Harald Maack

Vun Wikipedia
Zur Navigation springen Zur Suche springen
Harald Maack bi de Utgaav von’n Studio Hamborg Nawusspries 2012

Harald Maack (* 12. November 1955 in Stell) is en düütschen Schauspeler.

Maack is 1955 in Stell boren. Na dat Abitur hett he en Lehr as Speditschoonskoopmann bi de Firma Lexzau, Scharbau GmbH & Co. in Hamborg maakt.

1978 kreeg he en eerst Gastengagement an dat Hambörger Ohnsorg-Theater. He hett denn von 1979 bet 1983 en Schauspeelutbillung an dat Hamborger Schauspielstudio Frese maakt. Na disse Tied harr he verscheden Theaterengagements. Maack güng toeerst mit en Anfängerverdrag an dat Stadttheater Ingolstadt. Denn kemen Gastverdrääg an dat Slotttheater Celle un dat Stadttheater Freiburg.[1] 1985 hett he in Wien an dat Theater in der Josefstadt ünner Speelbaas Klaus Emmerich de Rull as Azolan in de öösterrieksche Eerstopföhrung[2] von dat Theaterstück Gefährliche Liebschaften von Christopher Hampton speelt. In de Josefstadt is he ok as Valmont in Heiner Müller sien Theaterstück Quartett optreden.

1990 keem Maack na Hamborg trügg un hett dor Theater speelt. Von 1991 bet 1994 weer he in de Kulturfabrik Kampnagel ünner annern as Der Merkl Franz in Ödön von Horvath sien Theaterstück Kasimir und Karoline in de Inszeneerung von Thomas Mattschoß to sehn. 1997 hett he, ok in en Inszeneerung von Thomas Mattschoß, den Fernando in dat Truurspeel Stella von Johann Wolfgang von Goethe speelt. 2002 weer he an dat Theater N.N. in Hamborg in Patrick Süskind sien Monolog Der Kontrabass.[3] 2004 is he bi’n Hamburger Jedermann in de Spiekerstadt optreden. An de plattdüütsche August-Hinrichs-Bühn in Ollnborg hett he in de Speeltied 2006/2007 in Elling von Axel Hellstenius speelt.[4][5]

Vör de Kamera stünn Maack toeerst al in de Johren 1980. 1982 hett he de Hauptrull in de Komödie Herzlichen Glückwunsch speelt. 1991 hett he denn in’n Kinofilm Karniggels von Detlev Buck mitspeelt un 1992 harr he en Nevenrull in Schtonk!.

Siet de Johren 1990 is Maack fakener in düütsche Feernseh- un Filmprodukschonen to sehn. He hett in’t Feernsehn en poor gröttere Rullen över en ganze Serie, över enkelte Episoden oder enkelte Episoden övernahmen.

Besünners bekannt worrn bi dat Publikum is Maack dör twee Rullen in Produkschonen von dat ZDF. Von 1995 bet 2007 hett he in över 80 Episoden an de Sied von Mariele Millowitsch un Walter Sittler den Portier Schmollke in de Vöravendserie girl friends – Freundschaft mit Herz speelt. Von 2007 af an hett he denn Rull in de ZDF-Serie Notruf Hafenkante övernahmen. Dor is he de Polizeioberkommissar Jörn Wollenberger.

En Rull, de jümmer wedder in de Serie opdükern dee, harr Maack siet 2005 ok as Dr. Wilhelmy in de ARD-Serie Der Dicke.

Maack schrifft blangenbi ok plattdüütsche Kortgeschichten. 2013 hett he bi Vertell doch mal mit de Geschicht Dat gröne Kleed den drüden Platz maakt.

Filmrullen (Utwahl)[ännern | Bornkood ännern]

Johr Titel
1979 Ein Mann mit Charakter, Feernsehn
1982 Herzlichen Glückwunsch
1991 Karniggels
1992 Deutschfieber
1992 Hello Mr. Berg
1996 Der Pakt – Wenn Kinder töten, Feernsehn
1999 Der geheime Zeuge, Feernsehn
1997-2000 Die Schule am See, Feernsehreeg
2001 Das Geheimnis der Mittsommernacht, Feernsehn
2002 Kollaps, Feernsehn
1995-2007 Freundschaft mit Herz, Feernsehreeg
2007-18 Notruf Hafenkante, Feernsehreeg

Weblenken[ännern | Bornkood ännern]

Footnoten[ännern | Bornkood ännern]

  1. Vita Harald Maack Websteed von dat ZDF, Stand 2010
  2. Christopher Hampton: Gefährliche Liebschaften Websteed von’n Suhrkamp Verlag
  3. Herbst 2002: "Der Kontrabass" Websteed von dat Theater N.N. Hamburg
  4. Fritz Lottmann: Die Geschichte der August-Hinrichs-Bühne (AHB) Websteed von de August-Hinrichs-Bühn
  5. Liebeserklärung an Chaoten, nwzonline.de