Gulfhoff Ihnen Engerhaaf
Engerhaaf hört siet de Gemeentegebiedsreförm van 1972 to de Oldeborg in de Gemeente Süüdbrookmerland in Oostfreesland. Al 1938 wurren de Landgemeenten Engerhaaf, Fehnhusen, Oldeborg un Upende to de grotere Gemeente Oldeborg verenigt, mehr of minner dat Gebied van dat olle Karkspööl Engerhaaf in 't Middeloller. Van wieden al sücht een de grote Kark, un van dichter bi ok de Klockenstohl. As de meesten Karken in de Marsch kunnen de Minsken kien Karktoorn bauen, um dat bi de weke Grund de Toorn gau scheev stunn - as vandaag good to sehn in Suurhusen. Futt bi de Kark steiht een van de ollste Husen van Engerhaaf, de Gulfhoff Ihnen.
Disse Gulfhoff hett dat al 1547 geven, as de Urkunnen dat bewiesen. So is dat Huus een van de ollste Gulfhoffen in Oostfreesland. De eerste Heer van de Plaats was Atke Tyadens, daarna weten wi van anner 16 Mannlü, de de Hoff hört hett. 1911 wurr de Plaats van de Familie Ihnen overnomen. Un 1991 hett de Dochter Alma Ihnen dann de Hoff schunken an de Gemeente Süüdbrookmerland. Nu muss en Vereen funnen worden, um Fördergelder to kriegen. So wurr in de Maimaant 1991 de „Verein Gulfhof Ihnen e. V." gründt. De olle Gulfhoof wurr moi upklütert un is nu en gode Stee för all, de Pläseer hebben an oostfreeske Kultur. Utstellens, Schrieverwarkstejen, Muuskanten un vööl annern komen geern, de Atmosphäre van so 'n oll Gulfhuus is heel wat besünners.
Weblenk
[ännern | Bornkood ännern]
|
De Artikel „Gulfhoff Ihnen Engerhaaf“ is een exklusiven Artikel up de Plattdüütsche Wikiepdia. In anner Spraakuutgaven is de nich to finnen. |