Flett

Vun Wikipedia
Zur Navigation springen Zur Suche springen

Disambig.svg Dit Woort hett noch annere Bedüden: kiek dorför ünner Flett (Mehrdüdig Begreep).

Grundriss von en Neddersassenhuus, dat Flett is mit e betekent
Bild von Hermann Daur, Flett von en Buurnhuus in Frellsdorp

Dat Flett is en Ruum von dat Neddersassenhuus, in den de Füürsteed von dat Buurnhuus liggt. Dat Flett reckt von Butenwand na Butenwand un is een Fack groot. De Füürsteed in’t Flett harr in de ole Tied keen Schosteen un weer dormit en swarte Köök (un dat Huus en Rookhuus). De Rook is dör dat Gebüüd un na baven op’n Hauböhn tagen un dor denn dör dat Ulenlock rut. In’n Rook ünner de Deek sünd Schinken un Wüst ophungen worrn. In jüngere Hüüs is aver ut Brandschutzgrünn mehrstendeels en Schosteen inboot worrn.

Dat Flett harr to een Sied oder to beide Sieden en Döör na buten, de faken as Klööndöör utföhrt weer. Von dat Flett ut bestünn ok Togang to de annern Rüüm von’n Wahndeel von dat Hüüs, na de Dönz un de Kamern. Na vörn harr dat Flett toletzt en Dörgang na’n Weertschopsdeel von dat Huus op de Deel. Dat bedüüdt, dat een von de Grootdöör vörn an’t Huus in lieke Lien över de Deel dörkieken kunn bet na de Füürsteed in’t Flett.

Faken weer dat Flettfack breder as de annern. Dat Flettfack weer denn dör en Luchtbalken afstütt.