Gideon Ståhlberg

Gideon Ståhlberg, Zevenaar 1961

Anders Gideon Tom Ståhlberg (* 26. Januar 1908 in Göteborg; † 26. Mai 1967 in Leningrad) weer en sweedsch Schachspeel-Grootmeester.

Leven

Ståhlberg wunn all 1927 de Meesterschap in Sweden (deelt mit Gösta Stoltz). Dat hett he 1929 un 1939 nochmal henkregen. In de 1930er Johren wies sück so nah un nah sien groot Talent. He hett woll 1930 twee Wettkämpe gegen Efim Bogoljubow (in Göteborg mit 1,5:4,5) un Rudolf Spielmann (in Stockholm mit 1,5:4,5) verloren, aber gegen den letzteren wunn he 1934 an glieker Stäe mit 5:3 un een Johr later Göteborg Aaron Nimzowitsch ebenfalls mit 5:3. Bit to’n Anfang vun den Tweeten Weltkrieg harr de johrteihntenlang best Speler vun Sweden ok mehrere Turniererfolge: He wunn 1934 in Niendörp (vör Kurt Richter un Carl Ahues) un 1935 in Zoppot, he wurr Dart in Dresden 1936, Tweet in Stockholm, Pärnu un Zoppot 1937, Tweet in Kemeri un Harzborg 1939.

Ståhlberg hett an dattein Schacholympiaden (1928, 1930, 1931, 1933, 1935, 1937, 1939, 1952, 1954, 1956, 1958, 1960 und 1964) deelnommen. Mit de Mannschap reck he 1935 den tweeten un 1933 den darten Platz, in de Eenzelwertung gelung hüm 1952 dat tweetbeste un 1935 dat dartbeste Ergevnis an dat Spitzenbrett. Ok an de inoffiziellen Schacholympiade 1936 in München hett he deelnommen un reck dor dat dartbeste Eenzelergevnis an dat Spitzenbrett. Nah Utbröök vun den Tweeten Weltkrieg wiels de Schacholympiade 1939 in Buenos Aires bleev he in Argentinien bit to dat Johr 1948. In disse Tiet he he (un anner europääsch Speler, de nich in dat vun de Krieg befallen Europa torüchgahn wullen), dör sien Deelnehmen an völ Schachturnieren in Süüdamerika dat Schachspeel to groot Popularität up dissen Eerddeel brocht. He weer ok hier bannig spoodriek: Sieger in Mar del Plata 1941 (vör Miguel Najdorf un Erich Eliskases) un Buenos Aires 1941 un 1947, Tweet in Mar del Plata 1942, 1943, 1947 un 1948 un in Buenos Aires 1948. 1948 nehm he an dat Interzonenturnier in Saltsjöbaden deel, wo he sück mit Platz 6 för dat Kandidatenturnier 1950 in Budapest qualifizeeren dee. In Budapest keem he up den 7. Platz (vör Andor Lilienthal, László Szabó un Salo Flohr). Tovör, 1949, wunn he dat düchtig stark besett Turnier in Teplitz-Schönau (vör Laszlo Szabo un Ludek Pachman) bi 20 Deelnehmer 1950 kreeg he vun de FIDE den Grootmeestertitel tospraaken.

Mit verscheeden Vereens wunn he ok de sweedsch Mannschapsmeesterschapen. Sien best historsch Elo-Tall weer 2762.De reck he in’n März 1948, to de Tiet weer he denn ok de dartbest Speler up de Welt.

Siet 1951 weer he Internatschonaler Schiedsrichter vun de FIDE un hett van 1957 bit 1963 in fiev vun de Wettkämpe vun Michail Botwinnik um de Weltmeesterschap (all in Moskau utdragen). 1953 wurr he bi dat Kandidatenturnier vun Zürich un Neuhausen Letzt (15.). He kunn sück nich mehr för dat Interzonenturnier qualifizeeren, aber he reck noch en paar Erfolge up internatschonalen Turnieren. So wunn he Göteborg 1957/58 un wurr in Beverwijk 1958 un Kopenhagen 1960 jewiels Dart. Kört vör den Beginn vun dat internatschonale Turnier in Leningrad 1967, an dat he ok deelnehmen sull, is he an en Hartinfarkt storven.

Literatur

• Ingemar Johansson: Glasblåsarens pojke – Gideon Ståhlberg 100 år. In: Tidskrift för Schack, Nr. 3, 2008, S. 4–19.

Weblinks

• Profil bi chessgames.com (engelsch)