Tito Okello

Vun Wikipedia
Wesseln na: Navigatschoon, Söök

Tito Lutwa Okello (* 1914; † 3. Juni 1996) weer en ugandschen Politiker.

General Okello, en Acholi un Kommandör vun de ugandsche Armee, nehm 1985 den Kamp gegen de Regeren vun Milton Obote op. In de Armee weren vele Acholi, doch dat Leid harrn mehrsttiets de Lüüd vun’t Volk vun de Langi. Untofreden hebbt se meutert. De Offizier Bazilio Olara Okello, ok en Acholi, marscheer mit siene Soldaten vun de Ugandsche Natschonale Befreeungsarmee op de Hööftstadt Kampala un nehm se op’n 27. Juli 1985 in. För twee Daag harr he dat Leid, denn övernehm Tito Okello dat Amt vun’n Präsident.

He hett de Verfaten un de Regeren afsett, dat Parlament oplööst un de Grenzen to Uganda slaten. He hett aver ok alle Parteien inladen, an de Regeren deel to hebben. De Fröhere Ugandsche Natschonalarmee, de Föderal-Demokraatsche Bewegung vun Uganda, de Ugandsche Freeheitsbewegung un de Ugandsche Natschonale Rettungsfront sünd dissen Oproop folgt, doch de Natschonale Wedderstandsarmee ünner Yoweri Museveni wull nich mitmaken, vun wegen dat fief vun neen Maten in den Militärraat, de nu regeren schull, Acholis weren. As Okello Paulo Muwanga as Premierminister insett, de al ünner Obote Minister för Verdedigen wesen is un ok för vele Kriegsverbreken verantwoortlich weer, füng de Natschonale Wedderstandsarmee an, gegen Okello sien Regeren to kämpen. Okello teh Muwanga as Premierminister trüch un sett Abraham Waligo in.

Okello un Museveni drepen sik nu twischen 26. August un 17. Dezember to Fredensgespreken in Nairobi in Kenia. Se kunnen en Freden afsluten. Vörsehn weer, dat beide Gruppen an de Regeren Andeel hebben schullen. Doch al twee Weken na den Freden an’n 31. Dezember weer dat wedder ut. Okello segg, dat Museveni sik nich an den Freden hollen harr. De Kamp güng wieder. In’n Januar 1986 weer dat denn ut för Okello. De Natschonale Wedderstandsarmee harr Kampala an’n 26. Januar innahmen.

Sien Söhn Henry Oryem Okello weer later ok Politiker.