Arne Börnsen

Arne Börnsen (* 5. Oktober 1944 in Wilster) is en düütschen Politiker von de SPD. He weer von 1980 bet 1983 un von 1987 bet 1998 Afornten in’n Düütschen Bundsdag.

Leven

Börnsen is 1944 in Wilster boren. Na sien Abitur an dat Gerhard-Rohlfs-Gymnasium in Bremen-Vesack 1965 hett he Schippstechnik an de Technische Universität Hannover un de Universität Hamborg studeert un dat Studium as Schippbo-Diplominschenör afslaten. He weer denn as Planungsinschenör bi de AG Werser in Bremen un hett von 1983 af an bi dat Wark Bremen von de Daimler-Benz AG arbeidt. Von 1978 bet 1980 weer he Lehrbeopdragten för dat Fack Lagerwesen an de Fackhoochschool Bremerhoben un von 1990 bet 1993 Maat in’n Opsichtsraad von de Krupp-Atlas-Elektronik GmbH Bremen.

Politik

In de SPD is Börnsen in’n August 1969 rin. He is 1979 Maat von’n Vörstand in’n SPD-Bezirk Noord-Neddersassen worrn un weer von 1988 bet 1991 Vörsitter von’n Bezirk. Von 1982 bet 1992 weer he ok in’n Landsvörstand.

Börnsen weer von 1976 bet 1981 Viez-Börgermeester von de Gemeen Hu’e un von 1976 bet 1997 Afornten in’n Kreisdag von’n Landkreis Oosterholt.

Bi de Bundsdagswahl 1980 weer Börnsen Direktkannedaat in’n Bundsdagswahlkreis Veern un is mit 50,6 % von de Eerststimmen in’n Düütschen Bundsdag intagen. Bi de Wahl 1983 weer he wedder Direktkannedaat, hett düt maal aver gegen Martin Oldenstädt von de CDU verloren un is nich in’n Bundsdag intagen. Bi de Wahl 1987 is he wedder in’n sülven Wahlkreis antreden, de nu aver den Naam Wahlkreis Veern-Oosterholt kregen harr, un hett 46,4 % von de Stimmen kregen. Dormit kunn he wedder in’n Bundsdag intehn. Bi de Wahl 1990 hett he sik in sien Wahlkreis mit 44,6 % von de Stimmen dörsett un bi de Wahl 1994 mit 47,6 %.

He weer in’n Bundsdag Maat von’n Infrastrukturraad bi’n Bundsminister för Post un Telekommunikatschoon, is 1987 Spreker von de SPD-Frakschoon för Post un Telekommunikatschoon worrn un 1990 Maat von de Unafhängige Kummission för dat Överprüfen von de Vermögens von de Partein un Massenorganisatschonen in de DDR bi dat Bundsbinnenministerium. An’n 6. Januar 1998 is Börnsen vör de Tied ut’n Bundsdag utscheden, üm Viezpräsident von de nee grünnte Regulerungsbehörde för Telekommunikatschoon un Post to warrn. För em is Eva Folta narückt.

To’n 31. Dezember 1999 is Börnsen na Differenzen mit Präsident Klaus-Dieter Scheurle von de Regulerungsbehörde weg un hett bi’n Ünnernehmensberader A.T. Kearney in Düsseldörp anfungen. 2003 hett he sik in Berlin mit AB Consulting as Ünnernehmensberader sülvstännig maakt.

Literatur

• Rudolf Vierhaus un Ludolf Herbst (Rutgevers): Biographisches Handbuch der Mitglieder des Deutschen Bundestages 1949–2002. Band 1, A–M, Saur, München 2002, ISBN 3-598-23781-2, Sieden 84–85