Yakima Canutt

Yakima Canutt (* as Enos Edward Canutt 29. November 1895 in Colfax, Washington; † 24. Mai 1986 in North Hollywood, Kalifornien) weer en US-amerikaanschen Rodeo-Rieder, Stuntman, Schauspeler un Second-Unit-Speelbaas.

Leven un Wark[ännern | Bornkood ännern]

Canutt hett sien Künstlernaam vun de Stadt Yakima in’n Bundsstaat Washington kregen. Bekannt worrn is he toeerst as Star bi’t Rodeo-Rieden, wo he in de Johren 1917, 1919, 1920 un 1923 jeedmol den Titel World All-Around Rodeo Champion wunnen hett. Dordör is he vun Filmproduzenten opdeckt worrn, de em för Action- un Stuntszenen in Filmen hebben wulln.

Anfang vun de 1930er Johren löpen meist all Beraden, Fragen un de Utbilln för Action un Stunts as ok dat Planen vun Actionszenen över Canutt. In disse Tiet hett he ok veel mit den dormols noch jungen John Wayne tohopenarbeit, den he de Grundlagen vun’t Actiongewarf bibröcht hett. In eenige vun Wayne sien fröhen Filmen speelt he ok sülvst mit. Canutt kann as Pionier för en grote Reeg vun hüütige Stunts ansehn warrn.

In’t Johr 1939 möök Canutt in John Ford sien Western mit den Titel Stagecoach eenige vun sien beropensten Stunts. In de Rull vun en Indianer, de angriepen deit, is he ut vull’n Galopp vun sien Peerd op de Togpeerd vun en Postkutsch heekt. Dorna is he in Rull doodschaten worrn, leet sik twüschen de Peerd fallen und de Kutsch över sik röver rullen. Ok för John Wayne, de mit disse Film sien Dörbrook harr, hett he Stunts dorin maakt.

Ünner de Regie vun Andrew Marton hett Canutt 1959 ok dat spekatjuläre Wagenrennen in Ben Hur inszeneert.

Canutt harr twee Söhnen, Edward „Tap“ (* 1932) und Harry Joe (* 1937), un en Dochter, Audrea Elaine „Honey“ (* 1940). Ok sien Söhnen hebbt later as professionelle Stuntmen arbeit.

Filmrullen (Utwahl)[ännern | Bornkood ännern]

Canutt hett in sien Leven Stunts in mehr as 240 Filmprodukschonen maakt. Bito speel he aver ok in mehr as 180 Filmen mit, so as:

Johr	Titel	Synchroonsnacker
1920	The Girl Who Dared
1924	Branded a Bandit
1929	Riders of the Storm
1932	Guns for Hire
1933	Sagebrush Trail dt.: Sein Freund der Desperado
1933	Riders of Destiny dt.: Die Wasserrechte von Lost Creek
1934	Blue Steel dt.: Showdown am Adlerpaß
1934	Randy Rides Alone dt.: Der einsame Reiter
1934	The Lucky Texan dt.: Das Gold von Texas
1934	The Man from Utah dt.: Rodeo
1934	’Neath the Arizona Skies dt.: Unter dem Himmel von Arizona
1934	The Star Packer dt.: US Marshal John
1934	The Lawless Frontier dt.: Das Gesetz des Stärkeren
1935	The Dawn Rider dt.: Reiter in der Dämmerung
1935	Paradise Canyon dt.: Feuerwasser und frische Blüten
1935	Lawless Range dt.: Tal der Angst
1939	Wyoming Outlaw dt.: Der Bandit von Wyoming
1944	Pride of the Plains
1950	The Showdown dt.: Blutrache in Montana

Utteken[ännern | Bornkood ännern]

Canutt is mehrmols uttekent worrn. För sien Leistungen as Stuntman un de Sekerheitsreedschoppen, de he för sien Beroop utklamüstert hett is he 1967 mit en Ehrenoscar uttekent worrn. 1975 weer he in de Rodeo Hall of Fame of the Rodeo Historical Society opnahmen. Butendem is he ok in de Cowboy Hall of Fame in Oklahoma City vertreden. 1984 is he mit den Golden Boot uttekent worrn, un een Johr later kreeg he en Steern op’n Hollwood Walk of Fame.