Ernst von Rebeur-Paschwitz

Vun Wikipedia
Zur Navigation springen Zur Suche springen

Ernst Ludwig August von Rebeur-Paschwitz (* 9. August 1861 in Frankfort an de Oder; † 1. Oktober 1895 in Merseburg) weer en düütschen Astronom und Eerdphysiker.

Ernst von Rebeur-Paschwitz is as Söhn von en Assessor un later denn Präsidenten von de Regeeren opwussen. He hett na sien Abitur in Astronomie un Mathematik studeert – toeerst in Leipzig, naher in Genf un Berlin. 1883 möök he in Berlin sien Dokter mit de Arbeid „Über die Bewegung von Kometen in widerstehenden Medien“. Mehrstendeels hett he sik mit Kometen utenanner sett, de de Sünn nah kommt.

Dorna arbeid he an de Steernwachten in Berlin un in Karlsruhe, wo he mit dat Kieken na de Sünn befaat weer. 1888 müss he sien Assistentensteed aver opgeven, as he an Tuberkoloos leed. En Johr later künn he aver in Halle sien Habilitaschoon för dat Fach Astronomie warven. He is dorna för länger na Teneriffa gahn, wo he mit sien Kieken wieter maakt hett. Man sien Hapen, dat sien Gesundheit breter wart, hett keen Spood bröcht.

En Sworpunkt von sien Arbeiden weer de Verbetern von en Horizontalpennel, dat an sik för’t Meten von Ännern von de Lootrichten dör dat Inwirken von Himmelskörpers boet weer. Dorvon stünn een in Potsdam un een in Willemshoben, woneem Ernst von Rebeur-Paschwitz 1889 de Boddenbewegen von en Eerdbeven optekend hett, dat wiet weg in Japan passeert weer. Dat weer de eerste Opteken, de je von en Feernbeven maakt worrn is, so dat von Rebeur-Paschwitz hüüt as en Vadder von de modern Seismologie ankeken warrt. Dree Johr later hett he noch so en Feernbeven opteken kunnt, ditmal in Straßburg.

Trotz sien swore Tuberkoloos un sien Gesundheit, de jümmer slechter warrn de, künn he sien Ergevnisse noch publizeeren. De letzten Johren leev he in sien Öllernhuus, wo he bit to sien Dood plegt weer.

In’n Andieken an de Opdecken un Leisten von den Forscher, de bannig jung dootbleev, warrt von de Düütsche Eerdphysikalsche Sellschop (hdt.: Deutsche Geophysikalische Gesellschaft (DGG)) för rutragend wetenschopplich Leisten in de Eerdphysik de Rebeur-Paschwitz-Pries verlehnt.

Literatur[ännern | Bornkood ännern]

  • Das Horizontalpendel und seine Anwendung zur Beobachtung der absoluten und relativen Richtungsänderungen der Lothlinie, Nova Acta der Kais. Leop. Carol. Deutschen Akademie der Naturf., Bd. 60, Nr. 1, Halle 1892. (hoochdüütsch)
  • Horizontalpendel-Beobachtungen auf der Kaiserlichen Universitäts-Sternwarte zu Straßburg 1892-1894, Beitr. zur Geophysik, Bd II, Stuttgart, 1895. (hoochdüütsch)
  • Über den Kometen von 1882, Habilitationsschrift, Veröffentlichungen der Sternwarte zu Karlsruhe, Bd. 3, 1889. (hoochdüütsch)
  • Über das Zöllner'sche Horizontalpendel und neue Versuche mit demselben 1886, Verhandl. des naturwiss. Vereins zu Karlsruhe, 1888. (hoochdüütsch)
  • The Earthquake of Tokio 18. April 1889, Nature, Bd. 40, 1889. (engelsch)

Nettlenken/Borns[ännern | Bornkood ännern]