Campbellaante

Vun Wikipedia
Zur Navigation springen Zur Suche springen
Campbellaant(e);

Campbellteeling

Campbellaanten, lunks twee Seken, rechts twee Waarten
Systematik
Ünnerstamm: Warveldeerten (Vertebrata)
Klass: Vagels (Aves)
Ornen: Gösevagels (Anseriformes)
Familie: Aantenvagels (Anatidae)
Ünnerfamilie: Echte Aanten (Anatinae)
Tribus: Swemmaanten
Geslecht: Aanten an sik
Oort: Campbellaante
Wetenschoplich Naam
Anas nesiotis
J.H. Fleming, 1935
Kaart mit Neeseeland siene Süüdspitz un allerhand Eilannen, unner annern de Campbell-Inseln
Dent Island, dat leste Tohuse for den Campbellteeling
Planten vun de Campbell-Insel
Klimadiagramm vun de Campbell-Inseln

De Campbellaante oder Campbellteeling (Anas nesiotis) is en Aantenvagel un warrt to de Swemmaanten torekent. Dor höört he nu wedder to de Aanten an sik mit to. Se kann nich flegen. Lange Tied harr dat so utsehn, as weer düsse Aantenaart utstorven, man 1975 düker se unverwacht up Dent Island wedder up. Jummers noch tellt se to de roorsten Aantenvagels up'e Eer. De IUCN seggt in ehre Rode List, de Aante weer in Gefohr, ut to starven (critically endangered).

Kennteken[ännern | Bornkood ännern]

De Campellaante is en lüttje, dunkerbrune Aante. Se hett sunnerlich korte Flunken. Vergleken mit twee verwandte Aarden, de Neeseelandaante un de Aucklandaante is se lüttjer un dunkerer.[1]Waart un Aante verscheelt sik. In ehr Smuckkleed seht de Waarten liek ut, as bi de Aucklandaante, man lüttjer un dunkerer. In ehr Slichtkleed slaht se na de Seken. Dor fehlt de gröne Glimmer vun de Feddern wiethen.[2]

Wo se vorkamen deit[ännern | Bornkood ännern]

De Campbellteeling is alleen man up de Campbell-Inseln tohuse. Dor hannelt sik dat um en subantarktische Inselgrupp in'n süüdlichen Pazifik bi, de to Neeseeland mit tohören deit. Düsse Inselgrupp besteiht ut de Hööftinsel mit sülvigen Naam, dat is de Campbell-Insel, un en Reeg vun lüttjere Inseln, dormank de Dent-Insel. Annahmen warrt, datt de Aante vörmols up all Eilannen leevt hett, de to düsse Inselgrupp tohören doot. Man bewiesen kann man dat nich. Up de Hööftinsel is de Aart utstorven, nadem in dat Johr 1810 Saalhundjägers dor henkamen weern un ut Versehn Rotten insleept harrn. Düsse Rotten hefft de Vagels bannig in Gefohr brocht, vunwegen datt de nich flegen konnen. Vun 1944 af an is annahmen wurrn, de Aanten weern utstorven, bit se denn up Dent-Island 1975 tofällig wedderfunnen wurrn sünd. Gegen Enne vun dat 20. Johrhunnrt hett dat man bloß noch bannig wenig Campbellaanten geven. Up Dent-Island weern dat man noch 60-100 Vagels. Bloß 25 Paare bröden dormols up düt lüttje Eiland, wat bi dree Kilometers in'n Westen vun de Campbell-Insel ehre Küste liggen deit un bi 23 Hektar groot is. Se harrn over en Tied vun tominnst 150 Johre alleen man up düsse Insel overleevt.

Bestand[ännern | Bornkood ännern]

De Bestand an Wannerrotten up de Hööftinsel is up um un bi 1 Mio. Deerter taxeert wurrn. Vundeswegen weern de Aanten dor utstorven, man up dat Dent-Eiland weern de Rotten nich henkamen. De Behörde for Naturschuul in Neeseeland woll de Campbellaante nich unnergahn laten un hett vundeswegen anfungen, ehr in en Tuchtpogramm wedder up'e Been to bringen. 1999 hett dat 52 Campbellteelinge in düsse Tuchtgruppe geven. Se stammen all vun 11 Aanten af, de up dat Dent-Eiland infungen wurrn weern. 2001 hett dat klappt un de Wannerrotten, de up dat Campbell-Eiland insleept wurrn weern, sünd heel un deel utrott' wurrn. In'n Määrt 2003 is verklaart wurrn, de Insel weer nu rottenfree. Dor sünd denn in'n September 2004 50 Campbellteelinge up düt Eiland utwildert wurrn. Dor kemen denn in'n September 2005 noch mol 55 Campbellaanten to. So, as dat utseeg, hefft de meisten Aanten, de 2004 utsett wurrn weern, dat erste Johr up dat Campbell-Eiland overleevt. Tohopen mit de Aanten, de vun Minschen holen weert, liggt de Bestand vun düssen Teeling midderwielen wedder bi mehr as 200 Stück.

Wie de Campbellaante leven deit[ännern | Bornkood ännern]

Dor is man minne vun bekannt, wie de Campbellaanten in Freeheit leven doot. Ok wat se freten doot, is unbekannt. Wohrschienlich hoolt se sik an Flohkreefte un Insekten. De Campbellaanten, de vun Minschen holen weert, bröödt twuschen Oktober- un Januarmaand. All dree Dage warrt een Ei leggt. De Schillen sünd blassbruun. In'n Döörsnitt leggt de Aante 3,8 Eier un brott dor 30-34 Dage up. Utwussen sünd junge Campbellaanten in'n Döörsnitt na 63 Dage.

Literatur[ännern | Bornkood ännern]

  • P. J. Higgins (Rutg): Handbook of Australian, New Zealand & Antarctic Birds, Band 1, Ratites to Ducks, Oxford University Press, Oxford 1990, ISBN 0-19-553068-3
  • Janet Kear (Rutg): Ducks, Geese and Swans. Oxford University Press, Oxford 2005. ISBN 0-19-854645-9
  • Hartmut Kolbe: Die Entenvögel der Welt. Ulmer, Stuttgart 1999. ISBN 3-8001-7442-1

Weblenken[ännern | Bornkood ännern]

  • [[[:Vörlaag:BirdLifeSpecies]] Birdlife Fact Sheet over de Campbellaante.] afropen an'n 14. Februar 2009
  • Campbell-Island afropen an'n 14. Februar 2009 (Terra natura, engelsch)

Belege[ännern | Bornkood ännern]

  1. Higgins, S. 1300
  2. Kear, S. 581, 582.

Kiek ok bi[ännern | Bornkood ännern]