Ernesto Càstano

Ernesto Càstano (* 2. Mai 1939 in Cinisello Balsamo (MI), Italien; † 5. Januar 2023^[1]) weer en italieensch Footballspeler.

Càstano bill tosommen mit Giancarlo Bercellino in de 1960er Johren en legendäär Binnenverteidiger-Duo bi Juventus Turin.

Karriere[ännern | Bornkood ännern]

In’ Vereen[ännern | Bornkood ännern]

Ernesto Càstano fung sien Loopbahn bi den Vereen vun sien Heimatstadt, Balsamese, an. 1956 is he to de AC Legnano in de Serie B wesselt, wo he mit blots 17 Jahren all Stammspeler weer. In de folgen Saison speel he weer in de tweete Liga, ditmal bi de US Triestina.

1958 wurr he sluutend vun Juventus Turin ünner Verdrag nommen, för de he an’ 22. November 1958 gegen den AS Bari sien Serie-A-Debüt fiern kunn. Mit man jüst 20 Johren kunn he mit Juve in de Saison 1959/60 all den Gewinn vun sien eerst italieensch Meesterschap fiern. Bit 1962 weer Càstano meest blots Ersatzspeler, af de Saison 1962/63 wurr he denn Stammspeler in de Afwehr un bill tosommen mit Giancarlo Bercellino en legendäär Binnenverteidigung. Càstano hett insgesamt 335 Partien in’ Dress vun Juventus Turin maakt un hett dorbi twee Doren schaaten. He kunn dorbi jewiels dreemal de italieensch Meesterschap as ok de Coppa Italia winnen.

Ernesto Càstano hett sien aktiv Loopbahn 1971, in dat Öller vun 32 Johren bi Lanerossi Vicenza afslooten

In de Natschonalmannschap[ännern | Bornkood ännern]

Sien Debüt in de Natschonalmannschap vun Italien geev he an’ 29. November 1959 bi dat 1:1 in en Speel gegen de Mannschap vun Ungarn in Florenz.

Dornah trucken acht Johr in’t Land, bit he sien tweet Lännerspeel maken kunn. Liekers wurr he vun Ferruccio Valcareggi in den Kader vun de Squadra Azzurra för de Football-Europameesterschap 1968 in dat eegen Land beropen, stunn denn ok in dat Halffinale gegen de Mannschap vun de UdSSR un in dat eerste Finalspeel gegen de Mannschap vun Jugoslawien up den Platz un wurr sluutend Europameester.

Sien letzt vun alltohoop söben Lännerspelen för Italien hatt Càstano an 29. März 1969 bi dat 2:2 gegen de Mannschap vun de DDR in Berlin maakt.