Hans Christoph von Königsmarck (1600–1663)

Vun Wikipedia
Hans Christoph von Königsmarck 1651, von Matthäus Merian den Jüngern

Graaf Hans Christoph von Königsmarck (* 4. März 1600 in Kötzlin in de Prignitz; † 8. März 1663 in Stockholm) weer en düütschen Heerföhrer in sweedsche Deensten.

Königsmarck is 1600 as Söhn von Beatrix Elisabeth, borene von Blumendal (* 1580), un den Riddmeester Konrad von Königsmarck (1574–1623) in Kötzlin boren. Optagen worrn is he von 1616 af an as Paag an’n Hoff von Hertog Friedrich Ulrich in Wulfenbüttel.

In de Anfangstied von’n Dörtigjohrigen Krieg is he 1620 Footsoldat in dat kaiserliche Regiment Sassen-Loonborg worrn, 1625 Rieder un en Tied later Riddmeester. As de Sweden ünner König Gustav II. Adolf 1630 in Noorddüütschland lannt sünd, is Königsmarck in sweedsche Deensten wesselt. 1635 is he Oberst von dat Sperreuthersche Regiment worrn, in dat he vörher Riddmeester weer. Königsmarck keem na Westfalen un schull sik dor mit de Truppen von Dodo to Innhusen un Knyphusen tohoopslaten. He is denn dör den Oberst Luttersheim fungennahmen worrn, keem aver bald wedder free.

1640 is he Generalmajor worrn, in’n Januar 1645 Generalleutnant un an’n 1. Juni 1648 Feldmarschallleutnant. Feldmarschall is he denn an’n 14. April 1655 worrn.

1636 hett he bi Rodenkirchen kaiserliche Truppen slahn. He weer denn Kummandant in Ossenbrügge un hett an’n 6. Februar 1637 Stadthagen innahmen.[1] 1642 hett he mit General Torstensson den Tog na Slesien mitmaakt. Op’n Weg trügg hett he in de Slacht bi Breitenfeld an’n 2. November 1642 den linken Flögel anföhrt.

As Torstensson na Böhmen güng, is Königsmarck in Middeldüütschland trüggbleven un hett Mellrichstadt, Ascherslebbe, Halverstidde un Osterwieck innahmen un Meideborg blockeert. He hett de Kaiserlichen ut Pommern verdreven un is in dat Arzstift Bremen un dat Stift Veern inrückt. De beiden Stite harr he in’n Februar 1645 kumplett innahmen.

An’n 16. Juli 1648 hett he de sweedschen Truppen in de Slacht von Prag anföhrt un de Stadt innahmen un plünnert.

He weer in de Tied von 1646 bet 1663 Generalguvernör von de nee billten Hertogdömer Bremen un Veern. Sien Seet as Generalguvernör weer Stood. Dicht bi Stood in dat Dörp Lieth an de Kant von de Stoder Geest na de Masch von Oolland hen, hett he dat Slott Gothenborg as Landsitt boon laten. De Naam von dat Slott is later ok op dat Dörp Lieth övergahn.

He is an’n 26. März 1651 sweedschen Graaf von Västervik un Stegeholm worrn un an’n 10. April Rieksraad. De Familie von Königsmarck is 1652 offiziell in dat sweedsche Ridderhuus inföhrt worrn.

Königsmarck is op’n Weg an de poolsche Front in’n Tweten Noordschen Krieg von de Danzigers fungennahmen worrn. He hett von 1656 bet 1660 in de Festung Wießelmünn in Fungenschop seten. Eerst mit’n Freden von Oliva is he wedder free kamen.

Königsmarck hett de letzten Johren denn in Stood leevt. Doodbleven is he 1663 in Stockholm an en Bloodvergiftung.

Wohrschienlich empfohlen von Oberstleutnant Wilhelm von Micrander hett Först Ludwig I. von Anhalt-Köthen Königsmarck in’n Juni 1648 in de Fruchtbringende Gesellschaft opnahmen. De Först hett em den Sellschopsnaam der Streitende un de Devise ein Bessers zu erlangen geven. As Emblem is em das große Fünffingerkraut (Potentilla recta) todacht worrn. In’t Köthener Sellschopsbook is Königsmarck sien Indrag ünner de Nr. 515 to finnen.

Besitt[ännern | Bornkood ännern]

De Wehrtsche Hoff in Bossel hett Königsmarck tohöört.

An’n 4. Mai 1645 hett he de Ämter Neehuus un Rodenborg as Lehn kregen un an’n 4. Dezember 1661 keem dat Amt Beers gegen en Pandgeld von 40.000 Rieksdalers ok an Königsmarck.

Dat Amt Niestadt in Brannenborg hett Königsmarck 1644 kregen. Ok de Ämter Groot- un Lütt-Winningen un Welferlingen in dat Stift Halverstidde un dat Amt Hötensleben in dat Arzstift Meideborg sünd in sien Besitt kamen. 1662 hett he dissen Besitt an Friedrich von Hessen-Homburg verköfft.

Familie[ännern | Bornkood ännern]

Königsmarck hett in’n Februar 1633 Barbara Maria Agathe von Leesten (9. April 1608–15. Dezember 1671) freet. Se weer de Dochter von’n brannenbörgschen Eddelmann Christoph von Leesten. De beiden harrn veer Kinner: Hans Christoph (1635–1653), Otto Wilhelm (1639–1688), Kummandant von de veneziaanschen Striedkräft, Kurt Christoph (1634–1673), nedderlandschen Generalleutnant, un Beate Elisabeth (1637–1723; hett Pontus Fredrik De la Gardie freet).

Footnoten[ännern | Bornkood ännern]

  1. http://www.30jaehrigerkrieg.de/konigsmarck-hans-christoffer-graf-von-3/