Bützfletersand
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 21683 | |
| Vörwahl: | 04146 | |
| Geograafsche Laag: | Koordinaten:53° 39′ N, 9° 30′ O53° 39′ N, 9° 30′ O | |
|
| ||
Bützfletersand (hoochdüütsch Bützflethersand) is en Rebeed in de Gemeen Stood in’n Landkreis Stood, Neddersassen, dat fröher en Insel in de Elv weer. Vondaag warrt de Sand as Industrierebeed bruukt.
Geografie[ännern | Bornkood ännern]
Bützfletersand leeg fröher as Sand twüschen de Bützfleter Binnenelv in’n Süden un Westen un den Hauptstroom von de Elv in’n Oosten. In’n Noordoosten liggt de Pagensand un in’n Oosten de Bishorster Sand.
De Naveröörd sünd Olendiek un Hogenhorst (mit dat fröhere Bishorst) op de annere Sied von de Elv in’n Oosten, Stodersand un Brunshusen in’n Süden, Hörn, Snee un Götzdörp in’n Süüdwesten, Bützfleet mit’n Bützfleter Butendiek in’n Westen un Bossel, Barnkroog, Kreuel un Abbenfleet mit Graueroort in’n Noordwesten.
Historie[ännern | Bornkood ännern]
Bevör na de Stormflood 1962 von 1968 bet 1971 de Hauptdiek an de Elv un dat Sparrwark Abbenfleet boot worrn sünd, hett dat keen Dieken geven, de Bützfletersand schuult hebbt. Dat geev dor blots dree Hööv, de op Worten boot weren. Dör den Hauptdiek is de Sand vondaag aver mit’n fasten Wall verbunnen un de ole Binnenelv is bi’n Bo von de Industrieanlagen deelwies toschüddt worrn.
Nadem de ne’e Diek trech weer, sünd de olen Hööv afreten worrn un dor sünd de Industrieanlagen von dat Dow-Wark Stood, Aluminium Oxid Stood, VAW/Hydro Aluminium un den Haven Bützfleet anleggt worrn. VAW hett 2006 dichtmaakt.
Verwaltungsgeschicht[ännern | Bornkood ännern]
In de Franzosentied von 1810 bet 1814 hett de Oort to de Mairie Bützfleet in’n Kanton Stood höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1859 to dat Amt Wischhoben tohöört un denn von 1859 bet 1885 to dat Amt Freeborg. Na 1885 weer dat in’n Kreis Keden. 1932 is dat Deel von’n Kreis Stood worrn.
In dat 19. Johrhunnert weer Bützfletersand noch en egenstännige Buurschop, is later denn aver Deel von de Gemeen Bützfleet worrn. De Oort is an’n 1. Juli 1972 mit de Gemeenreform in Neddersassen Deel von de Gemeen Stood worrn.
Inwahnertall[ännern | Bornkood ännern]
| Johr | Inwahners |
|---|---|
| 1791[1] | 3 Füürsteden |
| 1824[2] | 3 Füürsteden |
| 1848[3] | 44 Lüüd, 3 Hüüs |
| 1. Dezember 1871[4] | 39 Lüüd, 3 Hüüs |
Religion[ännern | Bornkood ännern]
Bützfletersand is evangeelsch-luthersch präägt un höört to dat Kaspel von de Nicolai-Kark in Bützfleet.
För de Kathoolschen is de Hillig-Geist-Kark in Stood tostännig.
Weertschop un Infrastruktur[ännern | Bornkood ännern]
Verkehr[ännern | Bornkood ännern]
Von Bützfletersand loopt lüttjere Straten na Westen an de Landsstraat 111, de in’n Noordwesten na Drochters un Wischhoben geiht, dor mit de Bundsstraat 495 verbunnen is un denn na Freeborg föhrt. In’n Süüdwesten löppt de L 111 na Stood un an de Bundsstraat 73.
De nächste Autobahn is de Autobahn 26 (Afsnidd Stood–Hamborg). De Opfohrt 3 Stood-Oost liggt so negen Kilometer in’n Süden von Bützfletersand an de L 111.
De nächste Bahnhoff is so bi söven Kilometer wied weg in’n Süden de Bahnhoff Stood an de Nedderelvbahn von Cuxhoben na Hamborg.
Footnoten[ännern | Bornkood ännern]
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 44
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 102
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 140
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 136
