Vila Nova Sintra

Vun Wikipedia
De bannig gröne Stadt Vila Nova Sintra vun baven bekeken

Vila Nova Sintra is en lütte Stadt op dat Eiland Brava in de Republiek Kap Verde un togliek ok de Hööftstadt vun dat Eiland.

Geografie[ännern | Bornkood ännern]

Vila Nova Sintra liggt in de Bargen vun Brava op ruchweg 500 Meter Hööch bi de Koordinaten 14°53’17,3’’N un 24°40’47,0’’W. Vun buten dat Eiland kann een dor blots över dat Fischerdörp un den Haven vun Furna henkamen. De beiden Öörd sünd aver twee Straten verbunnen, wovun aver blots de ne’ere för den Autoverkehr egent is. Vun Vila Nova Sintra na Furna bruukt man ungefähr en Veerdel Stünn. Wieldat de Stadt vergliekswies hooch liggt un faken Wulken in de Bargens hangen blievt, is de Temperatur hier tomeist wat sieter, as dat in de Tropen vermodt warrt. Na de letzte Bereken vun de Inwahnertall 2005 harr de Hööftstadt vun Brava 1.873 Inwahners. Dat is en good Fööfdel vun de ganzen Minschen op dat Eiland.

Dat Stadtbild vun Vila Sintra Nova is teemlich ruhig un gröön. Enge Straten gifft dat blots en poor, tomehrst is aver veel Ruum laten för Bööm, so dat sik de Hööftstraten as Alleen wiesen doot. De zentrale Steed vun de Stadt is de Praça Eugénio Tavares, nöömt na den beropen Musiker un Meester vun de Morna-Musik Eugénio Tavares, de ok vun veele Bloombetten verschönt warrt. Dor gifft dat ok en Pavillon för Musikvörföhren. De breden Alleen loopt ut all veer Richten op dissen Platz to.[1]

Historie un Naam[ännern | Bornkood ännern]

De Naam vun de Stadt is afleidt vun de königliche Sommerresidenz Sintra in Portugal. In’t 18. un 19. Johrhunnert weer de lütte Stadt in Sommer en geern besochten Oort, woneem sik vör allen ok de Adeligen un Kolonialbeamten ut Santiago ophollen hebbt. Dat de Oort ok vundaag noch so smuck is, liggt an’t Geld. In de verleden Tiet sünd vele vun de Inwahners tietwies na Amerika utwannert un hebbt, as se een Dag na Brava wedder torüch kamen sünd, jemehr Penunsen in de feinen ollen Hüüs investeert un jem wedder torecht maakt.[1] De Regeeren vun’t Eiland sorgt dorför, dat dat smucke Bild vun de Stadt ok in de Tokunft överduert. Se hett neemlich anordent, dat ne’e Hüüs, de op dat Eiland un sünners in Vila Nova Sintra boot warrt vun’n Stil her to de ollen Hüüs in’n Kolonialstil passen mööt.[2]

Borns[ännern | Bornkood ännern]

  1. a b Kapverdische Inseln, Dumont Reisetaschenbuch, 3. Oplaag, 2007, ISBN 3-7701-5968-3
  2. Na’t Vertellen vun Inwahners vun de Stadt, 2007