Bosselbeek

Wapen/Flagg	Koort
Basisdaten
Bundsland: Hamborg Bezirk: Horborg Stadtdeel: Heimfeld
Inwahners:
Postleettall:	21079
Vörwahl:	040
Geograafsche Laag:	53° 28′ N, 9° 56′ O

Luftbild von de Siedlung Bosselbeek

Waterwark Bosselbeek

Bosselbeek (hoochdüütsch Bostelbek) is en Siedlung in’n Stadtdeel Heimfeld, Bezirk Horborg, Hamborg.

Geografie

Bosselbeek liggt an’n Rand von de Haak un dat Holt Bossel von de Horbörger Bargen na Randmoor (Förstenmoor) un Maschen an de Süderelv.

Bosselbeek liggt in’n Noordwesten von dat Rebeed von’n Stadtdeel Heimfeld. Na Noorden to liggt de Stadtdeel Moorborg un na Westen to de Stadtdeel Huusbrook.

De Oort warrt na Westen hen afgrenzt dör de Autobahn 7, na Süden dör de Bundsstraat 73 un na Noordoosten dör de Industrieanlagen von de Seehavens 1 bet 4 un de Holborn Europa Raffinerie.

Historie

Bosselbeek hett sien Naam na en olen Beek, de von de Haak langs de Iesenbahnlien na Oosten flütt un denn in de Moorwettern münnt. De Beek is ut dat Holt Bossel in dat Förstenmoor flaten. Lüüd hebbt dor fröher nich leevt. In dat Rebeed stünn vör allen Ellerholt. Later is dat Moorland raadt worrn un is as Raaland von de Lüüd in Eißendörp un Heimfeld för Weiden bruukt worrn.

Eerst in dat 20. Johrhunnert sünd de eersten Hüüs in dat Rebeed von Bosselbeek boot worrn. Disse Hüüs stünnen an de Buxthuer Schossee, de in de Tied 1836 bet 1838 anleggt worrn is (vondaag B 73). Dat Rebeed hett fröher to Eißendörp höört. Eißendörp is an’n 1. April 1910 Deel von Horborg worrn.

Bilütten hebbt sik Utflugslokaals för Utflüglers ansiedelt un ok de eersten Industriewarken. 1902 is dat Metall- un Iesenwerk von Georg Niemeyer grünnt worrn, dat ünner annern Schippsschruven herstellt hett. Dat Wark harr to Anfang 200 Lüüd in Lohn, in siene besten Tieden sogor 1200. 1922 hett dat Ünnernehmen Hoff & Co. en Galalith-Wark in Bosselbeek apenmaakt.

As dat Galalith-Wark 1934 an de Seehavenstraat ümtagen is, hett Oscar Vidal von dat Vidal & Söhn Tempo-Wark dat Wark övernahmen un dor en Autofabrik inricht. Disse Fabrik is 1965 von Hanomag övernahmen worrn, dat 1969 mit de Henschel-Warken to Hanomag-Henschel tohoopgahn is. 1974 hett Daimler-Benz dat Ünnernehmen övernahmen. Von dit Wark hett ok de Horbörger Transporter sien Naam kregen. Dat Wark produzeert ok vondaag noch Assen, Lenksülen un Systemelemente för Mercedes-Benz un hett üm un bi 2500 Lüüd in Lohn.

Dat Kleinsiedlungsrebeed von Bosselbeek is 1932/1933 von de Siedlergemeenschop „Am Radeland e.V.“ anleggt worrn. Dor schullen sik Lüüd ansiedeln, de dör de Weltweertschopskries na 1929 arbeidsloos worrn sünd. De Hüüs weren to’n gröttsten Deel all gliek, dat weren mehr as 250 Grundstücken, op de Dubbelhüüs stünnen.

Dat Waterwark Bosselbeek is 1892 anleggt worrn. Dat hett veer Borns, de Water ut en Deepd von 25 Meter haalt un söss Deepwater-Borns, de Grundwater ut en Deepd von 76 bet 300 Meter haalt. To dat Waterwark höört dat Waterschuulrebeed Süderelvmasch/Horbörger Bargen, dat 47,2 Quadratkilometer groot un an’n 1. April 1994 inricht worrn is. Bi dat Waterwark is 1894 ok dat Kahlensüürwark Steinike & Co. anleggt worrn.

1919 is in Huusbrook dat Bargwark Robertshall anleggt worrn, dat för de Phoenix-Warken in Horborg Bruunköhlen afboot hett. 1921 is över de Haak en Reepbahn boot worrn, dat de Köhlen na Bosselbeek transporteert hett. Von Bosselbeek sünd de Köhlen mit Lasters na de Phoenix-Warken brocht worrn.

Bi de Stormflood 1962 is ok en Deel von Bosselbeek ünner Water ween, nadem twüschen Cranz un Moorborg de Dieken braken weren.

Bosselbeek leeg in’n Kreis Horborg von de prüüßsche Provinz Hannover. To’n 1. April 1938 keem Bosselbeek as Deel von Horborg-Willemsborg mit dat Groot-Hamborg-Gesett an de Stadt Hamborg.

Religion

De Ümgegend von Bosselbeek is evangeelsch-luthersch präägt. Bosselbeek höört to dat Kaspel von de Petrus-Kark in Heimfeld.

För de Kathoolschen is de St.-Maria-Kark in Horborg tostännig. Disse Kark billt siet 2006 tohoop mit de Franz-Joseph-Kark in Wilstörp de Karkengemeen St. Maria-St. Joseph.

Tosätzlich gifft dat en Königrieksaal von Jehova sien Tügen.

Kultur

Verenen

De Bosselbeker Sportvereen is 1922 grünnt worrn. De TuS Horborg von 1894 hett en Gelänn mit Swemmbad, Fitness-Studio un Tennisplätz in Bosselbeek.

Weertschop un Infrastruktur

An de Kanalisatschoon is de Siedlung twüschen 1962 un 1964 anslaten worrn.

Verkehr

An Bosselbeek langs löppt de Bundsstraat 73, de in’n Süüdoosten na Horborg geiht un in’n Westen na Vosshusen un Buxthu. In’n Noorden geiht de Moorbörger Hauptdiek över de Kattwiekbrügg na Willemsborg un na’n Hambörger Haven.

De nächste Autobahn is de Autobahn 7. De Opfohrt 32 Heimfeld liggt so twee Kilometer in’n Süden von Bosselbeek un de Opfohrt 31 Moorborg twee Kilometer in’n Noordwesten. De A 7 is in de Johren 1970 anleggt worrn un verlöppt över de Haak. 1975 is de Autobahn denn för den Verkehr freegeven worrn.

De nächste Bahnhoff is so bi fiev Kilometer wied weg in’n Oosten de Bahnhoff Horborg an de Nedderelvbahn. Bet 1984 hett dat in Bosselbeek den Bahnhoff Tempo-Wark geven, de denn aver dichtmaakt worrn is, as de Lien S3 von de Hambörger S-Bahn bet na Neegraven verlängert worrn is.

An’n 14. April 1927 is de Hambörger Stratenbahn-Lien 32 (von’n Bahnhoff Horborg) bet Bosselbeek verlängert worrn. Disse Lien hett bet to’n 30. Mai 1939 bestahn. Von’n 1. Juni 1939 af an is denn de Buslien 32 na Bosselbeek föhrt un dat hett dor keen Stratenbahnlien mehr geven.

Scholen

De eerste egene Volksschool in Bosselbeek is 1901 boot worrn. De School harr een Klass un hett offiziell Eißendörp II heten. Na 1910 is de School Filialschool von de Volksschool in Heimfeld worrn un harr toletzt negen Klassen. To’n 15. April 1967 hett de School dichtmaakt.

Von’n 1. August 1968 bet Sommer 1977 weer in de School de heelpädagoogsche Dagschool för behinnerte Kinner ünnerbrocht un von Sommer 1979 af an för en Tied de Rudolf-Steiner-School Horborg.

Weblenken

Bosselbeek. Mehr Biller, Videos oder Audiodateien to’t Thema gifft dat bi Wikimedia Commons.