Albert Lührs

Vun Wikipedia

Albert Lührs (* 2. April 1804 in Maschkamp; † 22. Oktober 1871 in Paane) weer en lutherschen Theoloog.

Lührs is 1804 as Söhn von Anna Margarete, borene Stürken, un den Brinksitter Johann Hinrich Lührs in Maschkamp boren. Bet he 16 weer, hett he Ünnerricht von sien Broder, den Schoolmeester Johann Christoph Lührs, kregen. In’t Latiensche harr he Ünnerricht bi Pastoor Nikolaus Holthusen in Öberndörp. Von Harvst 1819 bet Michaelis 1822 weer Lührs op dat Athenaeum in Stood. Na de Schooltied in Stood hett he toeerst en Steed as Huuslehrer op Good Kuhla annahmen. To Pingsten hett he siene eerste Preddigt in de Leevfroon-Kark in Elm hollen.

In’n September 1823 hett he anfungen, an de Universität Göttingen to studeren. 1827 hett he dat Studium ünnerbraken un en Steed as Huuslehrer in Heien annahmen, üm dat Studium wieder finanzeren to könen. Oostern 1827 is he an de Universität Halle wesselt. Trech mit dat Studium weer he to Oostern 1828.

An’n 17. Januar 1832 hett Lührs as jungen Rekter un Pastoor interim in Heien Isabella Carolina Philippine Wirth freet. De beiden harrn veer Kinner.

1833 kreeg he sien eerste Parrsteed an de Kark in Scholen in de Graafschop Heien. Tohoop mit’n Pastoor in Vilsen hett he von 1833 af an den „Kirchenfreund“ rutgeven, en Karkenbladd dat von Bedüden weer för de Erweckungsbewegung in Noorddüütschland, de jüst in’t Opkamen weer.

1842 is Lührs Archidiaken in Clausthal worrn. Tohoop mit’n Pastoor in Zellerfeld hett he dor dat Christliche Sonntagsblatt rutgeven. He hett sik mit verscheden Strömungen binnen un buten de Landskark uteneensett. 1848 hett he to’n Bispeel en Gegentext rutgeven to dat Manifest des freien Urchristenthums von’n Baptistenpreddiger Julius Köbner.[1] Köbner hett twee Johr later mit en Gegenschrift antert: Die Gemeinde Christi und die Kirche. Eine Widerlegung der von Herrn Archidiaconus Lührs herausgegebenen Schrift „Die Wiedertäufer“.[2]

1848 is Lührs Supperndent in Holtörp worrn. Sien Vördrag 1851 op de hannöversche Pingstkunferenz hett de Fraag na en Katechissenreform opbrocht. 1856 hebbt veer Geistliche un twee Schoollüüd den Opdrag kregen, en ne’en Landskatechissen uttoarbeiden; Hauptredaktör weer Albert Lührs, de 1859 Supperndent in Paane worrn is. De Arbeid an’n ne’en hannöverschen Katechissen weer 1861 trech. Inföhrt worrn is he an’n 15. April 1862, den Kumfermatschoonsdag von hannöverschen Kroonprinz Ernst August. 1862 hett de Universität Göttingen Lührs to’n Ehrendokter maakt. In’n Sommer 1862 hett dat denn aver veel Gegenwind gegen den Katechissen geven, de vör allen von de Pastoorn keem, de dör den Ratschonalismus präägt weren. De König hett dorüm an’n 19. August 1862 siene Verfögung von’n 15. April 1862 wedder trüggtagen (kiek ok bi de Geschicht von’n breemsch-veernschen Katechissen).

Lührs is an’n 22. Oktober 1871 in Paane doodbleven.

Literatur[ännern | Bornkood ännern]

  • D. Albert Lührs (1804–1871) aus Marschkamp im Amte Bederkesa. Schul- und Studienjahre des nachmaligen Hauptredakteurs des hannoverschen Landeskatechismus. In: Männer vom Morgenstern, Jahrbuch 60, Bremerhoben 1981

Footnoten[ännern | Bornkood ännern]

  1. Albert Lührs: Die Wiedertäufer, Clausthal 1848.
  2. Markus Wehrstedt: Einleitung zu Köbners „Manifest“. In: Markus Wehrstedt, Bernd Wittchow (Hrsg.): Julius Köbner. Manifest des freien Urchristenthums an das deutsche Volk. Berlin 2006, S. 22 f.