Tina Bachmann (Biathletin)
Tina Bachmann (* 15. Juli 1986 in Schmiedeberg) is en ehmalge düütsch Biathletin.
Loopbahn[ännern | Bornkood ännern]
Tina Bachmann fung mit dree Johr mit dat Skiloopen an un traineer siet 1997 bi den SSV Altenberg. Later is se to de SG Stahl Schmiedeberg wesselt. Mit twalf Johren is se in dat Internat vun de Eliteschule des Sports vun dat Bergstadtgymnasium „Glück Auf“ Altenberg wesselt un hett dor 2004 hör Abitur maakt. Dornah wessel se to de Bundspolizeisportschool Bad Endorf un hett intüschen hör Utbillen to'n Polizeiobermeisterin afslooten.[1] Traineert wurrd se dor vun Tobias Reiter un Remo Krug.[2]
Eersten Spood harr Bachmann all in de Jöögd un bi de Junioren. 2004 kunn se all in den C-Kader vun dat düütsch Natschonalteam uprücken. 2007 stunn se denn all in den B-Kader.
Noch wiels de Saison 2006/07 steeg Bachmann in den Biathlon-Europacup up. Hör eerst Rennen hett se in Nove Mesto bestreeden, wo se up den 8. Platz keem. Ok in de wiedere Rennen keem se meest immer ünner de best Teihn un an’ Enn’ keem se ok up Platz Teihn in de Gesamtafreeken. Bi de düütsch Meesterschap keem se in’t Eenzel up den sössten Platz. De Saison 2007/08 fung mit en darten Platz in’ Sprint vun Geilo bannig goot an, mit de Staffel wurr se in Osrblie Tweet. Bi den Hööchpunkt vun de Saison, de Europameesterschap in Nove Mesto, keem se in de Eenzelrennen nich so goot torecht, de Staffel mit Bachmann, Ute Niziak, Juliane Döll un Jenny Adler wunn aber de Sülvermedaille. De eerste Sieg in’ Europacup gelung hör an’ 12. März 2008 in dat Sprintrennen in Valromey-Retord. 2009 nehm Tina Bachmann weer an de Biathlon-Europameesterschapen dee. Nah twee veert Platzen in’ Sprint un in de Verfolgung wunn se in de Staffel gemeensam mit Carolin Hennecke, Anne Preußler un Juliane Döll as Startlöperin de Bronzemedaille. Wegen hör goot Leistungen wurr se för dat vörletzte Weltcup-Weekenenn’ vun de Saison in Trondheim nomineert, wo se glieks in dat eerste Sprintrennen in de Punkteränge (23. Platz) loopen kunn. In hör dart Weltcuprennen gelung hör denn, ebenfalls in’ Sprint, in dat russischen Chanty-Mansijsk hör eerst Weltcupsieg.
Bi de Sömmerbiathlon-Weltmeesterschapen 2009 in Oberhof wunn Tina Bachmann gemeensam mit Magdalena Neuner, Christoph Stephan un Michael Rösch den Weltmeester-Titel in de Mixed-Staffel. In de Saison 2009/2010 keem Bachmann negen Mal ünner de best 15 in' Weltcup un hett sück as Ersatzlöperin för de Olympisch Winterspelen 2010 in Vancouver qualifizeert. Se hett de Saison up Rang 24 vun den Gesamtweltcup afslooten. In' IBU-Cup Rollerski in Nove Mesto hett sück Tina Bachmann den tweeten Platz in' Sprint un den Sieg in de Verfolgung halt. Bi de Biathlon-Weltmeesterschapen 2011 in Chanty-Mansijsk wunn se unverwacht Sülver in' Eenzel över 15 Kilometer achter de sweedsch Siegerin Helena Ekholm. Dat weer de eerste Insatz vun Bachmann bi en Weltmeesterschap. Dorvör weer se all in de Saison 2010/11 dreemal ünner de Top-Ten loopen un hörr düersam to dat düütsch Weltcupteam. 2011 wurr Bachmann bi de Weltmeesterschapen in Chanty Mansijsk in de Staffel gemeensam mit Andrea Henkel, Miriam Gössner un Magdalena Neuner Weltmeesterin. Ok in dat folgen Johr wunn Bachmann mit de Staffel in der sülvig Tosommensetten in Ruhpolding de Goldmedaille un wies dorbi en goot Leistung. In den dorup folgen Massenstart hett se knapp dat Podest verfehlt un keem mit twee Scheetfehler up den veerten Platz.
In de Saison 2012/2013 keem se blots een Mal ünner de Top-20. En dart Platz mit de Staffel in Oberhof weer de best Platzeeren in de Saison. Anfang 2013 hemm hör de Trainer bi den Weltcup in Ruhpolding wegen swaak Leistungen nah Huus schickt. Nah mäßig Platzeeren bi de Düütsch Meesterschapen 2013 wurr to Anfang vun de Saison 2013/2014 weder im Weltcup noch in' IBU-Cup insett.[3] In' Dezember 2013 wunn se bi de Uptaktveranstalten to'n Alpencup in Antholz beid Sprintrennen in de Fruenklass. En wiedere Sieg gelung hör noch in' Januar 2014 in en Sprint in Notschrei, bevör se sück vun dissen swaak besett Wettbewarfen torüch truck.
An' 8. Mai 2014 hett Tina Bachmann in en Stellungnahme de Grünnen för de swaak Leistungen in' Weltcup un de längere Uttiet vun den aktiven Leistungssport nömmt. Nch Burnout-Syndrom[4] un Problemen mit de Schilddrüüs hett se sück in Ruhpolding up de Saison 2014/15 vörbereit. In' Dezember 2014 wunn se in Obertilliach en Eenzel in' IBU-Cup. Beständigkeit kreeg se aber ok nich henn, een Dag later keem se in en Sprintrennen nich ünner de best fievtig Löper. Wegen hör goot Leistungen in' IBU-Cup wurr se aber för den Weltcup in Oberhof nomineert. 2015 kunn se bi de Europameesterschapen in Otepää in’ Sprint den 4. Platz beleggen[5].
An 15. Dezember 2016 hett se hör sofortigen Rückträe vun den aktiven Sport verkünnd.
Weblenken[ännern | Bornkood ännern]
- Offizielle Webpräsenz vun Tina Bachmann
- Tina Bachmann in de Datenbank vun de IBU (engelsch)
- Tina Bachmann bi biathlon.xc-ski.de
Enkeld Nahwiesen[ännern | Bornkood ännern]
- ↑ Sächsische Zeitung van’ 12. Februar 2013
- ↑ tina-bachmann.de - Stellungnahm van’ 8. Mai 2014, afropen an’ 20. Mai 2014
- ↑ Freie Presse van' 18. September 2013
- ↑ biathlon-news.de - Tina Bachmann geht es wieder gut, afropen an' 20. Mai 2014
- ↑ [1], Ergevnis, afropen an’ 2. Februar 2015