Een-Welt-Kark

Vun Wikipedia
Zur Navigation springen Zur Suche springen
Een-Welt-Kark in Snevern
Een-Eer-Altar in de Kark

De Een-Welt-Kark is de Kark von de evangeelsch-luthersche Markus-Karkengemeen in Snevern. Se liggt an de Ernst-Dax-Straat 8 in’n Süüdoosten von Snevern un höört to’n Karkenkreis Rodenborg in’n Sprengel Stood von de Evangeelsch-luthersche Landskark Hannover. Dat Kaspel besteiht ut de Delen von Snevern, de op de Oostsied von de Heidbahn liggen doot. In düt Rebeed leevt üm un bi 3500 Minschen, von de 2650 Maat in de evangeelsche Kark sünd.

Historie[ännern | Bornkood ännern]

Snevern hett fröher kumplett to dat Kaspel von de Sneverner Peter-un-Paul-Kark höört. In dat 20. Johrhunnert is de Oort aver gau wussen. 1959 hett dat de eersten Plaans geven, in Snevern en twete Kark to boon. Dat Grundstück an de Ernst-Dax-Straat is denn in’n August 1962 köfft worrn. De Karkengemeen hett dor aver blots en Gemeenhuus op boot, in dat denn ok Goddsdeensten fiert worrn sünd.

De Kark is eerst 1999 in’n Rahmen von en dezentraal Projekt von de Expo 2000 in Holtbowies boot worrn. Geld dorto geven hebbt to 50 % de Düütsche Bundsstiftung Ümwelt un de Neddersassische Ümweltstiftung, to 33 % de Kark un to 10 % de Expo 2000. Richtfest weer an’n 22. Oktober 1999. Binnen de Een-Welt-Kark liggt de Een-Eerd-Altar. In em sünd en ganze Reeg Eerd- un Sandproben ut de ganze Welt sammelt, de von Spenners kemen. De Behöllers, in de de Sand un Eer opbewohrt warrt, warrt „Böker“ nöömt. Düsse Böker sünd nummereert un in en List opföhrt, so dat to elk Book ok de Sammeloort weddertofinnen is.

Karkengebüüd[ännern | Bornkood ännern]

As Bostoff för de Kark is vör allen Holt bruukt worrn. Dat Balkenwark besteiht ut Füchtenholt mit Stahlverspannungen. Wannen un Dack bestaht buten ut Ekenholt un binnen ut Fuhrenholt. Twüschen de Buten- un de Binnenwand is en Warmsdämmung un en Sparr gegen Fuchtigkeit. De Wannen sünd in Breddstapelbowies boot. Fuhrenstämm billt de griese Toornspitz. De ut Boomstämm sneden Breder un Bahlen sünd to Wandelementen tohoopföögt, mit en Kraan pielliek opstellt in dat Holtrahmengerüst insett un to en slaten Wand verbunnen. Düt Boprinzip is op een von de veer Finsterbiller, de sik an de Sied blangen den Ingang von de Kark finnt, schematisch dorstellt. Dat Holt stammt ut noodwennige Dörforstungen in Forsten ut de Region. De Fuhren ut dat Forstamt Sellhorn (Landkreis Heidkreis) un de Eek ut dat Forstamt Harsfeld (Landkreis Stood). Rund 600 Kubikmeter Holt sünd in Saagwarken un Timmermannsbedrieven in de Region verarbeidt worrn. Dat Holt von de Wannen is unbehannelt.

Pastoorn[ännern | Bornkood ännern]

  • opstunns (Stand 2018): Frank Hasselberg

Weblenken[ännern | Bornkood ännern]

Commons-logo.svg Een-Welt-Kark. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 7′ N, 9° 49′ O