Ulf Merbold
Ulf Dietrich Merbold (* 20. Juni 1941 in Greiz, Döringen) is en düütsch Physiker un ehmalger Ruumfohrer. He weer 1983 (fiev Johr nah Sigmund Jähn) de tweete Düütsche un de eerste Bundsdüütsche in’t Weltall. Merbold un Jähn wussen blots ruch weg 40 Kilometer vun’nanner weg in’t Vogtland up.
Leven[ännern | Bornkood ännern]
Merbold weer dat eenzige Kind vun en Schoolmeesterehepaar. Sien Vader is 1948 in’t KZ Buchenwald storven, nahdem hüm Suldaten vun de Roode Armee 1945 dorin staken hebbt.
1960 hett Merbold sien Abitur in Greiz absolviert. In de DDR kunn he dormals aber nich studeeren (he weer nich Liddmaat vun de FDJ oder SED) worup henn he denn nah Berlin gahn is un studeert Physik hett. Dat Studium hett he af 1962 in Stuttgart wieder föhrt, kreeg söss Johr later sien Diplom un 1976 hett he an de Universität Stuttgart sien Dokter makt (Dr. rer. nat.).
Merbold weer siet 1973 an dat Stuttgarter Max-Planck-Institut för Metallforschung anstellt.
Ruumfohrer[ännern | Bornkood ännern]
Merbold hett sück 1977 as Ruumfohrer bi dat Düütsch Zentrum för Luft- un Ruumfohrt bewurben. De düütsch Kandidaten sünd denn mit Kandidaten vun anner Länner vun de ESA utkeken wurrn. Letztlich hebbt se vun över 700 Bewerber dree Mann utsöcht: Ulf Merbold, Claude Nicollier ut de Swiez un Wubbo Ockels ut den Nedderlannen.
All dree ESA-Astronauten hebbt sück dornah tosommen up en Floog vörbereidt. In Harvst 1982 is aber denn Ulf Merbold utwählt wurrn, as Eerst to flegen. Een Johr later is he denn mit de Mission STS-9 ünner dat Kommando vun John Young an Boord vun en Space Shuttle in’t All flagen. He weer ok to glieker Tiet de eerste Nicht-US-Bürger, de mit dat Space-Shuttle flagen is. 72 wetenschapliche Experimente in acht Disziplinen stunn up’d Programm, vun Biologie, över Plasmaphysik un Astronomie bit to Materialweteschapen. In twee Schichten hebbt se dorbi immer arbeidt, dormit dat Forschungsmodul Spacelab ok good utlast weer. An Bord weern dorto Brewster Hopkinson Shaw (Pilot), Robert Alan Ridley Parker, Owen Kent Garriott (Missionsspezialisten) as ok Byron Kurt Lichtenberg. Disse Mission düer 10 Daag un 7 Stünnen.
Dornah hett he eerst mal verscheeden anner Funktschonen in de Beriek Ruumfohrt övernommen, so weer he ok Baas vun’t Astronautenbüro in Köln.
Enn’n 1988 wurr Merbold as een vun de Kandidaten för noch en Spacelab-Mission upstellt: dree Johr lang hett he denn för STS-42 öövt, dat eerste internatschonale Ünnernehmen för Swoorlosigkeitsforschung. Een Week lang hett he in’ Januar 1992 tosommen mit sien kanaadsch Kollegin Roberta Lynn Bondar an Bord vun de Ruumschipp Ruumfähr Discovery de wetenschapliche Arbeit makt. De anner Liddmaaten vun de Mannschap weern Ronald John Grabe (Kommdandant), Steven Scot Oswald (Pilot), Norman Earl Thagard, William Francis Readdy un David Carl Hilmers. De Mission düer 8 Daag, 1 Stünn un 14 Minüüt.
Nahdem Merbold de wetenschplichen Aspekte bi de tweete düütsche Spacelab-Mission D-2 koordineert harr, hett he in’ August 1993 en Utbildung in dat Juri-Gagarin-Kosmonautentrainingszentrum in Moskau antreden. Tosommen mit den spaanschen Ruumfohrer Pedro Duque hett he dor för de europäisch-russ’sch Kooperatschonsfloog „Euromir 94“ öövt. Duque wurr Ersatzmann för Merbold, de Anfang Oktober 1994 mit de Kosmonauten Alexander Wiktorenko (Kommandant) un Jelena Kondakowa (Bordingenieurin) to sien darte Mission start is. Een Maand lang flog Merbold as eerst ESA-Astronaut up de russ’sch Ruumstatschon Mir un dorbi den bit dorhenn längsten Upholt vun en Westeuropäer in’t All absolveert. Ruch weg 30 Experimente hett he dorbit dörföhrt. Torüchkehrt is he mit de Kosmonauten Juri Iwanowitsch Malentschenko un Talghat Mussabajew.
In’ Januar 1995 övernehm Merbold de Ledd vun de Astronautenafdeelen in Köln. Dree Johr later hett man hüm nach Noordwijk versett, wo he för de ESA in’t Direktorat för bemannt Ruumfohrt arbeidt hett.
Siet 2004 is Merbold as Ruumfohrer pensioneert, hett aber en Beraterverdrag mit de ESA un hollt Vördrääg to de Themenkomplex „Wetenschap in’t Weltruum“.
Persönliches[ännern | Bornkood ännern]
Merbold is siet 1969 mit Birgit Riester verheiraadt, mit de he twee Kinner hett (en Dochter un en Söhn). He leevt in Stuttgart. Merbold hett dat Bundsverdeenstkrüüz Eerster Klass kregen un ok den russch Oorden der Früendschap. Nah hüm is de Asteroid (10972) Merbold nömmt wurrn.
In sien Freetiet deiht Merbold Segefleegen un hett ok en Segelfloogtüüch. He hett ok en Pilotenschien för Motorfloogtüüch un is Amateurfunker.
Literatur[ännern | Bornkood ännern]
- D1 – unser Weg ins All; Braunschweig; Westermann; 1985; ISBN 3-07-508886-2
- Flug ins All. Von Spacelab 1 bis zur D1-Mission; Bergisch Gladbach; Lübbe Verlagsgruppe; 1986; ISBN 3-7857-0399-6
