Two Weeks Notice

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Two Weeks Notice
Düütsch Titel: Ein Chef zum Verlieben
Produkschoonsland: USA, Australien
Johr vun’t Rutkamen: 2002
Läng: 97 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Marc Lawrence
Dreihbook: Marc Lawrence
Produkschoon: Sandra Bullock
Musik: John Powell
Kamera: László Kovács
Snitt: Susan E. Morse
Szenenbild: Peter S. Larkin
Kledaasch: Gary Jones
Dorstellers

Two Weeks Notice (op Platt so veel as „Twee Weken Künnigungsfrist“; dt. Titel: Ein Chef zum Verlieben) is en romantische Filmkummedie ut dat Johr 2002. Speelbaas vun den Film weer Marc Lawrence, de ok sülvst dat Dreihbook schreven hett. In de Hööftrullen spelen Sandra Bullock un Hugh Grant.

Inholt[ännern | Bornkood ännern]

Lucy Kelson is en sozial un ökoloogsch engageerte Afkaatsche ut New York City. Se sett sik gegen Boplaans in, bi de soziale Fragen to wenig bedacht un histoorsche Strukturen tonichten maakt warrt. Mit aktivistische Akschonen geiht se ünner annern ok gegen Boprojekten vun de Firma Wade Corporation vör. Dorbi nimmt se in Koop, dat se ok mol vun de Polizei insparrt warrt. As se versöcht, dat Afrieten vun en histoorsch Huus in ehrn Heimat-Stadtdeel Coney Island, neemlich dat Gemeenzentrum Cone Island Community Center, to hinnern, wennt se sik direkt an George Wade, de tosamen mit sien Broder Howard, de Firma föhrt.

George Wade is en rieken Snösel, de bito ok noch bekannt is för sien Affären. De is nu jüst op de Söök na en ne’e Afkaatsche. As Lucy nu mit em över dat Projekt snacken will, is he vun ehr glieks so andoon, dat he ehr op’n Slag de apene Steed on sien Firma anbeden deit. Se will dorvun an sik nix weten, geiht aver liekers op dat Anbott in, as George ehr verspreken deit, dat he dat Gemeenzentrum redden deit un ehr ok mitsnacken lett bi ne Boprojekten un bi’t Verdeelen vun Spennengeller vun de Firma.

Mit ehrn Fründ Ansel kann Lucy blots jümmers kort telefoneeren, vun wegen dat he op’n Schipp vun Greenpeace ünnerwegens is. Na’n Striet maakt se Sluss mit em. Dör ehr groot Weten in’n Beroop övertüügt se Wade vun ehr un ehr Antipathie, de se toeerst för George harr, wannelt sik mit de Tiet in Sympathie, bit se sik opletzt sogors in em verkieken deit. As de beiden aver vullstännig ünnerscheedliche Levensinstellen un politische Ansichten hebbt, will se sik dat nich tostahn un ünnerdrückt ehr Geföhlen. Ok Wade föhlt sik vun ehr antogen un bedeeligt ehr jümmer mehr an all de Entscheeden in’n Beroop aver ok privat. Man Lucy geiht dat gau gegen den Streek, dat George ehr jümmer anropen deit un ehr dorbi ok in de Nacht ut’n Slaap hollt. Binnen in mutt se mit sik kämpen twüschen ehr Geföhlen un dat Aflehnen vun Wades Ansichten, wat ehr teemlich mitnimmt. As se dat nich länger uthollen will, künnigt se ehrn Job mit en Frist vun twee Weken as ehr Verdrag dat vörsütt (two weeks notice).

George Wade mag ehr aver nich eenfach gahn laten, gifft aver sien Wedderstand op, as Lucy em dorna fraagt. He gifft ehr aver den Opdrag, en Nafolgersche för ehr Steed to söken. De Afkaatsche June Carver kummt ahn Anmellen in de Firma, üm sik to bewarven. Se snackt mit Lucy un fangt ok foorts an, mit George to flirten, de ehr op de Steed instellen deit. Bi en Avendveranstalten geiht June mit George un lannt dorna mit em tosamen in sien Wahnung. As Lucy dor opduken deit, finnt se de beiden dor, as se blots noch wenig Kledaasch an’n Lief hebbt, vun wegen dat se jüst „Strip-Schach“ speelt.

Op Druck vun Howard tütt George unvermodens sien Woort torüch, dat he dat Gemeenzentrum redden will. Lucy is dorvun bannig daalslahn un leggt sik mit em an – nich toletzt ok, as se ehr Geföhlen besehrt sütt wegen de Saak mit June. Se tütt sik vun em torüch un arbeit in de Folg wedder in’t Afkaathelpsvereen Legal Aid för sozial Swacke.

In’n Sinn vun Lucy versprikt George denn aber bi’t Grundsteenleggen vun en Neebokumplex, dat Gemeenzentrum doch to wohren un sett sik af vun’t Bevörmunnen dör sien Broder as ok vun de gemeensome Firma. He geiht na Lucy in’n Afkaathelpsvereen, woneem sik beide na eenige ümständliche Verkloren opletzt toseggt, dat se sik geern hebbt.

Kritiken[ännern | Bornkood ännern]

David Rooney hett an’n 14. Dezember 2002 in Variety schreven, dat de Film nich so „frisch“ is as Miss Congeniality. De Dorstellen vun Bullock un Grant in’n Film hett he as „leeftallig“ betekent, man togliek meen he, dat „de Chemie twüschen de Hööftdorstellers nich stimm“.

Utteken[ännern | Bornkood ännern]

De Film weer för veer Filmpriesen vörslahn. Wunnen hett he een Pries:

Weblenken[ännern | Bornkood ännern]