Esther Caroline Duflo

Vun Wikipedia
(wiederwiest vun Esther Duflo)
Esther Duflo up de Poptech-Konferenz 2009

Esther Caroline Duflo (* 25. Oktober 1972 in Paris) is en franzöösch-amerikaansch Ökonomin un Hochschullehrerin an dat Massachusetts Institute of Technology, wo se de Abdul-Latif-Jameel-Professur för Armotsbekämpen un Entwicklungsökonomie innehett. De Swoorpunkt vun hör Forschung liggt up mikroökonomischen Themen in Entwicklungslänner, dorünner dat Verhollen vun Huushollen, Bildungspolitik, Togang to Finanzdeenstleistungen, Gesundheitspolitik un de Bewertung vun wertschapspolitischer Maatnahmen.[1] Duflo hett up Tofall footen Feldexperimente to dat Beoordeelen vun politisch Maatnahmen maatgevend wieder entwickelt, bi de Minschen per Tofallsprinzip in Gruppen indeelt un licht verännert verscheeden Bedingungen utsett wurrn, um to erkennen, welker Politik welke Folgen hemm.[2]

The Economist hett hör 2008 to de acht inflootriekskten Ökonomen vun de Welt tellt.[3] Dat Magazin Time hett hör 2011 to de 100 inflootrieksten Personen vun de Welt tellt.[4] Hör Book Poor Economics wurr vun de Financial Times to dat Wertschapsbook vun dat Johr 2011 nömmt.[5]

De dormalige US-Präsident Barack Obama hett hör 2012 in den präsidentialen Beratungsraat för globale Entwicklung beropen. Hör Upgaav weer, den US-Präsidenten un hoochrangig Liddmaaten vun de Regeeren to beraaden.[6] Linke Kritiker schmieten hör vör, de Disziplineeren vun de arm Lüüd statt sellschopplich Verännern to vertreeden. De makroökonomischen un politisch-strukturellen Oorsaken vun de Armoot weern kien Gegenstand vun hör Analyse un se wull kien Umverdeelen vun de sellschopplichen Ressourcen togunsten vun de Armen.[7]

2019 kreeg se gemeensam mit Abhijit Vinayak Banerjee un Michael Robert Kremer as tweet Fru nah Elinor Ostrom (2009) un bither jüngste Priesdrägerin den Nobelpreis för Wertschapswetenschapen.[8]

Leven[ännern | Bornkood ännern]

Kindheit un Utbillen[ännern | Bornkood ännern]

Esther Duflo is de Dochter vun de Ärztin Violaine Duflo un den Mathematiker Michel Duflo. Se hett an de Grande école École normale supérieure studeert un hett hör Studium 1994 mit de Maîtrise in Geschichte un Volkswertschapslehre (VWL) afslooten. 1995 hett se hör Hööftstudium an de École des hautes études en sciences sociales (EHESS) mit en DEA in Volkswertschapslehre afslooten. Dornah is Duflo an dat Massachusetts Institute of Technology (MIT) wesselt un het dor 1999 mit de Dissertatschon Dree Essays in Empirischer Entwicklungsökonomie (Three Essays in Empirical Development Economics) hör Doktertitel kreegen.

Beroplich Werdegang[ännern | Bornkood ännern]

Nahdem se hör Doktertitel in Volkswertschapslehre kreegen harr wurr Duflo Assistant Professor för VWL an dat MIT, bevör se 2002 to’n Associate Professor un 2004 to en vullwertig Perfesser för VWL befördert wurr. Van 2001 bit 2002 lehr Duflo as Gastperfesserin an de Princeton University. 2003 hett se gemeensam mit Sendhil Mullainathan un Abhijit Vinayak Banerjee an dat MIT dat Poverty Action Lab grünnd, de sien Direktorin Duflo 2004 wurr. Dat Poverty Action Lab is en Forschungsnettwark, dat sück mit de Entwicklung vun nee Methoden to de Armotsbekämpen un de Bewertung vun wertschapspolitischen Maatnahmen dör randomiseerte kontrolleerte Feldexperimente befaat [9] un 2005 in Abdul Latif Jameel Poverty Action Lab umnömmt wurr. 2015 hemm dor mehr as 100 Wetenschapler arbeit.[10]

2005 kreeg Duflo de nee schafft Abdul-Latif-Jameel-Professur för Armotsbekämpen un Entwicklungsökonomie aan dat MIT. Neben hör Lehr- un Forschungsarbeit arbeitet se siet 2007 as Redakteurin för de wertschapswetenschapliche Facktietschriften Annual Review of Economics un The American Economic Journal: Applied Economics, wobi se Mitgrünnerin vun de letztere Publikatschoon is. Tovör weer Duflo redaktschonell för de Review of Economics and Statistics (2002–2007), dat Journal of Development Economics (2004–2006), dat Journal of Economic Perspectives (2004–2007) un dat Journal of the European Economic Association (2002–2006) tätig. 2019 wurr se mit den Nobelpries för Wertschapswetenschapen uttekent.

Forschung[ännern | Bornkood ännern]

Nah de wertschapswetenschapliche Publikatschonsdatenbank IDEAS hörrt Duflo in dat Gesamtranking düütlich to de best 1 % Ökonomen (Rang 110, Stand Oktober 2015).[11] Ok ünner Kriterien as „Antall an Publikatschonen“ oder „Antall an Zitaten“ hörrt Duflo to de best 5 % vun de in de Datenbank erfaaten Ökonomen. De an’n fakensten ziteert Artikel vun Duflo drocht den Titel How Much Should We Trust Differences-in-Differences Estimates (2002) un wurr tosommen mit Marianne Bertrand un Sendhil Mullainathan verfaat.[12] In dissen Artikel analyseeren Bertrand, Duflo un Mullainathan de Differenz-vun-Differenzen-Schätzung (DIDE), en Schätzmethood för Kausalbetrecken, un kommen to den sluss, dat de DvD-Ansatz in sien herkömmlichen Gebruuk den Standardfehler vun de schätzt Wirkung vun den ünnersöökten Ingreep düchtig ünnerschätzt. Um den Autokorrelatschoonsproblem to begegnen, hemm Bertrand, Duflo un Mullainathan absluutend dree Lösungsvörslääg maakt: en Tosommenfall vun de Daten in Tietrüüm vör un nah den Ingreep, den Gebruuk vun en speziellen Kovarianzmatrix oder en Anpassung vun de Randomiseerensinterferenz-Testmethoden.[13]

Duflo hör Institut hett Studien to Mikrokrediten in mehreren Lännern dörführt un funn, dat de Infloot völ minner weer, as faken annommen.[10] De Wetenschaplerin snackt sück dorför ut, in de Entwicklungshülp Nahwiesen för den Spood vun bestimmt Maatnahmen intofordern, bevör man disse in’n grooten Stil umsett.[10]

Ehrungen un Utteknungen[ännern | Bornkood ännern]

Privatleven[ännern | Bornkood ännern]

Esther Duflo hett sowohl de franzöösch Staatsbörgerschap as ok siet 2012 de vun de USA. Se is siet 2015 mit Abhijit Vinayak Banerjee verheiraadt[18], de ebenfalls Perfesser för Volkswertschapslehre is un mit den Duflo bi mehreren vun hör Forschungsarbeiten tosommenarbeit hett; se hemm twee gemeensam Kinner.[19]

Warken (Utwahl)[ännern | Bornkood ännern]

  • mit Rema Hanna: Monitoring works. Getting teachers to come to school. CEPR, London 2006.
  • mit Abhijit Vinayak Banerjee: Aging and death under a dollar a day. NBER, Cambridge, Mass. 2007.
  • mit Marianne Bertrand, Sendhil Mullainathan: How Much Should We Trust Differences-in-Differences Estimates, Quarterly Journal of Economics, Band 119, 2004, S. 249–275
  • Giving credit where it is due. In: The journal of economic perspectives. A journal of the AEA. Band 24 (2010), ISSN 0895-3309, S. 61–80.
  • Requiescat in pace? The consequences of high-priced funerals in South Africa. In: David A. Wise (Hrsg.): Explorations in the economics of aging. University Press, Chicago, Ill. 2011, ISBN 978-0-226-90337-8, S. 351–373.
  • mit Abhijit Vinayak Banerjee: Poor Economics. A Radical Rethinking of the Way to Fight Global Poverty. PublicAffairs, New York 2011, ISBN 978-1-58648-798-0.
  • Is decentralized iron fortification a feasible option to fight anemia among the poorest? In: David A. Wise (Hrsg.): Explorations in the economics of aging. University Press, Chicago, Ill. 2011, ISBN 978-0-226-90337-8, S. 317–344.
  • Interview vun de Zeit mit Banerjee un Duflo, 2011
  • mit Abhijit Vinayak Banerjee: Poor Economics. Barefoot Hedge-Fund Managers, DIY Doctors and the Surprising Truth about Life on Less than 1 $ a Day. Penguin Books, London 2012, ISBN 978-0-7181-9366-9.
  • Kampf gegen die Armut. Ut dat Franzöösche vun Andrea Hemminger. Suhrkamp Verlag, Berlin 2013. ISBN 978-3-518-29664-6.
  • mit Abhijit Vinayak Banerjee: Good Economics for Hard Times: Better Answers to Our Biggest Problems, Juggernaut Books, 12. November 2019. Themen: Einsichten aus der aktuellen ökonomischen Forschung zu breiten Themenfeldern wie Migration, Sozialhilfe, Umweltschutz, und Handel. Ein kurzer Teil beinhaltet auch ein Plädoyer für ein finanzierbares kleines Bedingungsloses Grundeinkommen (Universal Ultra Basic Income - UUBI) für Schwellen- und Entwicklungsländer am Beispiel Indien. ISBN 978-0-2413-0689-5.[20]

Weblinks[ännern | Bornkood ännern]

Esther Caroline Duflo. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. economics.mit.edu
  2. Wer wird Wirtschaftsnobelpreisträger? In: FAZ.net. 5. Oktober 2018, archiveert von dat Original am 6. Oktober 2018; afropen an’n 14. Oktober 2019.
  3. International bright young things. In: The Economist. 30. Dezember 2008.
  4. Rana Foroohar: The 2011 Time 100. Esther Duflo. In: Time. 21. April 2011, afropen an’n 17. Oktober 2012 (engelsch).
  5. Christine Mattauch: Wie Armut abgeschafft werden kann. In: Zeit-Online. 30. August 2012, afropen an’n 17. Oktober 2012.
  6. President Obama announces intent to appoint Esther Duflo to Global Development Council. MIT development economist nominated for presidential policy council. In: MIT news. Massachusetts Institute of Technology, 3. Januar 2013, afropen an’n 24. Dezember 2019.
  7. Gerhard Klas: Kampf gegen Armut? In: junge Welt. 22. Juli 2013.
  8. a b Esther Duflo. nobelprize.org. Afropen an’n 22. Dezember 2019.
  9. povertyactionlab.org
  10. a b c Pia Ratzesberger: ‚Ich bin nicht einfach zu schocken.‘ Esther Duflo gehört zu den einflussreichsten Ökonominnen und will die globale Armut bekämpfen - ihr eigener Wohlstand hat sie immer schon belastet. In: Süddeutsche Zeitung, Nr. 244, 23. Oktober 2015, S. 24.
  11. Gesamtranking vun de wertschapswetenschapliche Publikatschonsdatenbank IDEAS (engelsch)
  12. Autorenprofil vun Esther Duflo up IDEAS (engelsch)
  13. Marianne Bertrand, Esther Duflo, Sendhil Mullainathan (2004): Should We Trust Differences-in-Differences Estimates? (engelsch)
  14. Prix du meilleur jeune économiste 2005. lecercledeseconomistes.fr, 19. Mai 2005, afropen an’n 25. Dezember 2019 (franzöösch).
  15. Social Science Research Council: The Albert O. Hirschman Prize, 2014. Afropen an’n 25. Dezember 2019.
  16. Esther Duflo, Premio Princesa de Asturias de Ciencias Sociales; afropen an’n 25. Dezember 2019.
  17. ASK Social Science Award für Esther Duflo; afropen an’n 25. Dezember 2019.
  18. Soutik Biswas: The Nobel couple fighting poverty cliches. 15. Oktober 2019 (bbc.com [afropen an’n 30. November 2019]).
  19. John Gapper: Lunch with the FT: Esther Duflo. In: The Financial Times. 17. März 2011.
  20. Excerpt: Abhijit Banerjee and Esther Duflo on Which Kind of UBI Could Work in India (englisch), The Wire (India), 2019