Adalbert Zajadacz GmbH
De Adalbert Zajadacz GmbH is en Groothannel för Elektrotechnik ut Vosshusen. Dat Ünnernehmen hett 20 Standöörd in Düütschland. Mit üm un bi 500 Mitarbeiders maakt Zajadacz 190 Milljonen Euro Ümsatz (Stand 2015). Geschäftsföhrers sünd Ralf Moormann un Detlef Ploew.
De Standöörd sünd Berlin (Wittenau un Mahlsdörp), Bremen, Bruunswiek, Celle, Flensborg, Hamborg (Steilshoop, Stellingen un Wandsbeek), Hannover, Kiel, Lübeck, Lümborg, Meideborg, Noorderstedt, Ossenbrügge, Pritzwalk, Rostock, Stendal un Swerin.
Produkten[ännern | Bornkood ännern]
Dat Ünnernehmen büddt allens an, wat mit de Elektrotechnik to doon hett: Industrietechnik, Kabels, Installatschoonsmaterial, Schaltermaterial, Överspannungsschutz, Brandschutz, Sekerheitstechnik, Lüchtmiddels, Telekommunikatschoonstechnik, Ünnerhaltungselektronik, Huusgeräte, Warktüüg, Meetapparaten un Arbeidskledaasch.
Zajadacz belevert Elektroinstallatöre, Industrieünnernehmens, den Elektrohannel, dat Elektrohandwark un Bogewarken, Facility-Management, Kommunen, Behörden un diverse Spezialbranchen, so as IT- un Telekommunikatschoonsdeenstleisters. Ennverbrukers höört dor nich to.
Historie[ännern | Bornkood ännern]
Dat Ünnernehmen is 1932 von’n Bankkoopmann Adalbert Zajadacz in de Amalienstraat in Horborg grünnt worrn.[1] Zajadacz dee ut de Ukraine stammen. Dat Ünnernehmen is 1934 in dat Hannelsregister indragen worrn. Al 1940 harr dat Ünnernehmen dat eerste Maal en Ümsatz von 1 Milljoon Rieksmark.[1] De twete Standoort keem denn 1949 in Celle. Nadem de Firmengrünner 1964 doodbleven is, hebbt siene Fro Zinaida un de Söhn Michael Zajadacz dat Leid över dat Ünnernehmen övernahmen. 1961 is dat Ünnernehmen in en Neebo in de Buxthuer Straat in Horborg tagen un 1972 is dat von Horborg na Vosshusen in de Lessingstraat ümtagen.[1] In dat Johr 2000 is Zinaida Zajadacz doodbleven un Michael Zajadacz hett alleen dat Leid övernahmen. He hett sik 2008 ut gesundheitliche Grünn ut dat Ünnernehmen trüggtagen, is aver Sellschopper bleven.
In dat Johr 2000 weer dat Ünnernehmen op 17 Standöörd wussen un bet 2011 op 19 Standöörd. 2013 is an’n Hauptstandoord in Vosshusen en ne’e, 6500 m² grote Hall boot worrn. De 20. Standoort weer in Berlin-Wittenau un de letzte 2016 in Lümborg.
In Vosshusen doot 250 Lüüd arbeiden un maakt en Ümsatz von 40 Milljonen Euro. Dat Zentrallager in Vosshusen is 20.000 m² groot.[1]
Adalbert-Zajadacz-Stiftung[ännern | Bornkood ännern]
2001 hett Michael Zajadacz de Adalbert-Zajadacz-Stiftung grünnt. Ehre Opgaav is de Begabten- un Utbillungsförderung för dat Elektrohandwark un de Elektrotechnik. De Stiftung fördert vör allen Projekte in de Kunst un Kultur un bi dat Ut- un Wiederbillen.
Footnoten[ännern | Bornkood ännern]
- ↑ a b c d Claudia Michaelis: Neu Wulmstorfs Elektro-Riese funkt menschlich, Stader Tageblatt an’n 7. Juli 2016
Weblenken[ännern | Bornkood ännern]
- Websteed von dat Ünnernehmen (hoochdüütsch)