Event Horizon

Vun Wikipedia
Zur Navigation springen Zur Suche springen
Filmdaten
Plattdüütsch Titel:
Originaltitel: Event Horizon
Düütsch Titel: Event Horizon – Am Rande des Universums
Produkschoonsland: USA
Grootbritannien
Johr vun’t Rutkamen: 1997
Läng: 92 Minuten
Originalspraak: Engelsche Spraak
Öllersfreegaav in Düütschland: FSK 16
Filmkru
Speelbaas: Paul W. S. Anderson
Dreihbook: Philip Eisner
Produkschoon: Lawrence Gordon
Musik: Michael Kamen
Orbital
Kamera: Adrian Biddle
Snitt: Martin Hunter
Szenenbild: Joseph Bennett
Kledaasch: John Mollo
Dorstellers

Event Horizon (op plattdüütsch so veel as „Begeevnishorizont“; dt. Titel: Event Horizon – Am Rande des Universums) is de Titel vun en Science-Fiction-Horrorfilm ut dat Johr 1997, de in de USA un Grootbritannien produzeert weer. Speelbaas weer Paul W. S. Anderson, de Hööftrullen weern mit Laurence Fishburne un Sam Neill besett.

Inholt[ännern | Bornkood ännern]

Dat Nootfallruumschipp Lewis & Clark warrt in’t Johr 2047 op en geheeme Rettungsmisschoon in de Neeg vun’n Neptun schickt. An Boord hebbt se den Wetenschoppler Dr. Weir, de de Kru eerst in’n Ümloop vun Neptun vertellt, wat jemehr Opdrag is: se schüllt de Event Horizon bargen – en experimentell Ruumschipp, dat siet 2040 verswunnen weer. De Event Horizon harr en revolutschonären Andrief, de en künstlich Swart Lock tügen künn, wat dat Schipp in de Laag versetten de mit schienbore Överlichtsnelligkeit to reisen.

Funksignalen hebbt nu en Teken vun dat Ruumschipp bröcht, un wohrhaftig finnt se dat Schipp in de Atmosphäär vun Neptun. En Nootfallgrupp geiht an Boord, man dat Schipp sütt verlaten ut. Bald warrt se gewohr, dat de Kru vun de Event Horizon all doot sünd, vunwegen dat se sik all gegensietig ümbröcht hebbt. Dat kaputte Videologbook vun’t Schipp kann wedder herricht warrn, un so seht de Lüüd vun Captain Miller, woans sik de annere Kru gegensietig gresig torichten deit.

Na un na kamt de Lüüd vun de Lewis & Clark achter dat Geheemnis vun de Event Horizon un mööt sik jümmer mehr ok mit jemehr egen Ängst rümslahn. As de eersten Liddamaten vun de Kru vun jemehr gresigen Visionen in’n Dood dreven worrn sünd un bito de Lewis & Clark dör Sabotaasch tonichten maakt warrt, warrt Dr. Weit kloor, dat dat Ruumschipp dör dat Swarte Lock in en anner’t Universum flagen is un dorbi op snaaksche Oort un Wies transformeert worrn is. Torüchkamen is se as en Oort böösordig intelligent Leevwesen, dat de Anlaag hett, de laagsten Ängst wohr warrn to laten. Dat sütt ut, as weer dat Schipp dör en Dimensionssprung in en Oort „Höll“ reist.

So warrt Captain Miller jümmer wedder vun Gedanken an en Kru-Liddmaat trietst, dat he vör Johren bi en Insatz in en Schipp torüchlaten müss, dat brennen de. Liekers versöcht he, en kloren Verstand to behollen un de Event Horizon tonichten to maken. Weir versöcht em dorvun aftobringen, vunwegen dat he intwüschen vun’t Schipp kontrolleert warrt. Miller kann liekers den achteren Deel vun’t Schipp mit den Gravitatschoonsandrief afsprengen, so dat sik de Kru, de överleevt hett, mit dat vördere Enn in Sekerheit bringen kann. Miller sülvst kann sik aver nich mehr redden.

Kritik[ännern | Bornkood ännern]

  • In de TV Spielfilm weer de Tricktechnik loovt, wiel dat Dreihbook as intergalaktischen Mist betekent weer. De Geschicht harr keen Sinn un weer tosamenklaut ut Haunted un Alien. Opletzt bestünnen ok de Dialogen vör allen ut Klischees.[1]
  • Op Filmstarts.de weer Event Horizon as „wohrhaftig keen groten Worp“ kritiseert, man he verspröök ok to keen Tiet, dat he mehr weer, as he in Wohrheit is, neemlich en böverflachigen B-Movie, de op Schockeffekten setten deit. Man künn dormit groten Spaaß hebben, wenn een sik mit dat Genre utkennt un sik fragen de, ut wovun Film de Szenen inspireert weern. De Dialogen weern as duum betekent, wat en tosätzlichen Trash-Fakter to’n Smustern rinbringen de. Tokiekers, de in annere Genres to Huus sünd, harrn doran aver woll keen Freid.[2]

Utteken[ännern | Bornkood ännern]

Event Horizon is 1998 för twee Filmpriesen nomineert wesen. Uttekent weer he mit den Pegasus-Publikumspries vun’t Brussels International Fantastic Film Festival för den Speelbaas Paul W. S. Anderson.

Achtergrund[ännern | Bornkood ännern]

Betöög to annere Warken[ännern | Bornkood ännern]

Dat Grundthema vun den FIlm is dat glieke as in den RomanSolaris vun Stanisław Lem ut dat Johr 1961, de ok al verfilmt weer un sik ok in vele annere Science-Fiction Produkschonen wedderfinnt. De gresig düstere, bretale Stil is anlehnt an Alien un is sotoseggen de „ideoloosch ümkehrte“ Oort, die Geschicht to vertellen[3]. De Figur vun den Psychologen Kelvin, de na Solaris schickt warrt un dor vullstännig in dat Phänomen opgeiht, warrt in’n Film dör den Wetenschoppeler Weir dörtuuscht. Beide dörleevt se noch mol den Sülvstmoord vun jemehr fröhere Bruut.

De Inholt vun Event Horizon is jüst so as in The Dark Side of the Moon vun 1990, in den ok en Kru, de vun nix weet, op en Ruumschipp geiht, dat vun en lege Kraft beherrscht is. Jüst so ok as de Disney-Produkschoon The Black Hole vun 1979, in den en lütte Forscher-Kru en oolt, verswunnen Ruumschipp an’n Rand vun en Swart Lock opdeckt. In sien Inholt un Thematik lett de Film an den Reeknerspeel-Klassiker Doom vun 1995 torüchdenken, in dat Wetenschopplers en Door na de Höll apenmaken doot, dat se nuich wedder sluten künnt. Vele Trickeffekten in’n Film weern vun de Firma id Software ümsett, de ok de Spelen Doom I-III entwickelt hett.

In wietere Inspiratschoon künn vun de Kortgeschicht Hinterlands vun William Gibson kamen wesen. Dorin warrt de Piloten dör en tofallig opdeckt Swart Lock schickt, ut dat se later mit Artefakten vun en frömmen Zivilisatschoon torüchkamt. Man, se sünd dorna psychisch so swoor anslahn, dat se nix vertellen künnt. Un en poor vun de Piloten hebbt al op de Reis Sülvstmnoord maakt. Man ok annere Parallelen to annere Filmen oder politische Themen sünd in den Film inboet.

De Architektur vun de Event Horizon schall na den Kommentar op de DVD op de Pariser Kark Notre Dame baseren. De Naam Event Horizon betütt sik op den Oort in de Neeg vun en Swart Lock (Begeevnishorizont), woneem de Gravitatschoon so groot warrt, dat sogors dat Licht dor nich mehr rutkamen deit. Dat Nootfallschipp Lewis & Clark hett sien Naam vun Meriwether Lewis un William Clark, de Basen vun de Lewis-un-Clark-Expeditschoon. De krümmte Ruum, de in’n Film mit Hülp vun en Blatt Papeer verdüütlicht warrt, is en wohrhaftige Theorie un baseert op de so nöömten Einstein-Rosen-Brüch (Wormlock).

Nawirken[ännern | Bornkood ännern]

Vele Szenen ut den Film sünd bi de Naprodukschoon rutsneden worrn, üm de Öllersfreegaav NC-17 to ümgahn, de de finanzielle Büüt vun den Film teemlich minnert harr. De gröttste Deel dorvun is tonichten maakt worrn, de Rest sünd as Bonusmaterial op de DVD Special Edition to finnen.

För den Hööftdorsteller Laurence Fishburne weer de Film en wichtigen Schritt in sien Film-Loopbahn. Ünner annern hett em dat holpen, de Rull vun „Morpheus“ in de The Matrix to kriegen.

In enige latere Produkschonen warrt op Event Horizon anspeelt: In’t Reeknerspeel F.E.A.R. vun 2005 sünd mitünner Tietschriften to sehn mit de Meldung „Event Horizon found“. Dat Speel Mass Effect vun 2007 hett vele Elementen ut den Inholt övernahmen, wiel dat Speel Dead Space jüst so en Handlung hett as de Film-. Ok dor warrt en vermisst Ruumschipp söcht, op dat sik wohrschienlich en Katastrophe afspeelt hett.

Borns[ännern | Bornkood ännern]

  1. http://www.tvspielfilm.de/filmlexikon/?type=filmdetail&film_id=137331
  2. Jonas Reinartz: Kritik der FILMSTARTS.de-Redaktion
  3. http://www.scifimoviepage.com/solaris.html

Websteed[ännern | Bornkood ännern]