Tokenismus

Vun Wikipedia
Wesseln na: Navigatschoon, Söök

Tokenismus (von engelsch token „Teken“) betekent dat Vörkamen von Maten von Minnerheiten bi Firmen, in de Politik, in Films etc., de blot dorüm vörkaamt, na buten to wiesen, dat dat keen Diskrimineren gifft.

Mit disse Personen schall rutstellt warrn, dat Maten von de Minnerheit nich utslaten warrt, dat se jüstso Togang to all Positionen hebbt, oder eenfach blot dat en Antidiskriminerungsgesett nakamen is.

Disse Tokenismus hett vör allen in de amerikaansche Sellschop veel Bedüden, de en groot Bewusstsien för Rassen hett. Bi en Film as High School Musical to’n Bispeel warrt von de Produzenten jümmer dor op acht, dat blangen witte junge Lüüd ok jümmer Swarte un Lüüd mit annere Rassen vörkaamt. Dat bedrippt aver nich blot Rassen. In High School Musical, wo all Lüüd good un slank utseht, is de Charakter Martha Cox de eenzige, de beten wat propper is, un as Token de Dicken repräsenteert.

Aver Tokenismus kummt in all Sellschoppen vör, in de ole soziale Gruppengrenzen op jüngere polietsche Korrektheit drippt. To’n Bispeel de „Quotenfro“, de en parteipolietsch Amt kriggt, dat dat Verhältnis von Mannslüüd un Froonslüüd in de Partei utglekener is, ok wenn ans villicht al en Mann vör dat Amt vörsehn weer.

In’n Libanon is de Tokenismus twischen de Volksgruppen so wied gahn, dat he 1943 mit’n Natschonalpakt institutionaliseert worrn is. Sieddem sünd de wichtigsten Staatsämter fast an en bestimmte Religion bunnen.

Ok verwandt is de Symbolpolitik.