Bill Gates

Vun Wikipedia
Bill Gates (in Davos, 2003)

William „Bill“ Henry Gates, III (* 28. Oktober 1955 in Seattle) is en US-amerikaanschen Programmerer und Ünnernehmer. 1975 hett he tosamen mit Paul Allen de Microsoft Corporation grünnt. Em höört meist 1,1 Milliarden Aktien vun Microsoft, dat sünd üm un bi 41 Milliarden US-Dollar oder ok 10 % vun dat Grundkapital. He is de Baas vun de Entwicklung („Chief Software Architect“) vun dat Ünnernehmen. Siet Dezember 2004 is he ok Liddmaat vun den Vörstand vun Berkshire Hathaway. Dat is de Investmentholding vun den Investor Warren Buffett, de na Gates as de drüddriekste Mann vun de Welt ansehn warrt.

Leven[ännern | Bornkood ännern]

Gates is dat tweete vun dree Kinner vun den Afkaat William H. Gates II (* 30. November 1925) und de Lehrersche Mary Maxwell Gates.

Sien eerste Insichten in de Reekner hett he mit 13 Johren an de High School sammelt. He is op de private Lakeside School in Seattle gahn. Dor geev dat ’n PDP-10-Anlaag. Tosamen mit sien Schoolfründ Paul Allen hett he dor dat Programmeren lehrt un hett sien eerste Firma Traf-O-Data grünnt. Se hebbt 'n Systeem för’t Meten vun den Stratenverkehr buut un dorför 20.000 Dollar kregen.

1973 gung Gates na de Harvard-Universität, üm dor to studeren. Aver de mehrste Tiet hett he in den Reeknerruum tobracht. Dor hett he ok Steve Ballmer drapen, de later sien Geschäftspartner warrn is. In’n Dezember 1974 schreev he tosamen mit Allen in ’n poor Weken ’n BASIC-Interpreter för den niegen Heimreekner Altair 8800. 1975 brook Gates sien Studium af, üm sik ganz op dat Föhren vun sien Firma Microsoft Corporation to konzentreren. Den Bahntje vun den Chief Executive Officer geev he in’n Januar 2000 an Steve Ballmer af. Siet disse Tiet is he Vörsitter vun den Opsichtsraat un Baas vun de Entwicklung vun de Firma.

Siet 1994 is Gates mit de Programmerersche Melinda French verheiraadt. Se hett domaals dat Projekt Microsoft Bob leidt. Se hebbt twee Döchter un een Söhn. He leevt mit sien Familie in Medina an’n Lake Washington.

To Bill Gates höört ok de gröttste Bildagentur vun de Welt, Corbis.

Teihn Johr lang weer Gates de riekste Mann vun de Welt. Siet 2007 hett em aver Carlos Slim Helú överhaalt. Dat liggt villicht ok dor mit an, dat Gates al veel vun sien Geld in de Stichten Bill & Melinda Gates Foundation steken hett, de Stipendien för junge Lüüd vergifft, Krankheiten in de Drüdde Welt bekämpfen deit un noch vele annere gode Saken maakt.

Böker vun Bill Gates[ännern | Bornkood ännern]

Literatur över Bill Gates[ännern | Bornkood ännern]

  • Janet Lowe: Bill Gates. Sein Erfolgsgeheimnis. TM-Börsenverlag 2000. ISBN 3-930851-49-0
  • Jennifer Edstrom, Marlin Eller: Barbarians led by Bill Gates. Microsoft von innen betrachtet. vmi-Buch. ISBN 3-8266-0506-3
  • James Wallace, Jim Erickson: Mr. Microsoft, die Bill Gates Story. Verlag Ullstein 1993. ISBN 3-550-06808-5

Weblenken[ännern | Bornkood ännern]

Bill Gates. Mehr Biller, Videos oder Audiodateien to’t Thema gifft dat bi Wikimedia Commons.