Annemarie Hübner

Cäcilie Margarete Annemarie Hübner (* 25. Dezember 1908 in Genthin; † 7. Januar 1996 in Hamborg) weer ene düütsche Germanistin un Nedderlandistin mit enen Swaarpunkt op de Nedderdüütsche Philologie un besünners de middelsassische Spraak

Leven

Annemarie Hübner weer de Dochter vun Hermann Carl August Hübner, de Direkter an enen Reformgymnasium in Elmshoorn. Hier bröch Hübner de eersten Levensjahren to. 1928 maak se dat Abituur in Elmshoorn un studeer Germanistik, Anglistik, Philosophie un Psychologie an de Universität Hamborg. Se sett al fröh enen Swaarpunkt op de Nedderdüütsche Philologie un lehr ünner Conrad Borchling un Agathe Lasch. In eer Studientied het se bi den Wöörbookarchiven vun dat Germanistsch Seminaar arbeidt. För de Dissertatschoon ünner Hans Teske befaat se sik mit dat fröhe Hamborger Hoogdüütsch (Studien zur Sprachform des frühen Hamburger Hochdeutsch). De Arbeid knütt an Agathe Lasch eer Arbeid över de Spraakhistorie vun Berlin an. Wegen den Tweden Weltkrieg, de nu uutbraken weer, keem de Dissertatschoon man nich druckt worrn.

Von 1940 an arbeid Hübner as wetenschoplich Mitarbeidersche bi dat Middelnedderdüütsch Wöörbookarchiv un lehr an dat Germanistsch Seminaar Gootsch, Ooldsassisch, Middelhoogdüütsch, Fröhneehoogdüütsch un middelnedderlandsch. Vun 1943 bet 1948 arbeid se as Assistentin vun dat Germanistsch Seminaar.

Hübner ünnerrich denn Nedderlandsch un bedelig sik vun 1951 an de Ruutgaav vun dat Middelnedderdüütsch Handwöörbook ünner Gerhard Cordes. 1956 wurr Hübner as Lektersche för Nedderlandsch un Afrikaans anstellt un lehr bet to de Penschoon an de Unviersität Hamborg. Ook in’e Penschoon lehr se noch unbetaalt an de Universität. Se richt an de Universität een middelnedderlandsch Proseminaar in. Von 1958 bet 1972 weer Hübner in de Vörstand vun de Düütsch-Nedderlandsche Sellschop in Hamborg, de Schölers bi Schölers bi Spraakreisen in’e Nedderlannen Stüüt geev.

1959 maak Hübner in Opdrag vun dat Lübsche Landgericht een vergleken Goodachten, in dat se Echtheid vun de Borns för de in’t Düütsche översett Uutgaav vun dat Anne Frank eer Daagbook beweerden deit. Dat Nedderlandsch Instituut för Kriegsdokumentatschoon bekünn Hübner eer Goodachten un see dat as richtig an.

Annemarie Hübner bleev 1996 in Hamborg dood. Se liggt op’n Dodenhoff in Altno begraven.

Wark

Annermarie Hübner arbeid besünners an dat Mittelniederdeutsche Handwörterbuch, för dat se veel Artikels schreev. Daarto schreev se ook veel Essays över de plattdüütsche Spraakhistorie. Se arbeid ook mit an Lehrwarken, de bi Langenscheidt ruutkemen un översett nedderlandsche Saak- un Kinnerböker. Late befaat se sik mit de wichtigsten Borns to de Historie vun de noorddüütschen Karken in de fröhen Neetied.

1963 fünn se de Höövdborn för dat Hohe Lied vun Brun von Schönebeck (Festschrift U. Pretzel).

Ehren

Annemarie Hübner weer vun 1961 an Liddmaat in de Königlich Sweedsch Akademie vun de Wetenschoppen un vun 1963 an in Königlich Nedderlandsch Akademie vun de Wetenschoppen.

Literatuur

• Mirko Nottscheid: Hübner, Annemarie. In: Franklin Kopitzsch, Dirk Brietzke (Ruutgever): Hamburgische Biografie. Band 4. Wallstein, Chöttingen 2008, ISBN 978-3-8353-0229-7, S. 163–165. 
• Mirko Nottscheid: Die Germanistin und Niederlandistin Annemarie Hübner (1908-1996). Zur wissenschaftlichen Biografie einer Hamburger Sprachforscherin zwischen Weimarer Republik und Nachwendezeit. In: Mirko Nottscheid u. a. (Hgg.): Die Germanistin Agathe Lasch (1879–1942). Aufsätze zu Leben und Wirkung, Nordhusen: Bautz 2009 (bibliothemata; 22), S. 109–168. ISBN 978-3-88309-500-4