Hütten an de Hamm

Vun Wikipedia
Zur Navigation springen Zur Suche springen

An de Hamm twüschen Oosterholt-Scharmbeek un Worpsweed in dat Rebeed von de Holtsteed hett dat verscheden Hütten geven, de vör allen as Gasthüüs för de Schippers op de Hamm anleggt worrn sünd (besünners de Törfschippers), aver later ok Sportschippers un Touristen ut Bremen versorgt hebbt.

De grote Tied von’n Hannel op de Wümm weer von dat 18. Johrhunnert bet in dat 20. Johrhunnert. Vondaag is de Hannel op de Hamm kumplett verswunnen, aver von de olen Hütten sünd Nee Helgoland, Melchers Hutten un Tietjens Hutten as Gasthüüs bestahn bleven.

Holtsteed[ännern | Bornkood ännern]

De Holtsteed weer en Afsnidd von de Hamm, de so breed weer, dat de Hamm dor en See billt hett. As de Loop von de Hamm in dat 19. Johrhunnert begraadigt worrn is, is de Holtsteed verswunnen. Vörher aver weer de Holtsteed en wichtigen Ümslagplatz för de Törfschippers. De Buurn ut dat Düvelsmoor sünd mit jemehr lüttje Törfkahns bet na de Holtsteed föhrt un dor hebbt Törfschippers ut Bremen den Törf op de grötteren Buckscheep övernahmen. Dat hett de Buurn den Weg bet Bremen spoort, de en poor Daag duurt hett. De grötteren Bück kunnen nich wieder as bet na de Holtsteed kamen, von wegen dat se to groot weren för de lüttjen Beken un Fleten in dat Moor.

Üm de Schippers to versorgen, hett dat deelwies Hökers op Bööd geven. Deelwies sünd aver ok an dat Över Hütten anleggt worrn, an de de Kahns un Bück fastmaken kunnen.

53° 13′ N, 8° 52′ O

Tietjens Hutten[ännern | Bornkood ännern]

De Hütt liggt an de Münn von’n Oosterholter Havenkanaal in de Hamm. 1855 hett Friedrich Wilhelm Müller de Hütt övernahmen un 1880 sien Broder Wilhelm. De hett ehr an’n 13. Oktober 1894 an’n Kahnschipper Hinrich Tietjen verköfft. Na sien Dood hett 1895 sien Weetfro Anna de Hütt övernahmen un 1910 sien Söhn Diedrich. Diedrich Tietjen hett 1914 en ganz neet Gebüüd boot, is aver in’n Eersten Weltkrieg fullen. Sien Broder Friedrich hett denn de Weetfro freet un de Hütt wiederbedreven. 1934 hett Hinrich Tietjen övernahmen un weer bet 1955 de Kröger. 1959 hett de Rodervereen Oosterholt-Scharmbeek blangen de Hütt en Vereenshuus boot.

53° 12′ N, 8° 49′ O

Puffs Hutten[ännern | Bornkood ännern]

Düsse Hütt is ok Tweete Hutten oder Haven von Kiautschau (na de düütsche Kolonie Kiautschau) nöömt worrn. De Naam Puffs Hutten keem von Mudder Puff, de de Hütt bedreven hett. Na annere Besitters harr de Hütt aver ok de Naams Rusts Hutten, Fuhses Hutten un Wedermanns Hutten.

1880 hett Dietrich Ahlers de Hütt övernahmen. Ahlers is aver al bald doodbleven. 1883 hett Ahlers sien Weetfro Georg Rust freet, de denn tohoop dat Gasthuus bedreven hebbt. Na Rust weer bet 1916 Wilhelm Fuhse de Bedriever. Von em hett 1916 bet 1919 Johann Grotheer de Hütt övernahmen un von 1919 bet 1925 Albert Puff.

1925 is de Schankbedriev instellt worrn un de Hütt is bet 1943 von Hermann Wedermann as Wekenennhuus bruukt worrn. 1930 hett Hermann August Fahlbusch mit en poor Kumpaans von de Swarte Riekswehr hier Ünnerkruup funnen, de 1923 twee Fememorde begahn harrn. Fahlbusch is in de Nacht von’n 13. op’n 14. Januar 1931 op sien Boot vör de Hütt doodbleven. Dat Afgas von sien Motor schall em stickt hebben.

53° 13′ N, 8° 51′ O

Melchers Hutten[ännern | Bornkood ännern]

De Hütt is ok Nee Kamerun nöömt worrn. Ehren Anfung nahmen hett de Hütt 1814. In dat Johr hett dat Amt Oosterholt bi de Landdrostie Stood en Schankkunzession för Otto Schnaars von’n Heidkamp beandragt. He hett toeerst en Schipp hatt, dat fast op de Hamm liggen dee. Later hett he bi dat Schipp denn en faste Hütt boot. Nadem Schnaars 1820 doodbleven is, hett Lüer Wrieden de Hütt övernahmen. Nadem de Hütt 1843 un 1845 dör Hoogwater un Iesgang Schaden nahmen harr, hett Wrieden dat Gelänn mit Sand opschüdden laten un dor en fast Huus boot. De Besitters na Wrieden weren bet 1888 Johann Lilienthal (Jann Kaptein), bet 1892 Ernst August von Oehsen, bet 1910 Hinrich Buschkaroff, bet 1915 Metta Buschkaroff, bet 1921 Albert Böttjer, bet 1936 Friedrich Buschkaroff un denn Wilhelm Melchers. Von em keem de hüdige Naam. Melchers Hutten is 1951 afbrennt. Melchers hett denn en Fackwarkhuus ut Tarmst op Afbrook köfft un blangen de afbrennte Hütt wedder opstellen laten. Na Wilhelm Melcher sien Dood 1975 hett sien Söhn Fritz dat Gasthuus bedreven. 2016 hett Wolfgang Teichmeier dat Gasthuus övernahmen.

Bi Melchers Hutten steiht ok en Wekenennhuus, dat in de Johren 1960 Felix von Eckardt tohöört hett.

53° 13′ N, 8° 51′ O

Nee Helgoland[ännern | Bornkood ännern]

Nee Helgoland liggt an dat linke Över von de Hamm nich wied af von Worpsweed. Dat Gasthuus besteiht bet vondaag un dat gifft dor ok en Campingplatz. Tosätzlich liggt blangenan dat Gelänn von’n Vereen Adelsdorper Törfschippers, de sik 1983 grünnt hett, dat de Törfschipperee nich ganz vergeten warrt.

53° 14′ N, 8° 53′ O

Annere[ännern | Bornkood ännern]

In ole Ünnerlagen un Koorten gifft dat noch Henwiesen op Hütten an de Münn von de Beek in de Hamm un op dat linke Över von de Hamm güntsied Melchers Hutten (op en Koort von 1878, de Lüder Halenbeck tekent hett).

De Hütt an de Münn von de Beek in de Hamm op dat Nadelküssen hett wohrschienlich von 1877 bet 1893 bestahn, villicht sogor bet 1906. Bedreven hett ehr Mudder Murken. Dat Nadelküssen weer fröher en Eiland, aver as de Hamm begraadigt worrn is, dor is de Waterloop twüschen Beek un Hamm verlannt. In Mudder Murken ehr Hütt is ok de Toll betahlt worrn, den dat köst hett, wenn een de Beek hoogföhren wull.