikt Cayo) is en Politiker ut Brietsch-Honduras/Belize (PUP).

Leven[ännern | Bornkood ännern]

Silva is 1933 as Söhn von Orfelina, borene Farras, un den Farmer Leopondo Silva boren un en Unkel to Daniel Silva.[1] He weer von 1949 bet 1954 op dat St. John’s College in Belize-Stadt.[1]

He hett an’n 3. Januar 1955 Teresita Acosta freet.[1] De beiden hebbt veer Döchter un een Söhn.[1]

Politik[ännern | Bornkood ännern]

Bi de Parlamentswahl in Brietsch-Honduras 1961 weer he Kannedaat för de PUP in’n Wahlkreis Cayo Noord un hett de Wahl mit 70,5 % von de Stimmen gegen Manuel Figueroa von de CDP wunnen. Ok bi de Wahl 1965 (61,9 % von de Stimmen gegen Theodocio Ochoa, NIP) un de Wahl 1969 (49,0 % gegen Joseph Andrews, NIP) kunn he sik in’n sülven Wahlkreis wedder dörsetten. Dorbi weer sien Vörsprung 1969 blots een Stimm groot.

Dormit weer he von 1961 bet 1963 Afornten von de Legislativversammlung, de an’n 1. Januar 1964 in dat Repräsentantenhuus övergahn is, von dat Silva denn bet 1974 Afornten bleven is.

He weer toeerst bet 1965 Minister för Apentliche Arbeiden, Energie un Verkehr un denn Minister för Apentliche Arbeiden un Versorgung.

In de Johren 1961 bet 1963 weer Silva ok Börgermeester von San Ignacio, dat sik in düsse Tied mit Santa Elena to de Dubbelstadt San Ignacio/Santa Elena tohoopslaten hett.

Bi de Wahl 1984 is he in’n Wahlkreis Cayo Zentraal as unafhängigen Kannedaat antreden. He is achter Eduardo Juan von de UDP un Assad Shoman von de PUP op’n drüdden Platz kamen un dormit nich in dat Repräsentantenhuus intagen.

Ehren[ännern | Bornkood ännern]

Na em is de Hector Silva Airstrip nöömt, de as Flegerplatz för de Stadt Belmopan deent.

Footnoten[ännern | Bornkood ännern]

  1. a b c d Personalities Caribbean. Personalities Limited, 1971, Sied 262