Eugen Kohlenbach

Vun Wikipedia

Eugen Kohlenbach (* 15. August 1930 in Herne/Westfalen; † 17. Januar 2016) weer en neddersassischen Politiker von de CDU.

Kohlenbach is 1930 in Herne boren. He weer dor ok op School un hett 1952 de Reifeprüfung maakt. He hett denn Weertschops- un Sozialwetenschoppen an de Universitäten Mönster un Freiburg studeert. 1956 hett he sien Studium as Diplom-Volksweert afslaten un in dat Johr anfungen, in de Utwussenenbildung to arbeiden. Von 1957 bet 1960 weer he Referent för „Soziale Seminare“ in Ossenbrügge. Von 1961 bet 1963 weer he Referent in dat Franz-Hitze-Huus in Mönster. Von 1964 bet 1967 weer he Dozent för Weertschops- un Sellschopslehr an dat Seminar för Staatsbörgerkunn e.V. in Olpe. Na disse Tied weer he denn bet 1985 Direkter von dat Niels-Stensen-Huus, Huus för Utwussenenbildung un Heimvolkshoogschool. För de dree Johr bet 1988 weer he Referent för Utwussenenbildung an de Fachschool för karklichen Gemeendeenst in Hilmssen.

Kohlenbach is 1959 in de CDU rin. Von 1973 bet 1980 weer he Vörsitter von’n CDU-Oortsverband in Leendaal. 1986 is he Vörsitter von’n CDU-Oortsverband in Worpsweed worrn. In de Tied von 1969 bet 1978 weer he Viez-Liddmaat in’n Rundfunkraad von Radio Bremen. He weer dor Maat in’n Utschuss för pädagoogsche Sendungen. Von 1972 bet 1976 weer he Vörsitter von’n Kreisöllernraad in’n Landkreis Oosterholt.

Kohlenbach weer von 1974 bet 1981 Raadsherr in’n Gemeenraad von de Gemeen Leendaal. Von 1976 bet 1981 weer he Afornten in’n Kreisdag von’n Landkreis Oosterholt un Vörsitter von’n Kreisschoolutschuss. Von’n 24. November 1976 bet 20. Juni 1994 (achte bet twölvte Wahlperiood) weer he Maat von’n Landdag von Neddersassen. In de achte Wahlperiood is he över de Landslist as Narücker för Ludolf von Wartenberg (de in’n Bundsdag wesselt is) in’n Landdag intagen. In de teihnte Wahlperiood is he för den Wahlkreis Oosterholt-Scharmbeek in’n Landdag kamen un de annern Wahlperioden över de Landslist. He weer in’n Landdag von’n 12. Januar 1984 bet 20. Juni 1990 Vörsitter von’n Utschuss för Wetenschop un Kunst un in de Tied von’n 22. Juni 1990 bet 9. Oktober 1990 Vörsitter von’n Kultusutschuss.