Bremer Swiez

Vun Wikipedia
(wiederwiest vun Bremer Schweiz)
Zur Navigation springen Zur Suche springen
Koort von dat Rebeed von de Bremer Swiez

De Bremer Swiez is en Landschop, de in de noordwestlichen Stadtdelen von Bremen un in’n Süüdwesten von’n Landkreis Oosterholt liggt. Dat is en Geestrebeed an’n Westrand von de Oosterholter Geest. Anners as de sieden Rebeden ümto, de faken Masch un Moor sünd, besteiht de Bremer Swiez ut siede Bargen, de bet op üm un bi 30 Meter över NN reckt.

De Naam is in dat 19. Johrhunnert präägt worrn, as vele Lüüd ut Bremen Utflöög in de Ümgegend von Schöönbeek maakt hebbt, üm de Landschop to geneten. De öllsten Nawiesen stammt ut en Breef von Friedrich Engels an siene Süster Marie von 1839 un ut Friedrich Köster sien Alterthümer, Geschichten und Sagen der Herzogthümer Bremen und Verden von 1856. Dor schrifft Köster den Naam dat Daal von de Schöönbeker Au to. En ganze Reeg Landschoppen hebbt över de Tied Naams mit Swiez kregen, von wegen dat se en intressante Landschop mit vele Bargen hebbt. Mit de Tied is dat Rebeed an’n Süüdrand von de Geest jümmer mehr toboot worrn un de Utdruck hett sik bilütten ok op de Rebeden mehr in’n Noorden utdehnt, de noch mehr Natur baden hebbt.

De Grenzen sünd nich fastleggt. De faste Karn is dat Rebeed üm Schöönbeek, de Butengrenzen warrt von de Akschoonsgemeenschop Bremer Swiez angeven mit de Landsstraat 135 (fröher Deel von de Bundsstraat 6) in’n Oosten bet na de Holt- un Heidrebeden von de Lange Heid, Schmidt sien Föhren un Düngel in’n Noorden, de Maschkant na Oosterstood in’n Westen un de Werser un Lesum in’n Süden.

1974 weer dat för korte Tied plaant, dat bi Löhnhorst en ne’e Autobahn von de Autobahn 27 (de to de Tied ok blots plaant weer) afgahn schull, de denn na Süden un över de Lesum röver geiht. Dor hett sik en Börgerinitiativ gegen billt. Nadem de Plaan denn fullen laten worrn is, hett sik 1975 ut de Börgerinitiativ en Vereen billt, de sik för dat Wohren von de Landschop in de Bremer Swiez insetten wull. Dat weer de Akschoonsgemeenschop Bremer Swiez.

Weblenken[ännern | Bornkood ännern]