Geesthell
.jpg)
De Geesthell (hoochdüütsch Geesthelle) weer en Deel von Geestmünn, wat vondaag to de Stadt Bremerhoben höört. De Geesthell liggt nu in’n Oortsdeel Kluushoff, Stadtdeel Leh.
Geografie[ännern | Bornkood ännern]
De Geesthell liggt in en Arm von de Geest. Dat Rebeed is vondaag groff afgrenzt dör de Geest un de Straten Grimsbystraat un Diekstraat.
Historie[ännern | Bornkood ännern]
Dat Rebeed von de Geesthell hett ganz fröher to de Feldmark von dat Dörp Leh höört. To de Tied stünnen dor noch keen Hüüs. Nadem dat Königriek Hannover von 1844 af an mit Geestmünn sien egen Haven in’n Süden von Leh un Bremerhoben grünnt hett, müss 1856 Leh dat Rebeed von de Geesthell an Geestmünn afgeven, dat dor Havenindustrie ansiedelt warrn kunn. Ünner annern hett sik dor 1857 op 6,5 Hektar de Rickmerswarft ansiedelt. En ganze Reeg Lüüd hebbt dor in de Arbeiderwahnungen leevt. Op dat Warftgelänn stünn ok de Villa von de Warftbesitters.
1861/1862 is de Bahn von Geestmünn na Bremerhoben boot worrn, de över de Geesthell lööp un bet 1923 in Bedriev weer.
De Warft hett bet 1924 arbeidt. In dat Johr müss de Warft von wegen de maue Opdragslaag den Bedriev opgeven. As dat Düütsche Riek kort vör’n Tweten Weltkrieg oprüsten dee, weren wedder so veel Opdrääg dor, dat de Warft 1937 wedder in Gang keem. Bi de Luftangreep op Wersermünn 1944 is ok de Warft swoor drapen worrn un veel von de Wahnhüüs sünd in Schutt un Asch versunken. Na’n Krieg weer blots een Wahnhuus nableven, dat in de Johren 1960 ok afreten worrn is. De Warft is aver wedder opboot worrn. Se hett bet 1986 arbeidt un is denn in Insolvenz gahn.
Na disse Tied is de Warft afreten worrn. Nableven sünd vondaag as Bodenkmaals blots noch dat ole Ingangsdoor na de Warft un en Kraan an de Geest. Op dat Gelänn is 1993 en Gebüüd för de Agentur för Arbeid Bremerhoben boot worrn. To’n 1. Dezember 2013 hett tosätzlich de nee Kita Folkert-Potrykus-Straat apenmaakt.
Verwaltungsgeschicht[ännern | Bornkood ännern]
De Oort hett vör 1885 to dat Amt Leh tohöört. Na 1885 weer dat in’n Kreis Geestmünn. Geestmünn is 1924 mit Leh to de Stadt Wersermünn tohoopgahn, de 1939 ok de Stadt Bremerhoben opnahmen un 1947 ehren Naam op Bremerhoben ännert hett.
Inwahnertall[ännern | Bornkood ännern]
| Johr | Inwahners |
|---|---|
| 1. Dezember 1871[1] | 480 Lüüd, 41 Hüüs |
| 1. Dezember 1885[2] | 406 Lüüd, 42 Hüüs |
| 1. Dezember 1905[3] | 434 Lüüd, 43 Hüüs |
Footnoten[ännern | Bornkood ännern]
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 151
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 161
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 50
Koordinaten:53° 33′ N, 8° 35′ O