Aluminium Oxid Stood

Vun Wikipedia
(wiederwiest vun AOS)
Zur Navigation springen Zur Suche springen
Blick von Süüdsüüdwesten op dat Gelänn von de AOS
AOS
Roodslammdeponie bi Bützfletermoor

De Aluminium Oxid Stood (AOS) in Bützfleet bi Stood is dat eenzige Ünnernehmen in Düütschland, dat opstunns noch ut Bauxit Aluminiumoxid (Al2O3) un Aluminiumhydroxid (Al(OH)3) för de Industrie herstellt. Dat Gelänn von de AOS - dicht bi’n Haven Bützfleet - is 55 Hektar groot.

Dat Ünnernehmen hett mit 492 Mitarbeiders 2014 en Ümsatz von 165,6 Milljonen Euro maakt.[1]

Historie[ännern | Bornkood ännern]

De AOS is von 1970 af an op dat Gelänn in dat Industrierebeed Bützfletersand opboot worrn un 1973 in Bedriev gahn. 1985 harr dat Wark en Kapazität von 630.000 Tunnen Alumiumoxid in’t Johr.[2]

De AOS hett to je 50 % de Vereenigten Aluminium-Warken (VAW) un Reynolds tohöört. Nadem Reynolds 2000 mit Alcoa tohoopgahn is, hett dat ne’e Ünnernehmen in’n April 2001 siene 50 % an dat brietsche Ünnernehmen DADCO Alumina & Chemicals Ltd. von Victor Dahdaleh verköfft. De VAW sünd 2002 von Norsk Hydro övernahmen worrn. De 50 % von Norsk Hydro sünd in’n Juni 2004 denn för 110 Milljonen US-Dollar ok an Dadco verköfft worrn.

De AOS produzeert na egen Angaven üm un bi 1.000.000 Tunnen Aluminiumoxid in’t Johr.[3]

VAW-Elvwark[ännern | Bornkood ännern]

Direkt blangenan op dat Gelänn in’n Noorden von AOS weer mit dat VAW-Elvwark en Aluminiumhütt mit en Kapazität von 68.000 Tunnen in’t Johr (Stand 1985), de dat Aluminiumoxid wiederverarbeiden dee. De Hütt hett ok de VAW tohöört un is 2002 an Norsk Hydro gahn. Norsk Hydro hett dat Wark to’n 31. Dezember 2006 dichtmaakt, von wegen, dat de Energiepriesen to hoog weren (de Aluminiumhütt in Stood hett 1,2 Milljarden Kilowattstünnen in’t Johr verbruukt). Dor harrn toletzt üm un bi 420 Lüüd arbeidt. Dat Gelänn is denn von Prokon Nord (siet 2010 N.prior energy) köfft worrn. Nadem N.prior energy 2012 in Insolvenz gahn is, hett Global Castings dat Gelänn övernahmen un bedrifft dor siet 2015 en Geteree.

Deponie[ännern | Bornkood ännern]

De Roodslamm, de bi de Produkschoon nablifft, warrt op de Roodslammdeponie twüschen Bützfletermoor un Stodermoor aflagert (53° 38′ N, 9° 25′ O). De Deponie is 1.130 m × 1.525 m groot. De Roodslamm warrt von de Anlaag op Bützfletersand dör en Pieplien in dat Moor pumpt. De Natronlaug warrt vörher rutwuschen. Dat Regenwater, dat op de Deponie fallt, mutt afföhrt warrt. Dat warrt opbereidt un denn in de Elv leidt. Wenn dröög Weder is, mutt de Deponie mit Sprinklers natt hollen warrn, dat de Roodslamm nich as Stoff opstiggt. Stand 2013 weren dor 15 Milljonen Tunnen Roodslamm aflagert.[4]

Dat is plaant (Stand 2017), dat de Deponie noch bet 2028 wieder bedreven warrn schall. Bet dorhen schall de Höögd von de Dämm üm de Deponie bi 21 Meter liggen.

Footnoten[ännern | Bornkood ännern]

  1. Bundesanzeiger: Johrsafsluss to dat Geschäftsjohr von’n 1. Januar 2014 bet 31. Dezember 2014
  2. Ulrike Haas: Standortperspektiven stromintensiver Produktionen in der Bundesrepublik Deutschland. Vandenhoeck & Ruprecht, 1990, S. 55 Tab.9 un S. 56 Tab.10
  3. Websteed von de Aluminium Oxid Stood
  4. Thorsten Penz: AOS Stade: "Reizende" Suppe im Riesen-Becken, Wochenblatt an’n 21. Juni 2013

Weblenken[ännern | Bornkood ännern]

Commons-logo.svg Aluminium Oxid Stood. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 39′ N, 9° 30′ O