Anthonie van Noordt

Vun Wikipedia
Wesseln na: Navigatschoon, Söök

Anthonie van Noordt (* ca. 1619 in Amsterdam; begraven 23. März 1675 ok dor) weer en Orgelspeler un Komponisten ut de Nedderlannen.

Leven[ännern | Bornkood ännern]

Anthonie van Noordt weer en Twieg ut en bekannt Geslecht vun Musikers in Amsterdam. Sien Vadder, Sybrandt van Noordt senior (ca. 1590 – 1654) weer Klockenspeeler. Anthonie is 1652 as Nafolger vun sien Broder Jacobus van Noordt to’n Orgelspeler an de „Nieuwezijds Kapel“ in de Binnenstadt vun Amsterdam beropen wurrn. Jacobus steeg up to’n Orgelspeler vun de Ole Karken. 1664 is Anthonie denn anstellt wurrn an de Ne’e Karken, wat de grote Karken an den Amsterdammer „Dam“ is. He hett düt Baantje bit 1673 beholen. Dormols möss he vunwegen slechte Gesundheit Bott geven, sien Salär hett he avers wieterhen kregen. He hett, solang he in’n Beroop stünn, in Amsterdam un Rotterdam Orgeln unnersöcht un pröövt. Freet hett he nich un so is he sunner Fro storven un liggt begraven in de Süderkarken vun Amsterdam, dicht bi Rembrandt sien Wohnhuus.

Wark[ännern | Bornkood ännern]

1660 is de Band Tabulatuur-boeck van Psalmen en Fantasyen rutkamen. Dor gifft dat en Reeg vun bekannte Kompositschonen vun Anthonie van Noordt in: Tein Psalmen ut den Psalter vun Genf mit Variatschonen un sess Phantasien för Orgel. Düsse Stücken, so warrt hüdigendags seggt, höört to dat Beste, wat in dat 17. Johrhunnert in de Nedderlannen komponeert wurrn is. Se staht noch heel in de Traditschoon vun Jan Pieterszoon Sweelinck siene Warken. Man de allgemeene Gesmack harr sik midderwielen duchtig ännert un so hett he dor nich veel mit weern konnt. De beröhmte Dichter Constantijn Huygens hett sik denn ok bloß man torüchhöllern utlaten över düsse Stücken.