Gustav Viebrock

Vun Wikipedia

Gustav Viebrock (* 5. Januar 1929 in Rüspel; † 15. Januar 2019 in Harsfeld[1]) weer en düütschen Ünnernehmer.

Viebrock is 1929 as Söhn von en Havenarbeider in Rüspel boren.[2] He wull egentlich Schoolmeester warrn un weer al op dat Lehrerseminar Beers, aver hett denn doch Mürger lehrt.[3] Dorto harr em sien Vader raden, von wegen dat in de Tied na’n Tweten Weltkrieg een Saak wiss weer: dat Düütschland wedder opboot warrn müss. 1951 hett he an de Boschool in Rastäe sien Afsluss maakt.[2] Nadem he en Tied lang bi en Architekt arbeidt hett, hett he an’n 1. September 1954 as Mürgermeester en Boünnernehmen in Harsfeld övernahmen, dat en Nafolger söcht hett un to de Tied veer Mitarbeiders harr.[2] Düt Ünnernehmen, dat denn Viebrockhaus heten hett, is över de Tied to en groten Arbeidgever mit meist 1000 Arbeidnehmers worrn. Gustav Viebrock hett dat Leid över dat Ünnernehmen 1984 an sien Söhn Andreas Viebrock övergeven, weer aver as Senior-Chef bet to sien Dood in dat Ünnernehmen aktiv.

Viebrock weer glövigen Christ (evangeelsch-luthersch) un weer in de Gemeenarbeid in Harsfeld aktiv. Von 1983 bet 1995 weer he Maat von de Synood von de Hannöversche Landskark, 24 Johr Maat von’n Karkenkreisdag von’n Karkenkreis Buxthu un 25 Johr lang Vörsitter von’n Karkenvörstand von de Harsfeller Marien- un Bartholomäus-Gemeen.[3] He hett ok karitative Projekte in Süüdafrika, Indien, Wittrussland un Russland ünnerstütt. 36 Johr lang weer he ok as Scheedsmann aktiv.[3]

Viebrock hett 1933 dat Verdeenstkrüüz an’t Band von de Bundsrepublik Düütschland kregen un is an’n 1. September 2018 Ehrenbörger von de Gemeen Harsfeld worrn.

He hett an’n 3. Juni 1955 siene Fro Elfriede freet, de he al ut Kinnerdaag in Rüspel kennen dee, un harr twee Kinner. Kort na sien 90. Geboortsdag is he an’n 15. Januar 2019 doodbleven. He is an’n 19. Januar in Harsfeld begraven worrn.[1]

Footnoten[ännern | Bornkood ännern]

  1. a b Zum Tod des Harsefelder Ehrenbürgers: Der christliche Glaube war Gustav Viebrocks Antrieb, Stader Tageblatt an’n 16. Januar 2019
  2. a b c Interview mit Gustav, Andreas, Jan, Dirk un Lars Viebrock, viebrockhaus.de
  3. a b c Der christliche Glaube ist sein Antrieb, Stader Tageblatt an’n 5. September 2018