Deern vun Windeby

Vun Wikipedia
De Keerl vun Windeby

De Deern vun Windeby is ene Moorliek, de 1952 bi’t Törfsteken in’t Domslandmoor bi Windeby in Sleswig-Holsteen opfunnen worrn is. Dör de Radiokarbonmethood warrt de Liek op de Tiet vun 41 bet 118 n. Chr. taxeert.

Wegen den fienen Körperbo hebbt se de Moorliek Deern vun Windeby nöömt. Eerst later hett Heather Gill-Robinson dör ene Arvgood-Analyys rutkregen, dat de Deern en jungen Keerl vun üm un bi 16 Johren weer. Op Röntgenopnahmen weren Harris-Lienen to sehn, de dor op henwiest, dat de Jung faken nich noog to eten kregen harr. Todem harr he en swore Infekschoon an’n Keev. De Liek hett dat Hoor rechts op’n Kopp veer Zentimeter lang, links aver kahl scheert. Se dreeg en Band üm’n Kopp, dat toeerst för ene Ogenbinn holen worrn is, hüüt aver ehrder as afrutscht Koppband ansehn warrt. Dat keem toeerst de Idee op, dat de Deern för untro wesen de Doodsstraaf kregen harr un dat se ehr denn in Unehr in’t Moor smeten hebbt. Een Indiz schull ok de Hand wesen, bi de de Dumen twischen Wies- un Middelfinger steken dee. Dat schull en Gest wesen, de för Unehr stünn. Doch denn keem rut, dat de Dumen eerst bi’n Transport 1952 twischen de Fingers steken worrn is. Un mit de Arvgood-Analyys keem rut, dat disse Idee woll gänzlichen Tüdelkraam is.

Hüüt liggt de Moorliek in dat Sleswig-Holsteensche Landsmuseum op Slott Gottorp.