Under Capricorn
| Filmdaten | |
|---|---|
| Plattdüütsch Titel: | — |
| Originaltitel: | Under Capricorn |
| Düütsch Titel: | Sklavin des Herzens |
| Produkschoonsland: | Grootbritannien |
| Johr vun’t Rutkamen: | 1949 |
| Läng: | 112 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Alfred Hitchcock |
| Dreihbook: | John Colton Margaret Linden Hume Cronyn James Bridie |
| Produkschoon: | Sidney Bernstein Alfred Hitchcock |
| Musik: | Richard Addinsell |
| Kamera: | Jack Cardiff |
| Snitt: | Bert Bates |
| Dorstellers | |
| |
Under Capricorn (op platt so veel as „Ünner’n Steenbuck“; dt. Titel: Sklavin des Herzens) is de Titel vun en britschen Filmdrama ut dat Johr 1949 vun den Speelbaas Alfred Hitchcock. De Film baseert op den Roman Under Capricorn vun Helen Simpson, de 1937 rutkamen is.
Inholt[ännern | Bornkood ännern]
De Film speelt in’t Johr 1831. De vörnehme aver rünnerkamen Ire Charles Adare reist na Australien, üm in Sydney mit de Hülp vun sien Vedder, de jüst Gouverneur worrn is, in nee Leven antofangen. As he ahn Geld ankummt dröpt he den „freelaten“ (ehmoligen Straaffangenen) Landbesitter Sam Flusky, de intwüschen mit Spood Gewarf bedrieven deit. Bi en Dinner-Party stellt he fast, dat Flusky sien Ehfro Henrietta en Fründin ut Kinnertieten is. Man, Henrietta is alkoholkrank un hett af un to Halluzinatschonen. De Huusholt warrt vun de jungen Huushollersche Milly föhrt, de sik oogenschienlich in Sam verkeken hett.
Flusky is en akzepteerten Gewarfsmann, man in de Sellschop is he as ehmoligen Fangenen nich hooch acht. He is neemlich in Irland för den Moord an Henrietta ehern Broder veroordeelt worrn. Blots wegen ’n poor apene Twievel is he nich an’n Galgen kamen, man mit söven Johr Verbannung bestraaft. Henrietta is mit em na Australien gahn. As he wedder free weer, hebbt se sik in Sydney ansiedelt. Mit de Tiet hett de Eh aver leden un Henrietta is an’n Alkohol kamen.
Charles, de nix op de sellschopplichen Wennsten in de Straafkolonie geven deit, gifft Henrietta ne’en Levensmoot. Sam ünnerstütt em dorbi, nadem he de Hapen al opgeven harr. Mit de Tiet aver verkiekt sik Charles in Henrietta. Milly, der ehr Positschoon in’t Huus in Gefohr sütt, fangt nu an Intrigen to spinnen un drifft Sam in de Ieversucht. Op en Fest vun’n Gouverneur gifft dat denn aver Schandaal, as Charles sik sülvst mit Henrietta inladdt hett un op eenmol Sam dor opduken deit.
Henrietta sütt dorna keen annern Utweg, as Charles de Wohrheit to vertellen: Dat weer neemlich nich Sam, de ehrn Broder doodschaten hett, man se sülvst – in Nootwehr. Sam hett dormols de Schuld un de Straaf op sik nahmen, üm Henrietta to schulen. Dat Geheemnis wulln se nienich wietergeven. Sam kummt dorto un smitt Charles ut dat Huus. Dorbi kummt dat to en Kappelee, bi dat Sam sien Pistool losgeiht. Charles warrt dorbi drapen un swoor besehrt. Sam warrt anschulligt, en Moord an Charles versöcht to hebben. Disse tweete Fall de em seker an’n Galgen bringen. As Henrietta nu jemehr Geheemnis apentlich maakt, glöövt ehr nümms. Nich toletzt ok, vunwegen dat Sam as de eenzige Tüüg ehr Utseggen nich stütten deit. Se is bannig vertwievelt un fangt – anstift vun Milly – wedder an to supen.
Dör en Tofall finnt Henrietta rut, dat Milly achter ehr Halluzinatschonen steken deit – se harr en Schrumpelkopp in Henriettas Bett leggt – un dat Milly sogor ok versöcht hett ehr to vergiften. Ok Sam sütt nu, woans dat allns tosamenspeelt. Dat neemlich Milly vun Anfang an ut Leev to Sam Intrigen gegen Henrietta maakt hett un ehr to’n Supen bröcht hett.
Der Generalstaatsafkaat kummt nu un will vun Sam weten, wat de Utseggen vun sien Fro wohr sünd oder nich. Em de dat vör den Galgen redden, man Henrietta müss torüch na Irland, üm dor ehr Oordeel to kriegen. Dat will Sam aver nich un swiggt still. Dorophen warrt he in Haft nahmen. Hülp kriggt he vun Charles, de utseggt, dat sik dat bi sien Besehren üm en Unfall hannelt hett. Dormit steiht nix mehr gegen Sam. Charles reist torüch na Irland, wiel Sam un Henrietta in Sydney blievt.
Kritik[ännern | Bornkood ännern]
De Film weer vun de Kritikers un vun de Tokiekers to’n groten Deel slecht opnahmen. Dat künn dormit to doon hebben, dat de Lüüd, de den Roman leest harrn, en Kummedie vermoodt weern, wat de Film aver nich is.[1]. Annere wulln en för Hitchcock tyypschen Thriller sehn, wat de Film aver ok nich is. Dorto keem, dat de ehbrekerische Affär vun Ingrid Bergmann mit den italieenschen Speelbaas Roberto Rossellini in de prüden USA nich jüst to en go’e Kritik bidragen hett. In Europa is de Film veel beter opnahmen worrn. Tallrieke franzöösche Kritikers tellt den Film to Hitchcock sien Meesterstücken.[2]
Dat Lexikon vun’n internatschonalen Film beschreev den Film as en histoorsch Melodram över Oppers un Schuld. He wies en starke Atmosphäär aver wenig Spannung.[3] In den New York Herald Tribune stünn to lesen, dat Hitchcock, de Meester vun’t Melodram, stolpert is. Ünner de Lüüd, de den Film gau vergeten wullen, weer wohrschienlich ok Hitchcock sülvst.
Achtergrund[ännern | Bornkood ännern]
Under Capricorn is de tweete Farvfilm vun Hitchcock. He wähl dorför en Technik jüst so as bi Rope (1948) mit lange Dialogen ahn to Snieden. Dorbi hett he to’n Deel gewaltige Kamerafohrten för de dormolige Tiet ünnernahmen. Hitchcock hett een vun sien leefsten Themen üm Schuld un Sühn in den Film verarbeit: Henrietta un Sam sünd dör jemehr düster’t Geheemnis anenanner bunnen. He nimmt ehr Schuld op sik. En Drüdden, Charles, oppert sien Leev to Henrietta, üm de beiden vun jemehr Pien un Last free to maken. De Utgangspositschoon vun dat Poor Sam un Henrietta mit jemehr Geheemnis lett ’n beten an Rebecca (1940) oder an Suspicion (1941) denken.
De Rull vun Ingrid Bergman is en Variatschoon to ehr Rull in Notorious (1946). Ok dormols hett se en Drinkersche speelt, de sik wegen en Schuld ut verleden Tiet an ehrn Ehmann binnt. In beide Filmen versöcht en Fro (hier de Huushollersche, in den annern de Swiegermudder) ehr to vergiften un in beide Fäll warrt se vun een Mann vun buten rett, de ehr leev hett. De Rull vun de Huushollersche Milly lett wedder stark an de Rull vun Mrs. Danvers in Rebecca (1940) denken.
De Bergmann weer vun Anfang an Hitchcock sien Wunschbesetten för de Rull. As Sam, den ehmoligen Stalljungen, harr he aver lever Burt Lancaster anstellt, de na Hitchcock sien Vertellen „den Stallröök ansehn“ künn. Finanziell is de Film en Rinfall worrn, wat opletzt de Produkschoonsfirma Transatlantic den Ünnergang bröcht hett.
Hitchcock hett in disse Film twee Cameo-Optreden: He is mit en Mantel un brunen Hoot op’n Marktplatz to sehn, teihn Minuuten later is he noch mol to sehn as een vun dree Mannslüüd op de Treppen vun dat Gouverneurs-Huus.
Literatur[ännern | Bornkood ännern]
- Helen Simpson: Under Capricorn. W. Heinemann, London un Toronto 1937, 305 S.
- Robert A. Harris, Michael S. Lasky, Rgv. Joe Hembus: Alfred Hitchcock und seine Filme (OT: The Films of Alfred Hitchcock). Citadel-Filmbook bi Goldmann, München 1976, ISBN 3-442-10201-4
Borns[ännern | Bornkood ännern]
- ↑ Robert A. Harris, Michael S. Lasky, Joe Hembus (Rgv.): Alfred Hitchcock und seine Filme, Wilhelm Goldmann Verlag, München, 1976 (Originalutgaav)
- ↑ IMDb; Stand 10. Feb. 2009
- ↑ Filmkritik in’t Lexikon vun’n internatschonalen Film
Weblenken[ännern | Bornkood ännern]
- Under Capricorn in de Internet Movie Database (engelsch)