Balbeer
Een Balbeer oder Barbeer, ook Baardschrapper, Baardscherer oder Putzer un Putzbüdel is een Herrenfriseur, de besünners Baardhaar sniedt un friseert.
De Beroop geit bet in dat Middelöller un de fröhe Neetied torügg, as Barberen in Baadhüüs nich alleen Haar sneden, man Kunnen ook medizinsch versorgen un to’n Bispeel Tään tröcken, Aderlaat un Inlööp anböden oder sik üm Wunnen kümmern.
In de Neetied wannel sik de Beroop denn to’n Herrenfriseur, de Haar un Baard togliek sniedt un friseert. In dat 20. Jaarhunnerd is de Beroop meist uutstorven, in de 2010-er Jaren hebbt man Barbershops den Beroop, de nu meist na’t Engelsche Barber heet, wedder opleven laten.
Naam
[ännern | Bornkood ännern]Dat Woord Balbeer is ene Dissimilatschoon vun Barbeer,[1] dat över’t fransche barbier oder dat italieensche barbiere as barbêrer in dat Middelsassische un so ook dat moderne Plattdüütsch keem.[2] De beiden Spraken hebbt dat wedder vun dat laatlatiensche barbarius ‘Baardsnieder’ to barba ‘Baard’ arvt.[3] Een spaashaften Uutdruck, de ook vun dat Woord Balbeer kümmt, is Balbutz mit Varianten so as Ba(r)butz, Ba(r)butsch oder Balbutsch.
Anner plattdüütsche Begrepen sünd Baardscherer, Baardschrapper mit spaashaftigen Varianten so as Snutenschrapper oder Baardkratzer. Een anner Uutdruck is Putzer, dat ook spaashafte Varianten so as Putzbüdel het.
Galerie
[ännern | Bornkood ännern]-
Gillwapen vun de Barberen -
Barbeer (1568) -
Barberen in Japan (1850) -
Danziger Barbeersegel
Footnoten
[ännern | Bornkood ännern]- ↑ „Balbier“, in: Mecklenburgisches Wörterbuch, Band I, Kolumm 589
- ↑ Balbeer. In: Digitales Wörterbuch Niederdeutsch (dwn). Afropen an’n 21. April 2025.
- ↑ Friedrich Kluge, Alfred Götze: Etymologisches Wörterbuch der deutschen Sprache. 20. Oplaag ruutgeven vun Walther Mitzka, S. 51.