Wadati-Benioff-Zoon

Vun Wikipedia
Wesseln na: Navigatschoon, Söök
Diagramm vun en Wadati-Benioff-Zoon

As Wadati-Benioff-Zonen (fakener ok as Benioff-Zoon afkört) betekent Seismologen Rebeden binnen de Eer, de dör jümmer deeper warrn Hypozentren vun Eerdbeven kenntekent sünd. Disse Eerdbeven laat sik in en Diagramm as en tosamenhangen Band dorstellen (Bild). Se enstaht in de spröden Eerdköst vun en – normalerwies ozeaanschen – Kontinentalplatt, de in Sudukschoonszonen ünner en annere Platt drück warrt un in’n Eerdmantel afduukt. De Opdecken vun de Wadati-Benioff-Zonen weer in verleden Tieten en wichtigen Henwies op de Kontinentaldrift as bedüden Bestanddeel vun de Platentektonik.

En Markmol vun Wadati-Benioof-Zonen is ok de Ümkehr vun de geothermischen Deepenstoop, vun wegen dat sik de Steen in de subduzeeren Platt blots bannig langsom ophitten deit. As de teeemlich kolle Platt noch lang sprööd blifft un dör dat Afduken un Ümbögen stark belast warrt, finnt dor de meisten Eerdbeven statt, de bit in en Deep vun 700 km vörkamen künnt. Man, in de groden Deep is dat nich mehr de Eerdköst, de vör de Eerdbeven verantwoortlich is. Dor wirkt denn annere Mechanismen, de mit Mineralümwanneln to kriegen hebbt.

Opdeckt weern de Wadati-Benioff-Zonen vun jemehr Naamsgevers, neemlich den US-amerikaanschen Seismologen Hugo Benioff un sien japaanschen Kollegen Kiyoo Wadati.