Eugène Boudin

Vun Wikipedia
Eugène Boudin in Deauville-Trouville, Juni 1896

Eugène Louis Boudin (* 12. Juli 1824 in Honfleur; † 8. August 1898 in Deauville) weer en franzöössch Maler, Vörlöper vun den Impressionismus un en vun de eersten Freeluchtmaler.

Leven[ännern | Bornkood ännern]

As Söhn vun en Hafenlotsen hett Boudin all mit 10 Johr as Schippsjung up en dampbedreven Fähr tüschen Le Havre un Honfleur arbeit. 1835 truck de Familie nah Le Havre, wo de Vader vun Boudin en Laden för Schrievworen un Billerrahmen apen maken dee, in den ok de junge Eugène arbeiten dee, bevör he later sien eegen Geschäft harr.

Eugène Boudin hett eenig Kunstmaler ut de Gegend kennen lehrt un fung an, hör Biller in sien Laden uttostellen. Maler as Constant Troyon, Jean-François Millet un Eugène Isabey hebbt Boudin Moot maakt, sülvst to'n Pinsel to griepen. Mit 22 Johr geev he sien Geschäft up un hett denn blots nah as Maler arbeit.

Strand vun Trouville, 1867

Mit en Stipendium vun de Stadt Le Havre kunn he af 1851 in Paris studeeren. Studienreisen hebbt hüm nah Flannern, Süüdfrankriek, Venedig un vör allen immer weer in de Bretagne führt – he bleev aber immer sien Heimat Normandie trüe.

Nah 1850 entstunn up de Ferme Saint-Siméon dicht bi Honfleur en lütt Künstlerkolonie, wo Boudin sück mit befrüend Malers, as Gustave Courbet, Eugène Isabey, Johan Barthold Jongkind, Claude Monet, Constant Troyon u. a. drapen dee un de he to dat Malen in de free Natuur anregen dee.

Af 1859 nehm Boudin regelmatig an' Pariser Salon deel. 1874 stell he ok up de eerst Utstellung vun de Impressionisten in dat Pariser Studio vun den Fotografen Nadar ut.

Eugène Boudin is an' 8. August 1898 mit 74 Johren storven un is up den Cimetière Saint-Vincent an' Montmartre in Paris bisett.

De Nahlass befind sück gröttstendeels in dat Musée Eugène Boudin in Honfleur as ok in' Musée Malraux in Le Havre.

Museen[ännern | Bornkood ännern]

Enkeld Nahwiesen[ännern | Bornkood ännern]

  1. Musée Eugène Boudin in Honfleur
  2. Musée Malraux in Le Havre

Weblenken[ännern | Bornkood ännern]

Eugène Boudin. Mehr Biller, Videos oder Audiodateien to’t Thema gifft dat bi Wikimedia Commons.