Ammerlänner Buurnhuus

Vun Wikipedia
Zur Navigation springen Zur Suche springen
Museum Ammerlänner Buurnhuus

Dat Heimatmuseum Ammerlänner Buurnhuus woor 1909 in Bad Twüschenahn in dat Ammerland grünnt. To dit Freelichtmuseum an dat Twüschenahner Meer höör dat grote Buurnhuus (en Neddersassenhuus), de Spieker, de Blekerhütt, de Bargfreed, de Backaven un de Timmerschüün. In de neegsten fofftig Jahren kemen noch twölf annere Wahn- un Weertschopsgeböden darto. All de Geböden woorn an verschedene Öörd vörsichtig afbraken un denn originaalgetro wedder in Twüschenahn upboot. Vör allen woor ok up de vullstännige Binneninrichtung groten Weert leggt. Wat in de Geböden utstellt woor, dat is in de mehrsten olen Buurnhüüs up’n Ammerlannen vandagen kuum noch antodrapen.

Up de Daal (Deel) staht ole Kutsch- un Ackerwagens, Keespressen un Stöövmöhlen, Grüttmöhl un Karnrad mit Botterfatt, un up de Burten un de Richtebank in’n Unnerslag blänkert de Töllers, Kannen, Pullen, Seven un Schötteln ut Tinn oder Missing. In de Dönzen staht Bileggers un Böötavens, Kisten un Schappen mit moie Snitzereen.

Aver nich bloots dat grote Buurnhuus is mit dat vullstännige Inventaar utrüst, sünnern ok in de lütten Nevengeböde, so as in de Timmerschüün, dat Backhuus un de Wagenschüür is all dat vörhannen, wat fröher för den Bedriev nödig weer. In de Wagenschüür (de Wagenschüün) is sogaar ene Sammlung von Plöög, Eggen, Wagens un Sledens unnerbrocht. De Hüllsteder Windmöhl, de in de Jahren 1959/1960 in’t Ammerlänner Heimatmuseum upboot woorn is, is vullkamen inricht. In dat Unnergeschott is ene Öölmöhl to sehn.

Neven dat Inventaar von de Hüüs gifft dat ok noch enige annere Sammlungen, so as Blaufarverreedschop, ene Tinngeterwarksteed, Tinn- un Missingreedschop un Reedschop för dat Bearbeiden von Flass. In den Dweersack (Dweerhuus) sünd dat Archiv un de Bökeree von dat Heimatmuseum unnerbrocht.

Up de Daal von’t Buurnhuus finnt jedet Jahr de Twüschenahner Heimatspelen statt. Dor warrt denn von de Laienspelers Theaterstücken von nedderdüütsche Schrievers vörspeelt. Butendem gifft dat en Volksdanzkoppel, dat sik mit siene bunten Drachten un olen Dänz al wiet över de Grenzen von’t Ammerland enen Naam maakt hett.


Koordinaten:53° 11′ N, 8° 1′ O