Wilhelm Peßler

Wilhelm Karl Johannes Peßler (* 21. März 1880 in Riga; † 25. Februar 1962 in Hannober) weer en düütschen Volkskundler un Kulturhistoriker.

Peßler is as Söhn von en Dokter in Riga boren, aver al mit veer Johr na Hannober kamen. Dor hett he dat Raadsgymnasium besöcht un denn in Tübingen, Berlin, Göttingen, München, Leipzig un Königsbarg op Geologie, Geografie, Kunstwetenschoppen, Philosophie, Öllerdoomskunn un Düütsche Spraak- un Literaturwetenschoppen studeert. 1905 hett he sien Dokter maakt, mit de Dokterarbeid Das altsächsische Bauernhaus in seiner geographischen Verbreitung. Na sien Staatsexamen as Gymnasiallehrer hett he 1906/1907 sien Deenst bi’n Kommiss daan.

He weer denn wetenschoplichen Mitarbeider an verscheden Museums un von 1928 bet 1945 weer he Direkter von dat Vaderlandsche Museum in Hannober.

Peßler is 1962 doodbleven un liggt op’n Karkhoff Engesohde begraven.

Priesen

• 1951: Ehrenpräsident von de internationale Kommission för den europääschen Volksdoomatlas
• Ehrenmaat von’n Verband von de Vereens för Volkskunn
• 1960: Verdeenstkrüüz 1. Klass von de Bundsrepubliek Düütschland
• 1961: Stadtplakett Hannober

Warken

• Das Heimatmuseum im deutschen Sprachgebiet als Spiegel deutscher Kultur. 1927
• Plattdeutscher Wort-Atlas von Nordwestdeutschland. 1928
• Volkstumsatlas von Niedersachsen. 1933
• Niederdeutschland. Landschaft und Volkstum. 1940
• Stammeskunde von Niedersachsen. 1943