Tittbuddel

Vun Wikipedia
Wesseln na: Navigatschoon, Söök
En Baby drinkt ut en Tittbuddel
Verscheden Grötten

En Tittbuddel is en Buddel mit Suugtitt baven op. Se warrt bruukt, üm lütte Kinner oder lütte Söögdeerten, de noch Tittmelk drinkt, optoföden. Aver ok anner Saken to drinken, so as Sapp, Tee etc. köönt dör en Tittbuddel opnahmen warrn.

Dat Drinken warrt dorbi in’e Regel warm maakt op Körpertemperatur. Dat geiht opbest över en Waterbad oder spezielle Buddelwarmers. De Mikrowell is dor nich good för, dor kann sik dat Kind de Snuut bi verbrennen, wenn dat Drinken unliek warm warrt.

En Probleem bi dat Drinken ut de Tittbuddel för Kinner is dat Tittbuddel-Syndroom, wat en Form von Karies is.

Dat is wichtig, dat de Suger un de Buddel jümmer good reinmaakt un afkaakt warrt, dat sik dor kene Kiem’ in utbreedt.

De Buddels sünd mehrstentieds ut Polykarbonat oder Glas. Polykarbonat hett den Nadeel, dat dat Bisphenol A afgeven kann. Glas wieldes hett den Nadeel, dat dat sworer is un lichter brickt.

Geschicht[ännern | Bornkood ännern]

Drinkbuddels gifft dat al siet ole Tied. De Suger weer mehrstentieds ut Ledder oder Kattuun. Eerst as dat vulkaniseert Gummi opkamen is, geev dat en week Material, dat sik ok good rein maken lett. Dat eerste Patent op en Gummisuger hett 1845 Elijah Pratt ut New York kregen. Eerst in’t 20. Johrhunnert sünd de Materalen denn beter un weker worrn, dat de ok veel bruukt worrn sünd. In de Johren 1930 is de Latex-Suger opkamen un in de Johren 1960 de Suger ut Polykarbonat.