Joy Grant
Audrey Ann Joy Grant (* 5. Februar 1951 in Belize-Stadt) is en Ümweltschützerin, Diplomatin un Politikerin (UDP) ut Belize.
Grant is 1951 as Dochter von en Aftheker in Belize-Stadt (to de Tied Brietsch-Honduras, nu Belize) boren.[1] Na de High School hett se toeerst een Johr för de Barclays Bank arbeidt un denn an de Universität von Alberta in Edmonton (Kanada) studeert.[1] Se hett en Bachelor in Commerce maakt un en Master in Business Administration.[1] Na dat Studium hett se acht Johr lang för de Caribbean Development Bank in Barbados arbeidt un denn bi de Baadschop von Belize in de USA in Washington D.C.[1]
In de Baadschop keem se in Kuntakt mit de Massachusetts Audubon Society, de en Projekt in Belize planen dee.[1] De Sellschop hett ehr denn för düt Projekt (dat Programme for Belize) anhüürt un Grant is 1989 na Belize trügggahn.[1] Grant hett twölv Johr för dat Programme for Belize arbeidt un in düsse Tied sünd över 1200 km² (üm un bi 4 % von dat Rebeed von Belize) ünner Schuul stellt worrn.
2001 hett Grant bi The Nature Conservancy anfungen un weer Viezpräsidentin un Direktersche för de Atlantic Conservation Region, de för grote Delen von Noord-, Zentraal- un Süüdamerika tostännig is. 2005 is se to dat Natural Capital Project wesselt.
2008 is Grant Baadschopperin von Belize in Brüssel worrn. Dormit hett se Belize in de Länner Belgien, Spanien, de Nedderlannen, Düütschland un Frankriek vertreden un tosätzlich bi de Europääsche Kummission. Düssen Posten harr se bet 2012.
An’n 12. März 2012 is se von Premierminister Dean Barrow in’n Senaat von Belize beropen worrn un hett denn dat Amt as Ministerin för Energie, Wetenschop un Technologie un Versorgung övernahmen. Düt Amt harr se bet 2015.
Siet Oktober 2016 is se as Nafolgerin von Glenford Ysaguirre Guvernörin von de Zentraalbank von Belize.
Ehren[ännern | Bornkood ännern]
To Königin Elisabeth II. ehren Geboortsdag 2019 is Grant Companion of the Order of St Michael and St George worrn.