Anthony Chanona

Anthony Joseph Chanona (* 31. März 1954) is en Politiker ut Belize (PUP).

Chanona is 1954 as Söhn von Dotsy (1922–2011) un Ernest Chanona (1917–1997) boren. He is de Besitter von en Zitrusplantaasch an’n Hummingbird Highway un weer in de Johren 1980/1990 Baas von de Belize Citrus Growers Association.

Nadem de Hööftstadt Belmopan 1999 en Referendum afhollen hett, mit dat beslaten worrn is, dat Belmopan — jüstso as annere Städer in Belize — en Börgermeester un Stadtraad wählt, is de eerste Wahl denn an’n 1. März 2000 ween. Chanona is as Börgermeester wählt un 2003 nochmaal wedderwählt worrn. He is bet to’n 1. März 2006 Börgermeester von Belmopan bleven un denn nich wedder antreden. Sien Nafolger weer Simeon López von de UDP.

In’n April 2006 is Chanona as Nafolgerin von Patricia Lopez in’n Senaat beropen worrn. Düt Amt hett he aver an’n 13. September 2007 wedder afgeven, nadem Chanona sik gegen den Public Utilities Act utspraken harr. David Hoy hett denn sien Seet in’n Senaat övernahmen.

In’n Juli 1979 hett Chanona Myrtle Coye (* 1956) freet. De beiden hebbt fiev Kinner.