US-Präsidentenwahl 2008

Vun Wikipedia
Wat bither to bi de Wahlen rutkamen is (Wie de Wahllüde verdeelt sünd up de Bundsstaten
För Barack Obama (Demokraten): 27 Staaten + DC, 349 Wahllüde; för John McCain (Republikaner): 22 Staaten, 163 Wahllüde. An'n 5. November noch nich toenn tellt: 2 Staaten (North Carolina, Missouri), 26 Wahllüde
Wat bi de US-Präsidentenwahl in de enkelten Counties rutkamen is:
(Blau:Mehrheit för Obama; root:Mehrheit för McCain)

De 56. US-Präsidentenwahlen sünd an’n 4. November 2008 ween. Bi düsse US-Präsidentenwahlen is dor över afstimmt wurrn, wen up George W. Bush folgen scholl as de neegste US-Präsident. Na de Verfaten vun de USA draff en Präsident vun de USA nich mehr, as tweemol achternanner sien Amt utöven. So, as dat utsütt, is de Kannedat vun de Demokraatsche Partei, Barack Obama de nee Präsident. Sien Gegenspeler weer Senator John McCain vun de Republikaansche Partei. He hett düütlich gegen Obama verloren.

De US-Präsident warrt nich direkt wählt. Jede US-Bundsstaat wählt en bestimmte Tall vun Wahllüde, de denn to en latern Termin den Präsidenten wählt. De Masse vun Wahllüde in de enkelten Bundsstaten weer bi de Wahlen vun 2008 desülvige, as al veer Johren tovörn un harr ehre Grundlaag up de Volkstellen vun dat Johr 2000. An’n 15. Dezember 2008 geevt de Wahllüde denn jem ehre Stimmen för en vun de beiden Präsidenten-Kannedaten af. Dor sünd se avers nich bi dwungen, dat se densülvigen Kannedaten wählt, för den se in dat Gremium intagen sünd. Dorüm gifft dat jummers enkelte „faithless electors“. Dat is de Naam för de Wahllüde, de för en annern Kannedaten stimmt. Man Barack Obama hett düütlich mehr as de 270 Wahllüde, de nödig sünd, wenn een Präsident weern will. Dorüm is dat nich wohrschienlich, dat he nich Präsident weern schall.

Anfang Januar kümmt denn de US-Kongress tohopen un stellt fast, wat bi de Wahllüde ehre Wahl rutkamen is. Normolerwiese passeert dat an’n 3. Januar. Sien Eed schall de nee Präsident denn an’n 20. Januar afleggen. Bit to düssen Dag warrt de neegste Präsident as „Wählt Präsident“ („President-Elect“) ankeken.