Warft (Bowark)

Vun Wikipedia
Wesseln na: Navigatschoon, Söök
Warft up de Hallig Hooge

Ene Warft, dor warrt ok Warf, Wurt oder Woort to seggt, is en lüttjen Barg, de künstlich ut Eer tohopenschütt wurrn is. He is tomeist rund un dor warrt up siedelt, dormit Huus un Hoff bi Stormfloot dröge blievt. Je nadem, wo groot de Warft is, könnt dor enkelte Hööv up stahn, man ok ganze Dörper. Warften finnt sik in de noordwestdüütsche Masch un in de Noordsee up de Halligen, man ok in de Nedderlannen un in Däänmark. Al vun dat 3. Johrhunnert v. Chr. af an gifft dat düsse künstlichen Hövels. Ehr dat de Dieken boot wurrn sünd, weer dat de eenzige Schutz, de gegen dat Hoochwater helpen dö.

Naam[ännern | Bornkood ännern]

För Warft gifft dat ok allerhand annere Naams, as Warf, Wurt, Werft, Wierde un Terp. Oorsprünglich hett dat Woort woll Warf heten, so as dat in Oostfreesland noch hüdigendags begäng is. Bi Warft is denn later en –t anbackt wurrn. De Wöör Warf(t) un Werft kaamt wohrschienlich vun dat Verb „warven“ un hefft nix to kriegen mit dat hoochdüütsche Woort „werfen“, wat ja ok up Platt „smieten“ heten dö. Wierde un Wurt hangt mit „Werder“ oder „Warder“ tohopen, wat an un for sik en Insel in en Stroom is. In de Nedderlannen gifft dat Warften besunners in de Provinz Freesland un Provinz Grunneng. Dor heet se Terp, Tarp oder Wierde. In Däänmark weert se „vaerfter“ nömmt.