Dotan (Singer)

Vun Wikipedia
Zur Navigation springen Zur Suche springen

Dotan (börgerlich Naam Dotan Harpenau; * 26. Oktober 1986 in Jerusalem) is en nedderlannsch Singer-Songwriter. In sien Heimatland harr he temelk kommerziellen Spood, mit sien tweet Album 7 Layers fung sien internatschonale Karriere an. Sien Musik wurrd as vun den Folk beinfloot Popmusik beschreeven.

Leven[ännern | Bornkood ännern]

Dotan wurr 1986 in Jerusalem boren,[1] sien Vader weer Israeli, sien Moder stamm ut de Nedderlannen. Nahdem sück de Öllern trennt harrn, is Dotan bi sien Moder in Amsterdam upwussen. Bi sien Besöök bi sien Vader in Israel hett he Hebrääsch lehrt. As Teenager hett he sück dat Gitarr-Spelen sülvst bibrocht. Enn' vun de 2000er Johren hett he eenig Demoupnahmen an verscheeden Musikproduzenten schickt, wat hüm toletzt to en Verdrag mit EMI führen dee. 2010 geev he sien Job up un hett sien Studium ahn Afsluss afbraken, um as Musiker to arbeiten.[2] Sien Debütalbum Dream Parade keem 2011 herut un reck Platz 55 vun de nedderlannsch Albumcharts. Mit de Single This Town reck Dotan Platz 29 vun de Nederlandse Top 40.

Um tegen sien Lampenfever antogahn, hett Dotan beslooten, lütt Privatkonzerte to geven. He hett denn en Uproop över sien Siet bi Facebook instellt[2] un geev so tallriek Konzerte in privaten Wahnzimmern, up Huusbööt oder up Buernhööf. He is in dat Vörprogramm vun Gavin DeGraw un Sinéad O’Connor uptreeden un broch Anfang 2014 sien tweet Album 7 Layers bi Universal Music herut. Dat hull sück siet 57 Week in de nedderlannsch Albumcharts bevör dat in März 2015 sogor up Platz 1 keem. In' Mai 2015 keem dat Album ok in Düütschland herut.

Enkeld Nahwiesen[ännern | Bornkood ännern]

  1. [1]Dotan. Zu Gast im radioeins Studio, Herutgever Radio Eins, 24 November 2014, afropen an' 25. Juni 2015
  2. a b [2] Matthes Köppinghoff: Dotan: Endlich angekommen, Herutgever NDR2 van' 9. März 2015, afropen an' 25. Juni 2015

Weblenken[ännern | Bornkood ännern]