Diskuschoon:Bargen

Vun Wikipedia
Zur Navigation springen Zur Suche springen

Ik meen, dat Barg un Bargen twee verschedene Saken dorstellt. Dat een is "Berg", dat annere mehr "Gebirge", also mehrere Bargen, de tosamen en Region billt. --196.38.64.208 12:54, 16. Jan. 2009 (CET)

Bargen as Grupp dee ik ünner Bargkeed afhanneln. Wi köönt hier geern noch extra en Lenk op Bargkeed setten, aver dat zentrale Lemma för "Bargen" is Barg. Is ja man anners nix as de Mehrtall. --::Slomox:: >< 14:47, 16. Jan. 2009 (CET)
Dat stimmt ut geoloogsche Sicht so nich. Bargkeed geiht dorför nich. Dat is, as de Begreep al seggt, en Keed vun Bargen, neemlich de Sünnerfall vun en Folg vun Bargen, de in een Reeg staht. Un Gebirge is nich eenfach blots de Mehrtall vun Barg, man dat sünd Bargen, de en gemeensomen Oorsprung un en Struktur hebbt, de tosamenhangt. In den Sinn hett Bargen en egenstännige Bedüden. --Iwoelbern 07:14, 17. Jan. 2009 (CET)
Aver kiek di mal de Interwikis op de:Gebirge an. Twölf Stück. Temlich wenig. pl geit direkt na Barg, is also ganz verkehrt. da, en, sv gaht na Bargkeed. es un pt gaht na Kordilleer, wat to Bargkeed tohöört. et hett Mäestik, wat to Mägi (Barg) höört. Ik kann de Form nich bestimmen, aver ik nehm an, dat is ok wedder Bargkeed. Op jeden Fall wiest de:Gebirgszug (dor wiest de Redirect de:Bergkette hen) ok wedder op et:Mäestik. ko hett 산맥, wat Bargader heten deit, also ok wedder en Synonym to Bargkeed. zh hett 山脉. 山 is de Barg un 脉 is en Form von Meridian (in de chineesche Medizin), is also mit ko to verglieken. ja bruukt densülven Utdruck as zh. Blifft alleen noch nl. nl hett gebergte. Gebirge is also en Konzept dat se narms buten de Spraken Düütsch un Nedderlandsch kennt.
Fröher geev dat dat ok op Platt, ooldsassisch harrn wi gibirg, Schiller-Lübben hett sien Indrag ünner gebergete, geberchte. nds-nl bruukt de Wöör gebaargte un gebargte an dree Steden. Aver bi uns is dat Woord utstorven. Tominnst heff ik nix funnen, wat wat anners andüden dee. An de Steed, an de de Hoochdüütsche Gebirge seggt, seggt de Plattdüütsche faken Bargen. Wir fahren ins Gebirge is op Platt Wi föhrt in de Bargen. Aver dat deit ja nich gliek bedüden, dat dat en egen Konzept is (de Engelsche seggt ok We spend our holidays in the mountains ahn dat mountains en egen Konzept is). Dat Konzept Gebirge is en düütsch-nedderlandsch Unikum.
Wenn wi dat liekers utdrücken wüllt, denn dee ik as Lemma Barggrupp oder Bargland vörslaan. Dücht mi op jeden Fall beter as dat allgemene Bargen. --::Slomox:: >< 13:28, 17. Jan. 2009 (CET)
Wenn ik mi noch even inmengeln dröff: Ik meen, wi schöllt Bargen nehmen. So warrt dat bi us bruukt, as du ja ok süms schriffst: Wi fohrt na de Bargen. En Bargrupp is en sünnerliche Grupp vun Bargen (t.B. de Rosengaarn in de Dolomiten). Un en Bargland is ok wat anners. So wat as en Unnerdeel vun de Bargen. So kann dat in den Kaukasus dart een oder annere Bargland geven (Dat Bargland vun Zentral-Armenien oder sowat in de Aart...)--Bolingbroke 13:42, 17. Jan. 2009 (CET)
Jo, so bruuk ik dat ok jümmer: "De sünd in de Bargen to'n Skilopen". Ik seh dat jüst so: Bargland künn ik mi noch an Ehsten vörstellen, is aver ok en Begreep, de sien egen Bedüden hett. Nicht so dull as Bargkeed oder Barggrupp. Ik bün dor villicht 'n beten pingelig ok - de meisten Lüdd warrt dor al so keen Ünnerscheed maken, aver wi maakt jo en Nakieksel, dor schüll dat schon akkeraat uteneen friemelt warrn. --Iwoelbern 13:56, 17. Jan. 2009 (CET)
Okay, denn maal anners: Op wat för'n engelschen Artikel schall de Interwiki bi dissen Artikel denn wiesen? --::Slomox:: >< 17:33, 17. Jan. 2009 (CET)
Wat hett dat mit uns to doon? Siet wann leegt wi denn dat Lemma na den engelsche Artikel fast? Dor steiht jo nu ok faken Tüdelkram binnen. Wenn de dor meent, dat se de ünnerscheedlichen Bedüden nich ordig opdelen wüllt, denn mööt de dat woll so maken. Aver to dien Fraag: So, as sik dat to Tiet wiest, op gor keen. De Artikel Mountain geiht nich dorop in, dat Bargen, de tosamenhangt un en geoloogsche Formatschoon billt, mehr sünd, as blots de Mehrtall vun Barg. --Iwoelbern 17:54, 17. Jan. 2009 (CET)
Wenn ik dissen Opsatz Glöven schenken dröff, denn is Engelsch ok in de Geologie de vörrangige Wetenschopsspraak. Un liekers hett Engelsch keen Woord för Gebirge. So ganz kann ik also nich glöven, dat Gebirge en wichtig geoloogsch Konzept is.
Wenn du nu meenst, wi kaamt nich ahn en Artikel ut, mientwegen, schriev em. Ik warr em nich wegsmieten. Aver nödig is he nich. --::Slomox:: >< 20:31, 17. Jan. 2009 (CET)
Un dat schall een nu verstahn künnen? An annere Steden seggst Du, wi mööt dorför enkelte Artikels hebben, bi de enkelte Öörd in Gemenen t.B. und letzt hest Du sogor för en hüütigen Oortsdeel, vun den du annimmst, dat he mol sülvststännig weer, meent dat mutt en egen Artikel warrn. Un an disse Steed is dat nu nich anseggt, blots wiel de Engelschen dorför keen egen Woort hebbt? "Gebirge" warrt in’t engelsche mit mountains angeven, jüst so as in plattdüütsch de Bargen. Ach, wat diskuteer ik egentlich... --Iwoelbern 20:47, 17. Jan. 2009 (CET)
In de:Gebirge un in nl:Gebergte steit narms en klore Definition in. Wat is denn nu egentlich en Gebirge? Bi'n düütschen Artikel gifft dat to'n Bispeel en feinen Afsnidd över de Ausmaße von Gebirgen:
Der längste oberirdische Gebirgszug der Erde wird von Anden und Rocky Mountains gebildet und reicht etwa 15.000 km von Alaska im Norden bis nach Feuerland im Süden. Man nennt ihn amerikanische Kordilleren. Auch die Gebirge Eurasiens bilden eine ähnlich lange, allerdings stark gegliederte Gebirgskette, weil sie fast gleichzeitig durch die alpidische Geodynamik entstanden sind.
Gebirgszug un Gebirgskette warrt dor opmal as Synonym to Gebirge bruukt.
De Ünnerscheed to de Dörper is, dat de Dörper dor sünd, dat weet ik gewiss. Bi de Gebirge twievel ik eben, dat de en egen Konzept dorstellt. Wenn du de Definition von Gebirge kennst, de dat düüdlich von annere Konzepte ünnerscheden deit, denn schriev ehr man in en Artikel op, denn hebbt wi tominnst de Düütschen un Nedderlandschen wat vörut. --::Slomox:: >< 22:37, 17. Jan. 2009 (CET)
Mi is ok noch keen klore Definitschoon över'n Weg lopen. Wohrschienlich is sogor, dat Geologen, Geomorphologen, Geografen und normale Lüüd dorünner ünnerscheedliche Saken verstaht. Aver ik warrt mol in mien Böker kieken, wat dorbinnen steiht. Fakt is eerstmol, dat en Gebirge en gemeensome Entwicklungshistorie hett. Ik behaupt mol, dat man dat hierarchisch indelen kann: Barg - Bargkeed/Barggrupp - Bargen - Orogen. Dat Orogen is denn noch mal wat grötter faat un stellt Bargrebeden dor, de dör den glieken tektonischen Vörgang in de Eerdhistorie tostanen kamen sünd. To'n Bispeel ümfaat dat Variszikum de meisten düütschen Middelbargen (Deister, Solling, Elm, Taunus, Röhn, Hunsrück uvm.) De Gebirge sünd opletzt keen geoloogsch Kunzept, man dat Resultat vun geoloogsche Vörgäng, tomeist mit vulkaansch oder tektonische Oorsaak. In'n Gegensatz dorto gifft dat ok Bargen, de keen Gebirge billt: De Hawaii-Emperor-Bargkeed is so een. Annere Bispelen hebbt wi op Kap Verde mit de Tügenbargen, de fröher mol Vulkansloten wesen sünd, aver keen gemeensomen Sockel hebbt. --Iwoelbern 11:31, 18. Jan. 2009 (CET)
Mittelgebirge sünd ok wedder so'n Begreep, den dat blot in Düütschland un de Nedderlannen gifft. De düütsche Artikel hett en Överschrift Mittelgebirge in Mitteleuropa. Dor segg ik: Fein, gifft dat denn ok Mittelgebirge buten Middeleuropa? Heff ik noch nix von höört.
De Nedderlandschen kennt sogor noch Nedderbargen, en laaggebergte. Wenn een bi Google Böker kickt, denn hett dat dat ok in Düütschland fröher geven, in't 19. Johrhunnert, is aver woll ut'e Mood kamen. De 108 Sieden bi Google, de een noch to Niedergebirge finnen deit, de faat dat vör allen as Spaaßbegreep op: Ein Lüneburger Geologe hat die Heide sogar als „norddeutsches Niedergebirge" gerühmt — verzeihliche Übertreibung des Heimatbesessenen. To siene Tied hett de Lümbörger Geoloog dat gewiss eernst meent. --::Slomox:: >< 16:39, 18. Jan. 2009 (CET)
De 'Mittelgebirge' gifft dat blots in Düütschland. Dat is en Sammelbegreep för de Bargen, de wiel dat variszische Orogen tostannen kamen sünd - dat heff ik doch baven jüst vertellt. Annerswo gifft dat den Utdruck nich. Ik fraag mi blots langsom, worüm dat hier egentlich geiht! Mi güng dat üm den Begreep, den wi för Gebirge bruken wüllt, un üm nix anners. Wenn Du nu aver en Problem dormit hest, dat Fachliche to glöven, denn kann ik di ok nich helpen. Ik heff tomindst keen Lust, hier en Fachdiskusschoon to föhren, dat heff ik in Alldag al noog... --Iwoelbern 17:03, 18. Jan. 2009 (CET)
Dat geit dor üm: Is Bargen en fasten Utdruck, de mehr bedüden deit as de Mehrtall von Barg. Ik segg 'nee', un du seggst, wenn ik nich allen verkehrt verstahn heff, 'doch, dat bedüüdt (blangen de Mehrtall von Barg) as fasten Utdruck ok noch datsülve as hoochdüütsch Gebirge'. --::Slomox:: >< 19:16, 18. Jan. 2009 (CET)
Naja, ik weet nich, ob dat noch'n annern Utdruck gifft. Wenn dat en anner't Woort gifft för Gebirge, schall mi dat recht wesen. To Noot kann een dat ok as Frömdwoort öbernehmen. Ik harr aver den Indruck, as wenn Du in'n Grundsatz Twievel doran hest, dat en "Gebirge" mehr bedüüdt as de reine Mehrtall vun Barg. --Iwoelbern 19:26, 18. Jan. 2009 (CET)
Gebirge is mehr as Mehrtall von Berg, aver ik twievel dor an, dat wi to Gebirge en plattdüütsch Synonym hebbt. Un wenn wi keen Synonym hebbt un dat op de annere Sied ok keen Begreep is ahn den keen Utkamen is, denn, meen ik, bruukt wi op Platt gorkeen Artikel to Gebirge.
Mit Begreep ahn den keen Utkamen is meen ik, dat en Spraak, de keen Woord för Quanten hett, nich över Quantenphysik schrieven oder snacken kann. En Spraak, de keen Woord för Syntax hett, kann nich över Syntax schrieven un snacken. Wöör för disse Saken sünd nödig, wenn een över disse Saken snacken will. Ahn disse Wöör is keen Utkamen. Op de annere Sied kaamt aver so temlich all Spraken von de Welt ahn en extra Woord för Gebirge ut. Dor is also en good Utkamen ahn dit Woord.
Kiek di to'n Bispeel mal de:Grün und blau in verschiedenen Sprachen an. Russ'sch hett twee verschedene Wöör för Blau. Een för Dunkelblau un een för Hellblau. För uns sünd Dunkel- un Hellblau blot twee verschedene Formen von Blau. As Plattdüütschen kannst du seggen: Hellblau is ok Blau. un de Lüüd warrt di all recht geven. Wenn du dat aver to en Russen seggst, denn höört sik dat för em verkehrt an. Jüst as wenn di een seggen dee: Gröön is doch ok en Form von Blau. Dat sünd twee verschedene Sichten op de Welt. För de Hoochdüütschen is dat Gebirge dat wat för de Russen dat twete Blau is. Ut de Sicht von de Hoochdüütschen is dat ganz selbstverständlich, dat en Gebirge en egen Saak is, de so ähnlich is as en Bergkette oder en Gebirgsgruppe, aver nich ganz dat sülve. Ut de Sicht von Lüüd, de keen egen Woord för Gebirge hebbt, is disse Ünnerscheed en beten gediegen, jüst as wi de Russen mit jemehr twee Blaus oder de olen Greken, de Honnig un Gras all beid för chloros utgeevt, för en beten mallerig hollen doot.
Dat Farvenspektrum is eendimensional un hett keen Stopen un elkeen Kultur pickt sik dor sien egen 'Fixpunkte' rut. Un jüstso is dat mit dat Begreepsspektrum för topograafsche Strukturn. Blot dat de noch veel mehr Dimensionen hett as blot een. De Lüüd hier bi uns hebbt fröher to de lütten Sandhümpels, de ut de flache Masch rutkeken, Bargen to seggt. Ok wenn de blot een Meter över NN legen hebbt. De Alpenbewahners höögt sik dor een över af. Dat sünd gewisse Mental Maps, hett ok mit Sapir-Whorf to doon. --::Slomox:: >< 01:05, 19. Jan. 2009 (CET)
Ah, nu verstah ik, wo dat Problem liggt. Segg dat doch gliek...! :-)
Denn sünd wi uns jo meist al eenig. Ein Synonym gifft dat op platt nich. Bi uns to Huus warrt halt seggt in de Bargen föhren, jüst so, als dat op engelsch ok utdrückt warrt. Wenn dat bit nu in een Artikel vörkamen is, denn heff ik dat ok so översett (Bispeel: "Fichtelgebirge" --> "Fichtelbargen"). Ik denk, dor snackt ok nix gegen. Nu bün ik liekers de Ansicht, dat dat to dat Phänomen "Gebirge" ok en Artikel geven schüll. Dat gifft Saken, de in den Tosamenhang staht, as t.B. Isostasie (dat Insacken vun de Eerdköst in'n Eerdmantel vun wegen dat Gewicht), dat Opfalten vun hoge Bargen dör Kollision usw. Woans de Artikel nu heten künn, is en annere Saak, över de wi noch wieter diskuteeren künnt/mööt. Bargmassiv weer villicht en Alternative. En annere Mööglichkeit weer ok noch, dat Thema in den Artikel Barg mitaftohanneln. Dat schient woll dat to wesen, wat du an'n leefsten maken deest. De Lösen finn ik aver nich so elegant. --Iwoelbern 09:12, 19. Jan. 2009 (CET)