(308635) 2005 YU55
| (308635) 2005 YU55 | |
 | |
| Egenschoppen vun’n Orbit (Simulatschoon) | |
|---|---|
| Orbitklass | Apollo-Tyyp |
| Grote Halfass | 1,157 AE |
| Perihel — Aphel | 0,659 — 1,655 AE |
| Bahnexzentrizität | 0,4034 |
| Bahnnegen gegen de Ekliptik | 0,340 ° |
| Ümlooptiet | 1,24 a |
| middlere Bahnsnelligkeit | ? km/s |
| Physikaalsch Egenschoppen | |
| Dörmeter | 0,4 km |
| Rotatschoonsduer | 18 h |
| Albedo | ? |
| Historie | |
| opdeckt vun | Robert S. McMillan |
| an’n | 28. Dezember 2005 |
| in | Kitt Peak, Arizona |
(308635) 2005 YU55 is en eerdneegen un för de Eer mööglicherwies gefährlichen[1] Asteroid vun’n Apollo-Tyyp. De Asteroid weer an’n 28. Dezember 2005 in’n Rahmen vun dat Spacewatch-Projekt dör Robert S. McMillan an de Steward-Steernwacht vun de Kitt-Peak-Natschonalsteernwacht op’n Kitt Peak in Arizona opdeckt. Sien Dörmeter warrt mit ruchweg 400 m angeven[2]. He is an’n 8. November 2011 gegen 23:28 UT in ruchweg den 0,85-facken Afstand twüschen Eer un Maand an de Eer vörbiflagen.
Risiko för de Eer[ännern | Bornkood ännern]
De Asteroid is in’n Februar 2010 mit den Weert 1 op de Turiner Skala angeven worrn, wat bedüüt, dat he dicht an de Eer vörbiflüggt, aver kenn sünnere Gefohr mit sik bringt. De Nauigkeit för’t Bereken vun de Ümloopbahn is dör en Beobachten an’n 19. April 2010 dör de Arecibo-Steernwacht noch mol düütlich verbetert worrn[3]. Dordör kann utslaten warrn, dat de Asteroid binnen de nächsten hunnert Johren mit de Eer tosamenstöten künn. Vun de Sentry-List is de Asteroid dorna streken worrn.
De Bahn warrt dör de NASA ok mit Antennen vun’n Goldstone Deep Space Communications Complex verfolgt. Wietere Daten warrt ünner annern över de Anlagen Green-Bank, Very Large Array un Infrared Telescope Facility sammelt[4]. Sien lüttsten Afstand harr he bi sien Vörbiflegen 2011 an’n 8. November gegen 23:28 UT. Dorbi flöög he dichter vörbi as de Maand un keem op bit 0,00217 AE an de Eer ran – dat is ruchweg 0,85 vun den Afstand Maand-Eer oder 325.000 km. Sien lüttsten Afstand to’n Maand harr de Asteroid en poor Stünnen later, an’n 9. November 2011 gegen 7:13 UT mit ruchweg 0,00160 AE (239.000 km)[2]. Dorbi keem 2005 YU55 op en schienbore Helligkeit vun üm un bi 11mag, so dat he vun Astronomen goot to sehn is.
Tokamen Ümloopbahn[ännern | Bornkood ännern]
An’n 19. Januar 2029 warrt 2005 YU55 in en Afstand vun ruchweg 0,0022 AE (329.000 km) an de Venus vörbiflegen[5]. Dorut warrt sik bestimmen, wo groot de Afstand is, wenn de Asteropid 2041 wedder an de Eer vörbiflüggt. Opstunns sünd de Bereken noch nich nau noog, so dat de Afstand för 2041 noch twüschen 0,002 un 0,3 AE liggen kann[6]. Wenn de Beobachten vun 2011 utweert sünd, warrt de Bereken för tokamen Annegern nauer warrn. Na de aktuellen Meten un Bereken kann 2005 YU55 in’t Johr 2075 sogor bit op 0,0013 AE oder 194.000 km dicht an de Eer rankamen[5].
Borns[ännern | Bornkood ännern]
- ↑ Orbitsimulatschoon vun’t JPL
- ↑ a b Asteroid 2005 YU55 to Approach Earth on November 8, 2011 NASA/JPL Near-Earth Object Program Office vun Don Yeomans, Lance Benner un Jon Giorgini, afropen an’n 5. Mai 2011
- ↑ Arecibo telescope tracks 'potentially dangerous' asteroid within 1.5 million miles of Earth Blaine Friedlander Jr. op Cornell Chronicle @ Cornell University; afropen an’n 5. Mai 2011
- ↑ NASA in Final Preparations for Nov. 8 Asteroid Flyby jpl.nasa.gov, afropen an’n 4. November 2011
- ↑ a b JPL Close-Approach Data: (2005 YU55) afropen an’n 9. November 2011
- ↑ 2005 YU55 Goldstone Radar Observations Planning vun Dr. Lance A. M. Benner, NASA/JPL; afropen an’n 9. November 2011
Weblenken[ännern | Bornkood ännern]
- Orbitsimulatschoon vun’t JPL (Java) / Horizons Ephemeris
- 2005 YU55 Observing Campaign
- Arecibo saves us from another potentially hazardous asteroid (Emily Lakdawalla, 29. April 2010)
- NEODys-Seite zo 2005 YU55
- Seite des European Asteroid Research Node zo 2005 YU55
- First Movie of Asteroid 2005 YU55 nasa.gov, afropen an’n 9. November 2011